પદ્મ પુરાણ · અધ્યાય 2.25

સૂત ઉવાચ-
ઇયં હિ કા ગાયતિ ચારુલોચના વિલાસભાવૈઃ પરિવિશ્વમેવ ।
અતીવ બાલા શુશુભે મનોહરા સંપૂર્ણભાવૈઃ પરિમોહયેજ્જનમ્

દૃષ્ટ્વા સ રંભાં કમલાયતાક્ષીં પીનસ્તનીં ચર્ચિતકુંકુમાંગીમ્ ।
પદ્માનનાં કામગૃહં મમૈષા નો વા રતિશ્ચારુમનોહરેયમ્

સંપૂર્ણભાવાં પરિરૂપયુક્તાં કામાંગશીલામતિશીલભાવામ્ ।
યાસ્યામ્યહં વશ્યમિહૈવ અસ્યા મનોભવેનાદ્ય ઇહૈવ પ્રેષિતઃ

ઇતીવ દૈત્યઃ સુવિચિંતયાન્વિતઃ કામેન મુગ્ધો બહુકાલનોદિતઃ ।
સમાતુરસ્તત્ર જગામ સત્વરમુવાચ તાં દીનમનાઃ સુલોચનામ્

કસ્યાસિ વા સુંદરિ કેન પ્રેષિતા કિં નામ તે પુણ્યતમં વદસ્વ મે ।
તવૈવ રૂપેણ મહાતિતેજસા મુગ્ધોસ્મિ બાલે મમ વશ્યતાં વ્રજ

એવમુક્તા વિશાલાક્ષી વૃત્રં કામાકુલં પ્રતિ ।
અહં રંભા મહાભાગ ક્રીડાર્થં વનમુત્તમમ્

સખીસાર્ધં સમાયાતા નંદનં વનમુત્તમમ્ ।
ત્વં તુ કો વા કિમર્થં હિ મમ પાર્શ્વં સમાગતઃ

વૃત્ર ઉવાચ-
શ્રૂયતામભિધાસ્યામિ યોહં બાલે સમાગતઃ ।
હુતાશનાત્સમુત્પન્નઃ કશ્યપસ્ય સુતઃ શુભે

સખાહં દેવદેવસ્ય ઇંદ્ર સ્યાપિ વરાનને ।
ઐંદ્રં પદં વરારોહે અર્ધં મે ભુક્તિમાગતમ્

અહં વૃત્રઃ કથં દેવિ મામેવં ન તુ વિંદસિ ।
ત્રૈલોક્યં વશમાયાતં યસ્યૈવ વરવર્ણિનિ

અહં શરણમાયાતઃ કામાદ્રક્ષ વરાનને ।
ભજસ્વ માં વિશાલાક્ષિ કામેનાકુલિતં પ્રિયે

રંભોવાચ-
વશગા હં તવૈવાદ્ય ભવિષ્યામિ ન સંશયઃ ।
યં યં વદામ્યહં વીર તં તં કાર્યં ત્વયૈવ હિ

એવમસ્તુ મહાભાગે તં તં સર્વં કરોમ્યહમ્ ।
એવં સંબંધકં કૃત્વા તયા સહ મહાબલઃ

તસ્મિન્વને મહાપુણ્યે રેમે દાનવસત્તમઃ ।
તસ્યા ગીતેન નૃત્યેન હાસ્યેન લલિતેન ચ

અતિમુગ્ધો મહાદૈત્યઃ સ તસ્યાઃ સુરતેન ચ ।
તમુવાચ મહાભાગં વૃત્રં દાનવસત્તમમ્

સુરાપાનં કુરુષ્વેહ પિબસ્વ મધુમાધવીમ્ ।
તામુવાચ વિશાલાક્ષીં રંભાં શશિનિભાનનામ્

પુત્રોહં બ્રાહ્મણસ્યાપિ વેદવેદાંગપારગઃ ।
સુરાપાનં કથં ભદ્રે કરિષ્યમિ વિનિંદિતમ્

તયા તુ રંભયા દેવ્યા પ્રીત્યા દત્તા સુરા હઠાત્ ।
તસ્યા દાક્ષિણ્યભાવેન સુરાપાનં કૃતં તદા

અતીવમુગ્ધં સુરયા જ્ઞાનભ્રષ્ટો યદાભવત્ ।
તદંતરે સુરેંદ્રેણ વજ્રેણ નિહતસ્તદા

બ્રહ્મહત્યાદિકૈઃ પાપૈઃ સ લિપ્તો વૃત્રહા તતઃ ।
બ્રાહ્મણાસ્તુ તતઃ પ્રોચુરિંદ્ર પાપં કૃતં ત્વયા

અસ્માદ્વાક્યાત્તુ વિશ્વસ્તો વૃત્રો નામ મહાબલઃ ।
હતો વિશ્વાસભાવેન એવં પાપં ત્વયા કૃતમ્

ઇંદ્ર ઉવાચ-
યેન કેનાપ્યુપાયેન હંતવ્યોરિઃ સદૈવ હિ ।
દેવબ્રાહ્મણહંતારં યજ્ઞાનાં ધર્મકંટકમ્

નિહતં દાનવં દુષ્ટં ત્રૈલોક્યસ્યાપિ નાયકમ્ ।
તદર્થં કુપિતા યૂયમેતન્ન્યાયસ્ય લક્ષણમ્

વિચારમેવં કર્ત્તવ્યં ભવદ્ભિર્દ્વિજસત્તમાઃ ।
પશ્ચાત્કોપં પ્રકર્ત્તવ્યમન્યાયં મમ ચિંત્યતામ્

એવં સંબોધિતા વિપ્રા ઇંદ્રેણાપિ મહાત્મના ।
બ્રહ્માદિભિઃ સુરૈઃ સર્વૈર્બોધિતાસ્તે ચ સત્તમાઃ

જગ્મુઃ સ્વસ્થાનમેવં હિ નિહતે ધર્મકંટકે

ઇતિ શ્રીપદ્મપુરાણે ભૂમિખંડે વૃત્રાસુરવધોનામ પંચવિંશોઽધ્યાયઃ