પદ્મ પુરાણ · અધ્યાય 2.31

સૂત ઉવાચ-
અથ ત્વંગો મહાતેજા દૃષ્ટ્વા ઇંદ્રસ્ય સંપદમ્ ।
ભોગં ચૈવ વિલાસં ચ લીલાં તસ્ય મહાત્મનઃ

કથં મે ઇંદ્ર સદૃશઃ પુત્રઃ સ્યાદ્ધર્મસંયુતઃ ।
ચિંતયિત્વા ક્ષણં ચૈવ અંગો ધર્મભૃતાં વરઃ

સ્વકં ગેહં સમાયાતઃ સ ત્વંગઃ સત્યતત્પરઃ ।
અત્રિં પપ્રચ્છ પિતરં પ્રણતો નમ્રકંધરઃ

કોઽયં પુણ્યઃ સમાચારૈરિંદ્રત્વં ભુંજતે મહત્ ।
કસ્ય પુણ્યસ્ય વૈ પુષ્ટિઃ કિં કૃતં કર્મ કીદૃશમ્

કીદૃશં તપ એતસ્ય કમારાધિતવાન્પુરા ।
એતન્મે વિસ્તરેણ ત્વં બ્રૂહિ સત્યવતાં વર

અત્રિરુવાચ-
સાધુસાધુ મહાભાગ યદ્યેવં પૃચ્છસે મયિ ।
ચરિત્રમિંદ્રસ્ય વત્સ તન્મે નિગદતઃ શૃણુ

સુવ્રતો નામ મેધાવી પુરા બ્રાહ્મણસત્તમઃ ।
તેન કૃષ્ણો હૃષીકેશસ્તપસા ચૈવ તોષિતઃ

પુણ્યગર્ભં પુનઃ પ્રાપ્તો હ્યદિત્યાઃ કશ્યપાત્કિલ ।
વિષ્ણોશ્ચૈવ પ્રસાદેન સુરરાજો બભૂવ હ

અંગ ઉવાચ-
કથમિંદ્રસમઃ પુત્રો મમ સ્યાત્પુત્રવત્સલ ।
તદુપાયં સમાચક્ષ્વ ભવાઞ્જ્ઞાનવતાં વરઃ

અત્રિરુવાચ-
સમાસેનૈવ તસ્યૈવ સુવ્રતસ્ય મહાત્મનઃ ।
ચરિત્રમખિલં પુણ્યં નિશામય મહામતે

યથા સુવ્રત મેધાવી પુરારાધિતવાન્હરિમ્ ।
તસ્ય ભાવં ચ ભક્તિં ચ ધ્યાનં ચૈવ મહાત્મનઃ

સમાલોક્ય જગન્નાથો દત્તવાન્વૈ મહત્પદમ્ ।
સ ઐંદ્રં સર્વભોગાઢ્યં ત્રૈલોક્યં સચરાચરમ્

વિષ્ણોશ્ચૈવ પ્રસાદાચ્ચ પદં ભુંક્તે ત્રિલોકધૃક્ ।
એવં તે સર્વમાખ્યાતમિંદ્રસ્યાપિ વિચેષ્ટિતમ્

ભક્ત્યા તુષ્યતિ ગોવિંદો ભાવધ્યાનેન સત્તમ ।
સર્વં દદાતિ તુષ્ટાત્મા ભક્ત્યા સંતોષિતો હરિઃ

તસ્માદારાધ્ય ગોવિંદં સર્વદં સર્વસંભવમ્ ।
સર્વજ્ઞં સર્વવેત્તારં સર્વેષાં પુરુષં વરમ્

તસ્માત્પ્રાપ્સ્યસિ સર્વં ત્વં યદ્યદિચ્છસિ નંદન

સુખસ્ય દાતા પરમાર્થદાતા મોક્ષસ્ય દાતા જગતાં હિ નાથઃ ।
તસ્માત્તમારાધય ગચ્છ પુત્ર સંપ્રાપ્સ્યસે ઇંદ્રસમં હિ પુત્રમ્

આકર્ણ્ય વાક્યં પરમાર્થયુક્તમુક્તં મહાત્મા ઋષિણા હિ તેન ।
સંગૃહ્ય તત્ત્વં વચનસ્ય તસ્ય પ્રણમ્ય તં શાશ્વતમભ્યયાત્સઃ

આમંત્ર્ય ચાંગઃ પિતરં મહાત્મા બ્રહ્માત્મજં બ્રહ્મસમાનમેવ ।
સંપ્રાપ્તવાન્મેરુગિરેસ્તુ શૃંગં તં કાંચનૈ રત્નમયૈઃ સમેતમ્

ઇતિ શ્રીપદ્મપુરાણે પંચપંચાશત્સહસ્રસંહિતાયાં ભૂમિખંડે।
વેનોપાખ્યાને એકત્રિંશોઽધ્યાયઃ