પદ્મ પુરાણ · અધ્યાય 2.27

સૂત ઉવાચ-
સ પ્રભુઃ સર્વલોકેશો હ્યભિષિચ્ય તતો નૃપમ્ ।
પૃથું વેનસ્ય તનયં સર્વરાજ્યે મહાપ્રભુમ્

મહાબાહું મહાકાયં યથેંદ્રં ચ સુરેશ્વરમ્ ।
ક્રમેણાપિ તતો બ્રહ્મા રાજ્યાનિ ચ વિચાર્ય વૈ

યદ્યસ્યાપિ ભવેદ્યોગ્યં દાતું તદુપચક્રમે ।
વૃક્ષાણાં બ્રાહ્મણાનાં ચ ગ્રહર્ક્ષાણાં તથૈવ ચ

સોમં રાજ્યે સોભ્યષિંચત્તપસાં ચ મહામતિઃ ।
ધર્માણાં ધર્મયજ્ઞાનાં પુણ્યાનાં પુણ્યતેજસામ્

અપાં મધ્યે તથા દેવં તીર્થાનાં હિ તથૈવ ચ ।
વરુણં સોભિષિચ્યૈવ રત્નાનાં ચ દ્વિજોત્તમ

અન્યેષાં સર્વયક્ષાણાં રાજ્યે વૈશ્રવણં પુનઃ ।
વિષ્ણુમેવ મહાપ્રાજ્ઞમાદિત્યાનાં પિતામહઃ

રાજ્યે સંસ્થાપયામાસ જનતા હિતહેતવે ।
સર્વેષામેવ પુણ્યાનાં દક્ષમેવ પ્રજાપતિમ્

સમર્થં સર્વધર્મજ્ઞં પ્રજાપતિગણેશ્વરમ્ ।
પ્રહ્રાદં સર્વધર્મજ્ઞં સ હિ રાજ્યે ન્યરૂપયત્

દૈત્યાનાં દાનવાનાં ચ વિષ્ણુતેજઃ સમન્વિતમ્ ।
યમં વૈવસ્વતં ધર્મં પૈત્ર્યે રાજ્યેભિષિચ્ય ચ

યક્ષરાક્ષસભૂતાનાં પિશાચોરગસર્પિણામ્ ।
યોગિનીનાં ચ સર્વાસાં વૈતાલાનાં મહાત્મનામ્

કંકાલાનાં હિ સર્વેષાં કૂષ્માંડાનાં તથૈવ ચ ।
પાર્થિવાનાં ચ સર્વેષાં ગિરિશં શૂલપાણિનમ્

પર્વતાનાં હિ સર્વેષાં હિમવંતં મહાગિરિમ્ ।
નદીનાં ચ તડાગાનાં વાપિકાનાં તથૈવ ચ

કુંડાનાં કૂપરાજ્યે હિ દિવ્યેષુ ચ સુરેશ્વરઃ ।
સાગરં સ્થાપિતં પુણ્યં સર્વતીર્થમનુત્તમમ્

ગંધર્વાણાં તુ સર્વેષાં રાજ્યે પુણ્યે તથૈવ ચ ।
ચિત્રરથં તતો બ્રહ્મા અભિષિચ્ય સુરેશ્વરઃ

નાગાનાં પુણ્યવીર્યાણાં વાસુકિં ચ ચતુર્મુખઃ ।
સર્પાણાં તુ તથા રાજ્યે અભિષિચ્ય સ તક્ષકમ્

વારણાનાં તતો રાજ્યે ઐરાવણમસિંચત ।
અશ્વાનાં ચૈવ સર્વેષામુચ્ચૈઃશ્રવસમેવ ચ

પક્ષિણાં ચૈવ સર્વેષાં વૈનતેયમથાપિ સઃ ।
મૃગાણાં ચ તતો રાજ્યે બ્રહ્મા સિંહમથાદિશત્

ગોવૃષં તુ ગવાં મધ્યે અભિષિચ્ય પ્રજાપતિઃ ।
વનસ્પતીનાં સર્વેષાં પ્લક્ષમેવ પિતામહઃ

એવં રાજ્યાનિ સર્વાણિ સંસ્થાપ્ય ચ પિતામહઃ ।
દિશાપાલાંસ્તતો બ્રહ્મા સ્થાપયામાસ સત્તમઃ

વૈરાજસ્ય તથા પુત્રં પૂર્વસ્યાં દિશિ સત્તમઃ ।
સુધન્વાનં દિશઃપાલં રાજાનં સોભ્યષિંચત

દક્ષિણસ્યાં મહાત્માનં કર્દમસ્ય પ્રજાપતેઃ ।
પુત્રં શંખપદં નામ રાજાનં સોભ્યષિંચત

પશ્ચિમાયાં તથા બ્રહ્મા વરુણસ્ય પ્રજાપતેઃ ।
પુત્રં ચ પુષ્કરં નામ સોઽભ્યષિંચત્પ્રજાપતિઃ

ઉત્તરસ્યાં દિશિ બ્રહ્મ નલકૂબરમેવ ચ ।
એવં ચૈવાભ્યષિંચચ્ચ દિક્પાલાન્સમહૌજસઃ

યૈરિયં પૃથિવી સર્વા સપ્તદ્વીપા સપત્તના ।
યથાપ્રદેશમદ્યાપિ ધર્મેણ પ્રતિપાલ્યતે

પૃથુશ્ચૈવં મહાભાગઃ સોભિષિક્તો નરાધિપઃ ।
રાજસૂયાદિભિઃ સર્વૈરભિષિક્તો મહામખૈઃ

વિધિના વેદદૃષ્ટેન રાજરાજ્યે મહીપતિઃ ।
ચાક્ષુષે નામ્નિ સંપુણ્યે અતીતે ચ મહૌજસિ

મન્વંતરે મહાભાગ દેવપુણ્યહિતૈષિણિ ।
તતો વૈવસ્વતાયૈવ મનવે રાજ્યમાદિશત્

વિસ્તરં ચાપિ વ્યાખ્યાસ્યે પૃથોશ્ચૈવ મહાત્મનઃ ।
યદિ મામેવ વિપ્રેન્દ્ર શુશ્રૂષસિ અતંદ્રિતઃ

એતદેવમધિષ્ઠાનં મહત્પુણ્યં પ્રકીર્તિતમ્ ।
સર્વેષ્વેવ પુરાણેષુ એતદ્ધિ નિશ્ચિતં સદા

પુણ્યં યશસ્યમાયુષ્યં સ્વર્ગવાસકરં શુભમ્ ।
ધન્યં પવિત્રમાયુષ્યં પુત્રદં વૃદ્ધિદાયકમ્

યઃ શૃણોતિ નરો ભક્ત્યા ભાવધ્યાનસમન્વિતઃ ।
અશ્વમેધફલં તસ્ય જાયતે નાત્ર સંશયઃ

ઇતિ શ્રીપદ્મપુરાણે પંચપંચાશત્સહસ્રસંહિતાયાં ભૂમિખંડે
રાજ્યાભિષેકોનામ સપ્તવિંશોઽધ્યાયઃ