પદ્મ પુરાણ · અધ્યાય 2.15

સોમશર્મોવાચ-
પાપિનાં મરણં ભદ્રે કીદૃશૈર્લક્ષણૈર્યુતમ્ ।
તન્મે ત્વં વિસ્તરાદ્બ્રૂહિ યદિ જાનાસિ ભામિનિ

સુમનોવાચ-
શ્રૂયતામભિધાસ્યામિ તસ્માત્સિદ્ધાચ્છ્રુતં મયા ।
પાપિનાં મરણે કાંત યાદૃશં લિંગમેવ ચ

મહાપાતકિનાં ચૈવ સ્થાનં ચેષ્ટાં વદામ્યહમ્ ।
વિણ્મૂત્રામેધ્યસંયુક્તાં ભૂમિં પાપસમન્વિતામ્

સતાં પ્રાપ્ય સુદુષ્ટાત્મા પ્રાણાન્દુઃખેન મુંચતિ ।
ચાંડાલભૂમિં સંપ્રાપ્ય મરણં યાતિ દુઃસ્થિતઃ

ગર્દભાચરિતાં ભૂમિં વેશ્યાગેહં સમાશ્રિતઃ ।
કલ્પપાલગૃહં ગત્વા નિધનાયોપગચ્છતિ

અસ્થિચર્મનખૈઃ પૂર્ણમાશ્રિતં પાપકિલ્બિષૈઃ ।
તાં પ્રાપ્ય ચ સ દુષ્ટાત્મા મૃત્યું યાતિ સુનિશ્ચિતમ્

અન્યાં પાપસમાચારાં પ્રાપ્ય મૃત્યું સ ગચ્છતિ ।
અથ ચેષ્ટાં પ્રવક્ષ્યામિ દૂતાનાં તુ તમિચ્છતામ્

ભૈરવાન્દારુણાન્ઘોરાનતિકૃષ્ણાન્મહોદરાન્ ।
પિંગાક્ષાન્પીતનીલાંશ્ચ અતિશ્વેતાન્મહોદરાન્

અત્યુચ્ચાન્વિકરાલાંશ્ચ શુષ્કમાંસવસોપમાન્ ।
રૌદ્રદંષ્ટ્રાન્કરાલાંશ્ચ સિંહાસ્યાન્સર્પહસ્તકાન્

સતાન્દૃષ્ટ્વા પ્રકંપેત ખિદ્યતે ચ મુહુર્મુહુઃ ।
શિવાસંનાદવદ્ઘોરાન્મહારાવાન્મહામતે

મુંચંતિ દૂતકાઃ સર્વે કર્ણમૂલે તુ તસ્ય હિ ।
ગલે પાશૈઃ પ્રબદ્ધ્વા તે કટિં બદ્ધ્વા તથોદરે

સમાધૃષ્ય નિપાત્યંતે હાહેતિ વદતે મુહુઃ ।
મ્રિયમાણસ્ય યા ચેષ્ટા તામેવં પ્રવદામ્યહમ્

પરદ્રવ્યાપહરણં પરભાર્યાવિડંબનમ્ ।
ઋણં પરસ્ય સર્વસ્વં ગૃહીતં યત્તુ પાપિભિઃ

પુનર્નૈવ પ્રદત્તં હિ લોભાસ્વાદવિમોહતઃ ।
અન્યદેવં મહાપાપં કુપ્રતિગ્રહમેવ ચ

કંઠમાયાંતિ તે સર્વે મ્રિયમાણસ્ય તસ્ય ચ ।
યાનિકાનિ ચ પાપાનિ પૂર્વમેવ કૃતાનિ ચ

આયાંતિ કંઠમૂલં તે મહાપાપસ્ય નાન્યથા ।
દુઃખમુત્પાદયંત્યેતે કફબંધેન દારુણમ્

પીડાભિર્દારુણાભિસ્તુ કંઠો ઘુરઘુરાયતે ।
રોદતે કંપતેઽત્યર્થં માતરં પિતરં પુનઃ

સ્મરતે ભ્રાતરં તત્ર ભાર્યાં પુત્રાન્પુનઃપુનઃ ।
પુનર્વિસ્મરણં યાતિ મહાપાપેન મોહિતઃ

તસ્ય પ્રાણાન ગચ્છંતિ બહુપીડાસમાકુલાઃ ।
પતતે કંપતે ચૈવ મૂર્ચ્છતે ચ પુનઃપુનઃ

એવં પીડાસમાયુક્તો દુઃખં ભુંક્તેતિ મોહિતઃ ।
તસ્ય પ્રાણાઃ સુદુઃખેન મહાકષ્ટૈઃ પ્રચાલિતાઃ

અપાનમાર્ગમાશ્રિત્ય શૃણુ કાંત પ્રયાંતિ તે ।
એવં પ્રાણી મહામુગ્ધો લોભમોહસમન્વિતઃ

નીયતે યમદૂતૈસ્તુ તસ્ય દુઃખં વદામ્યહમ્

ઇતિ શ્રીપદ્મપુરાણે પંચપંચાશત્સહસ્રસંહિતાયાં ભૂમિખંડે ઐંદ્રે સુમનોપાખ્યાને પાપમરણવિવક્ષાનામપંચદશોઽધ્યાયઃ