પદ્મ પુરાણ · અધ્યાય 2.26

સૂત ઉવાચ-
તં પુત્રં નિહતં શ્રુત્વા સા દિતિર્દુઃખપીડિતા ।
પુત્રશોકેન તેનૈવ સંદગ્ધા દ્વિજસત્તમાઃ

પુનરૂચે મહાત્માનં કશ્યપં મુનિપુંગવમ્ ।
ઇંદ્રસ્યાપિ સુદુષ્ટસ્ય વધાર્થં દ્વિજસત્તમ

બ્રહ્મતેજોમયં તીવ્રં દુઃસહં સર્વદૈવતૈઃ ।
પુત્રૈકં દીયતાં કાંત સુપ્રિયાહં યદા વિભો

કશ્યપ ઉવાચ-
નિહતૌ બલવૃત્રૌ ચ મમ પુત્રૌ મહાબલૌ ।
અઘમાશ્રિત્ય દેવેન ઇંદ્રેણાપિ દુરાત્મના

તસ્યૈવ ચ વધાર્થાય પુત્રમેકં દદામ્યહમ્ ।
વર્ષાણાં તુ શતૈકં ત્વં શુચિર્ભવ યશસ્વિનિ

એવમુક્ત્વા સ યોગીંદ્રો હસ્તં શિરસિ વૈ તદા ।
દત્ત્વાદિત્યા સહૈવાસૌ ગતો મેરું તપોવનમ્

તપસ્તતાપ સા દેવી તપોવનનિવાસિની ।
શુચિષ્મતી સદા ભૂત્વા પુત્રાર્થા દ્વિજસત્તમ

તતો દેવઃ સહસ્રાક્ષો જ્ઞાત્વા ઉદ્યમમેવ ચ ।
દિત્યાશ્ચૈવ મહાભાગ અંતરપ્રેક્ષકોઽભવત્

પંચવિંશાબ્દિકો ભૂત્વા દેવરાડ્દૈવતોપમઃ ।
બ્રાહ્મણસ્ય ચ રૂપેણ તસ્યાશ્ચાંતિકમાગતઃ

સ તાં પ્રણમ્ય ધર્માત્મા માતરં તપસાન્વિતામ્ ।
તયોક્તસ્તુ સહસ્રાક્ષો ભવાન્કો દ્વિજસત્તમ

તામુવાચ સહસ્રાક્ષઃ પુત્રોઽહં તવ શોભને ।
બ્રાહ્મણો વેદવિદ્વાંશ્ચ ધર્મં જાનામિ ભામિનિ

તપસસ્તવ સાહાય્યં કરિષ્યે નાત્ર સંશયઃ ।
શુશ્રૂષતિ સ તાં દેવીં માતરં તપસાન્વિતામ્

તમિંદ્રં સા ન જાનાતિ આગતં દુષ્ટકારિણમ્ ।
ધર્મપુત્રં વિજાનાતિ શુશ્રૂષંતં દિને દિને

અંગં સંવાહયેદ્દેવ્યાઃ પાદૌ પ્રક્ષાલયેત્તતઃ ।
પત્રં મૂલં ફલં તત્ર વલ્કલાજિનમેવ ચ

દદાત્યેવં સ ધર્માત્મા તસ્યૈ દિત્યૈ સદૈવ હિ ।
ભક્ત્યા સંતોષિતા તસ્ય સંતુષ્ટા તમભાષત

પુત્રે જાતે મહાપુણ્યે ઇંદ્રે ચ નિહતે સતિ ।
કુરુ રાજ્યં મહાભાગ પુત્રેણ મમ દૈવકમ્

એવમસ્તુ મહાભાગે તે પ્રસાદાદ્ભવિષ્યતિ ।
તસ્યાશ્ચૈવાંતરં પ્રેપ્સુરભવત્પાકશાસનઃ

ઊને વર્ષશતે ચાસ્યા દદર્શાંતરમચ્યુતઃ ।
અકૃત્વા પાદયોઃ શૌચં દિતિઃ શયનમાવિશત્

શય્યાંતે સા શિરઃ કૃત્વા મુક્તકેશાતિવિહ્વલા ।
નિદ્રામાહારયામાસ તસ્યાઃ કુક્ષિં પ્રવિશ્ય હ

વજ્રપાણિસ્તતો ગર્ભં સપ્તધા તં ન્યકૃંતત ।
વજ્રેણ તીક્ષ્ણધારેણ રુરોદ ઉદરે સ્થિતઃ

સ ગર્ભસ્તત્ર વિપ્રેંદ્રા ઇંદ્રહસ્તગતેન વૈ ।
રોદમાનં મહાગર્ભં તમુવાચ પુનઃ પુનઃ

શતક્રતુર્મહાતેજા મા રોદીરિત્યભાષત ।
સપ્તધા કૃતવાઞ્છક્રસ્તં ગર્ભં દિતિજં પુનઃ

એકૈકં સપ્તધા ચ્છિત્ત્વા રુદમાનં સ દેવરાટ્ ।
એવં વૈ મરુતો જાતાસ્તે તુ દેવા મહૌજસઃ

યથા ઇંદ્રેણ તે પ્રોક્તા બભૂવુર્નામભિસ્તતઃ ।
અતિવીર્ય મહાકાયાસ્તીવ્ર તેજઃ પરાક્રમાઃ

એકોના વૈ બભૂવુસ્તે પંચાશન્મરુતસ્તતઃ ।
મરુતો નામ તે ખ્યાતા ઇંદ્રમેવ સમાશ્રિતાઃ

ભૂતાનામેવ સર્વેષાં રોચયંતિ ગણં મહત્ ।
નિકાયેષુ નિકાયેષુ હરિઃ પ્રાદાત્પ્રજાપતિઃ

ક્રમશસ્તાનિ રાજ્યાનિ પૃથુપૂર્વાણિ તાનિ વૈ ।
સ દેવઃ પુરુષઃ કૃષ્ણઃ સર્વવ્યાપી જગદ્ગુરુઃ

તપોજિષ્ણુર્મહાતેજાઃ સર્વ એકઃ પ્રજાપતિઃ ।
પર્જન્યઃ પાવકઃ પુણ્યઃ સર્વાત્મા સર્વ એવ હિ

તસ્ય સર્વમિદં પુણ્યં જગત્સ્થાવરજંગમમ્ ।
ભૂતસર્ગમિમં સમ્યગ્જાનતો દ્વિજસત્તમ

નાવૃત્તિભયમસ્તીહ પરલોકભયં કુતઃ ।
ઇમાં સૃષ્ટિં મહાપુણ્યાં સર્વપાપહરાં શુભામ્

યઃ શૃણોતિ નરો ભક્ત્યા સર્વપાપૈઃ પ્રમુચ્યતે ।
સ હિ ધન્યશ્ચ પુણ્યશ્ચ સ હિ સત્યસમન્વિતઃ

યઃ શૃણોતિ ઇમાં સૃષ્ટિં સ યાતિ પરમાં ગતિમ્ ।
સર્વપાપવિશુદ્ધાત્મા વિષ્ણુલોકં સ ગચ્છતિ

ઇતિ શ્રીપદ્મપુરાણે ભૂમિખંડે મરુદુત્પત્તિર્નામ ષડ્વિંશોઽધ્યાયઃ