પદ્મ પુરાણ · અધ્યાય 2.16

સુમનોવાચ-
અંગારસંચયે માર્ગે ઘૃષ્યમાણો હિ નીયતે ।
દહ્યમાનઃ સ દુષ્ટાત્મા ચેષ્ટમાનઃ પુનઃ પુનઃ

યત્રાતપો મહાતીવ્રો દ્વાદશાદિત્યતાપિતઃ ।
નીયતે તેન માર્ગેણ સંતપ્તઃ સૂર્યરશ્મિભિઃ

પર્વતેષ્વેવ દુર્ગેષુ છાયાહીનેષુ દુર્મતિઃ ।
નીયતે તેન માર્ગેણ ક્ષુધાતૃષ્ણાપ્રપીડિતઃ

સ દૂતૈર્હન્યમાનસ્તુ ગદાખડ્ગૈઃ પરશ્વધૈઃ ।
કશાભિસ્તાડ્યમાનસ્તુ નિંદ્યમાનસ્તુ દૂતકૈઃ

તતઃ શીતમયે માર્ગે વાયુના સેવ્યતે પુનઃ ।
તેન શીતેન દુઃખી સ ભૂત્વા યાતિ ન સંશયઃ

આકૃષ્યમાણો દૂતૈસ્તુ નાનાદુર્ગેષુ નીયતે ।
એવં પાપી સ દુષ્ટાત્મા દેવબ્રાહ્મણનિંદકઃ

સર્વપાપસમાચારો નીયતે યમકિંકરૈઃ ।
યમં પશ્યતિ દુષ્ટાત્મા કૃષ્ણાંજનચયોપમમ્

તમુગ્રં દારુણં ભીમં ભીમદૂતૈઃ સમાવૃતમ્ ।
સર્વવ્યાધિસમાકીર્ણં ચિત્રગુપ્તસમન્વિતમ્

આરૂઢં મહિષં દેવં ધર્મરાજં દ્વિજોત્તમ ।
દંષ્ટ્રાકરાલમત્યુગ્રં તસ્યાસ્યં કાલસંનિભમ્

પીતવાસં ગદાહસ્તં રક્તગંધાનુલેપનમ્ ।
રક્તમાલ્યકૃતાભૂષં ગદાહસ્તં ભયંકરમ્

એવંવિધં મહાકાયં યમં પશ્યતિ દુર્મતિઃ ।
તં દૃષ્ટ્વા સમનુપ્રાપ્તં સર્વધર્મબહિષ્કૃતમ્

યમઃ પશ્યતિ તં દુષ્ટં પાપિષ્ઠં ધર્મકંટકમ્ ।
શાસયેત્તુ મહાદુઃખૈઃ પીડાભિર્દારુમુદ્ગલૈઃ

યાવદ્યુગસહસ્રાંતં તાવત્કાલં પ્રપચ્યતે ।
નાનાવિધે ચ નરકે પચ્યતે ચ પુનઃ પુનઃ

નારકીં યાતિ વૈ યોનિં કૃમિકોટિષુ પાપકૃત્ ।
અમેધ્યે પચ્યતે નિત્યં હાહાભૂતો વિચેતનઃ

મરણં ચ સ પાપાત્મા એવં યાતિ સુનિશ્ચિતમ્ ।
એવં પાપસ્ય સંયોગં ભુંક્તે ચૈવ સુ દુર્મતિઃ

પુનર્જન્મ પ્રવક્ષ્યામિ યાસુ યોનિષુ યાતિ ચ ।
શુનાં યોનિશતં પ્રાપ્ય ભુંક્તે વૈ પાતકં પુનઃ

વ્યાઘ્રો ભવતિ દુષ્ટાત્મા રાસભીં યાતિ વૈ પુનઃ ।
માર્જાર શૂકરીં યોનિં સર્પયોનિં તથૈવ ચ

નાનાભેદાસુ સર્વાસુ તિર્યક્ષુ ચ પુનઃ પુનઃ ।
પાપપક્ષિષુ સંયાતિ અન્યાસુ મહતીષુ ચ

ચાંડાલ ભિલ્લયોનિં ચ પુલિંદીં યાતિ પાપકૃત્ ।
એતત્તે સર્વમાખ્યાતં પાપિનાં જન્મ ચૈવ હિ

મરણે શૃણુ કાંત ત્વં ચેષ્ટાં તેષાં સુદારુણામ્ ।
પાપપુણ્યસમાચારસ્તવાગ્રે કથિતો મયા

અન્યદેવં પ્રવક્ષ્યામિ યદિ પૃચ્છસિ માનદ

ઇતિ શ્રીપદ્મપુરાણે પંચપંચાશત્સહસ્રસંહિતાયામૈંદ્રે સુમનોપાખ્યાને પાપપુણ્યવિવક્ષાનામ ષોડશોઽધ્યાયઃ