Padma Purana · Chapter 2.33

ṛṣaya ūcuḥ-
śaptā gaṃdharvaputreṇa suśaṃkhena mahātmanā /
tasya śāpātkathaṃ jātā kiṃ kiṃ karma kṛtaṃ tayā

sā lebhe kīdṛśaṃ putraṃ tasya śāpāddvijottama /
sunīthāyāśca caritaṃ tvaṃ no vistarato vada

sūta uvāca-
suśaṃkhenāpi tenaiva sā śaptā tanumadhyamā /
pituḥ sthānaṃ gatā sā tu sunīthā duḥkhapīḍitā

pitaraṃ cātmanaścaiva caritaṃ ca prakāśitam /
śrutavānsopi dharmātmā mṛtyuḥ satyavatāṃ vara

tāmuvāca sunīthāṃ tu sutāṃ śaptāṃ mahātmanā /
bhavatyā duṣkṛtaṃ pāpaṃ dharma tejaḥ praṇāśanam

kasmātkṛtaṃ mahābhāge suśāṃtasya hi tāḍanam /
viruddhaṃ sarvalokasya bhavatyā parikalpitam

kāmakrodhavihīnaṃ taṃ suśāṃtaṃ dharmavatsalam /
tapomārge vilīnaṃ ca parabrahmaṇi saṃsthitam

tamevaghātayedyo vai tasya pāpaṃ śṛṇuṣva hi /
pāpātmā jāyate putraḥ kilbiṣaṃ labhate bahu

tāḍaṃtaṃ tāḍayedyo vai krośaṃtaṃ krośayetpunaḥ /
tasya pāpaṃ sa vai bhuṃkte tāḍitasya na saṃśayaḥ

sa vai śāṃtaḥ sa jitātmā tāḍayaṃtaṃ na tāḍayet /
nirdoṣaṃ prati yenāpi tāḍanaṃ ca kṛtaṃ sute

paścānmohena pāpena nirdoṣe'pi ca tāḍayet /
nirdoṣaṃ prati yenāpi hṛdrogaḥ kriyate vṛthā

nirdoṣaṃ tāḍayetpaścānmohātpāpena kenacit /
sa pāpī pāpamāpnoti nirdoṣasya śarīrajam

nirdoṣo ghātayettaṃ vai tāḍaṃtaṃ pāpacetasam /
punarutthāya vegena sāhasātpāpacetanam

pāpakartuśca yatpāpaṃ nirdoṣaṃ prati gacchati /
tāḍanaṃ naiva tasmādvai kāryaṃ doṣavato'pi ca

duṣkṛtaṃ ca mahatputri tvayaiva paripālitam /
śaptā tenāpi yādyaiva tasmātpuṇyaṃ samācara

satāṃ saṃgaṃ samāsādya sadaiva parivartaya /
yogadhyānena jñānena parivartaya naṃdini

satāṃ saṃgo mahāpuṇyo bahuśreyo vidhāyakaḥ /
bāle paśya sudṛṣṭāṃtaṃ satāṃ saṃgasya yadguṇam

apāṃ saṃsparśanātpānātsnānāttatra mahādhiyaḥ /
munayaḥ siddhimāyāṃti bāhyābhyaṃtarakṣālitāḥ

śuciṣmaṃto bhavaṃtyete lokāḥ sarve carācarāḥ /
āpaḥ śāṃtāḥ suśītāśca mṛdugātrāḥ priyaṃkarāḥ

nirmalā rasavatyaśca puṇyavīryā malāpahāḥ /
tathā saṃtastvayā jñeyā niṣevyāśca prayatnataḥ

yathā vahniprasaṃgācca malaṃ tyajati kāṃcanam /
tathā satāṃ hi saṃsargātpāpaṃ tyajati mānavaḥ

satyavahniḥ pradīptaśca prajvaletpuṇyatejasā /
satyena dīptatejāstu jñānenāpi sunirmalaḥ

atyuṣṇo dhyānabhāvena aspṛśyaḥ pāpajairnaraiḥ /
satyavahneḥ prasaṃgācca pāpaṃ sarvaṃ vinaśyati

tasmātsatyasya saṃsargaḥ kartavyaḥ sarvathā tvayā /
pāpabhāraṃ parityajya puṇyamevaṃ samāśraya

sūta uvāca-
evaṃ pitrā sunīthā sā duḥkhitā pratibodhitā /
namaskṛtya pituḥ pādau gatā sā nirjanaṃ vanam

kāmaṃ krodhaṃ parityajya bālyabhāvaṃ tapasvinī /
mohadrohau ca māyāṃ ca tyaktvā ekāṃtamāsthitā

tasyāḥ sakhyaḥ samājagmuḥ krīḍārthaṃ līlayānvitāḥ /
tāṃ dadṛśurviśālākṣyaḥ sunīthāṃ duḥkhabhāginīm

dhyāyaṃtīṃ ciṃtayānāṃ tāmūcuściṃtāparāyaṇāḥ /
kasmācciṃtasi bhadre tvamanayā ciṃtayānvitā

tanno vai kāraṇaṃ brūhi ciṃtāduḥkhapradāyinī /
ekaiva sārthakī ciṃtā dharmasyārthe viciṃtyate

dvitīyā sārthakā ciṃtā yogināṃ dharmanaṃdinī /
anyā nirarthikā ciṃtā tāṃ naiva parikalpayet

kāyanāśakarī ciṃtā bala tejaḥ praṇāśinī /
nāśayetsarvasaukhyaṃ tu rūpahāniṃ nidarśayet

tṛṣṇāṃ mohaṃ tathā lobhametāṃściṃtā hi prāpayet /
pāpamutpādayecciṃtā ciṃtitā ca dine dine

ciṃtāvyādhiprakāśāya narakāya prakalpayet /
tasmācciṃtāṃ parityajya cānuvartasva śobhane

arjitaṃ karmaṇā pūrvaṃ svayameva nareṇa tu /
tadeva bhuṃkte'sau jaṃturjñānavānna viciṃtayet

tasmācciṃtāṃ parityajya sukhaduḥkhādikaṃ vada /
tāsāṃ tadvacanaṃ śrutvā sunīthā vākyamabravīt

iti śrīpadmapurāṇe paṃcapaṃcāśatsahasrasaṃhitāyāṃ bhūmikhaṃḍe venopākhyāne
sunīthācaritaṃ nāma trayastriṃśo'dhyāyaḥ