પદ્મ પુરાણ · અધ્યાય 2.116

કુંજલ ઉવાચ-
અશોકસુંદરી પુણ્યા રંભયા સહ હર્ષિતા ।
નહુષં પ્રાપ્ય વિક્રાંતં તમુવાચ તપસ્વિની

અહં તે ધર્મતઃ પત્ની દેવૈર્દિષ્ટા તપસ્વિની ।
ઉદ્વાહયસ્વ માં વીર યદિ ધર્મમિહેચ્છસિ

સદૈવ ચિંત્યમાના ચ ત્વામહં તપસિ સ્થિતા ।
ભવાન્ધર્મપ્રસાદેન મયા પ્રાપ્તો નૃપોત્તમ

નહુષ ઉવાચ-
મદર્થે નિયતા ભદ્રે યદિ ત્વં તપસિ સ્થિતા ।
ગુરોર્વાક્યાન્મુહૂર્તેન તવ ભર્તા ભવામ્યહમ્

અનયા રંભયા સાર્દ્ધમાવાં ગચ્છાવ ભામિનિ ।
સમારોપ્ય રથે તાં તુ તાં રંભાં તુ મનોરમામ્

તેનૈવ રથવર્યેણ વશિષ્ઠસ્યાશ્રમં પ્રતિ ।
જગામ લઘુવેગેન તાભ્યાં સહ મહાયશાઃ

તમાશ્રમગતં વિપ્રં સમાલોક્ય પ્રણમ્ય ચ ।
તયા સાર્દ્ધં મહાતેજા હર્ષેણ મહતાન્વિતઃ

યથા યુદ્ધં રણે જાતં નિહતો દાનવાધમઃ ।
નિવેદયામાસ સર્વં વશિષ્ઠાય મહાત્મને

વશિષ્ઠોઽપિ સમાકર્ણ્ય નહુષસ્ય વિચેષ્ટિતમ્ ।
હર્ષેણ મહતાવિષ્ટ આશીર્ભિરભિનંદ્ય તમ્

તિથૌ લગ્ને શુભે પ્રાપ્તે તયોસ્તુ મુનિપુંગવઃ ।
વિવાહં કારયામાસ અગ્નિબ્રાહ્મણસન્નિધૌ

આશીર્ભિરભિનંદ્યૈવ મિથુનં પ્રેષિતં પુનઃ ।
માતરં પિતરં પશ્ય દ્રુતં ગત્વા મહામતે

ત્વાં ચ દૃષ્ટ્વા હિ તે માતા પિતાસૌ તવ સુવ્રત ।
હર્ષેણ વૃદ્ધિમાપ્નોતુ પર્વણીવ તુ સાગરઃ

એવં સંપ્રેષિતો વીરો મુનિના બ્રહ્મસૂનુના ।
તેનૈવ રથવર્યેણ જગામ લઘુવિક્રમઃ

નમસ્કૃત્ય દ્વિજેંદ્રં તં ગતો માતલિના તદા ।
સ્વપુરં પિતરં દ્રષ્ટું તથૈવ ચ સ્વમાતરમ્

સૂત ઉવાચ-
અપ્સરા મેનિકા નામ પ્રેષિતા દૈવતૈસ્તતઃ ।
આયોર્ભાર્યા સુદુઃખેન પતિતા શોકસાગરે

તામુવાચ મહાભાગાં દેવીમિંદુમતીં પ્રતિ ।
મુંચ શોકં મહાભાગે તનયં પશ્ય સસ્નુષમ્

નિહત્ય દાનવં પાપં તવ પુત્રાપહારકમ્ ।
સમાયાંતં સભાયાં ચ વીરશ્રિયાસમન્વિતમ્

સુવૃત્તં સંગરે તસ્ય નહુષેણ યથા કૃતમ્ ।
તસ્યૈ નિવેદયામાસ ઇંદુમત્યૈ ચ મેનિકા

મેનિકાયા વચઃ શ્રુત્વા હર્ષેણ મહતાન્વિતા ।
સખિ સત્યં બ્રવીષિ ત્વમિત્યુવાચ સગદ્ગદમ્

સામૃતં સુપ્રિયં પ્રોક્તં મનઃપ્રોત્સાહકારકમ્ ।
જીવાદિકં મયા દેયં ત્વયિ સર્વસ્વમેવ હિ

એવમાભાષ્ય તાં દેવી રાજાનમિદમબ્રવીત્ ।
તવ પુત્રો મહાબાહુઃ સમાયાતો હિ સાંપ્રતમ્

આખ્યાતિ ચ મહારાજ એષા મે વૈ વરાપ્સરાઃ ।
ભર્તારમેવમાભાષ્ય વિરરામ સુહર્ષિતા

સમાકર્ણ્ય નૃપેંદ્રસ્તુ તામુવાચ પ્રિયાં પ્રતિ ।
પુરા પ્રોક્તં મહાભાગે મુનિના નારદેન હિ

પુત્રં પ્રતિ ન કર્તવ્યં દુઃખં રાજંસ્ત્વયા કદા ।
તં નિહત્ય સુવીર્યેણ દાનવં ચૈષ્યતે સુતઃ

સંજાતં સત્યમેવં વૈ મુનિના ભાષિતં પુરા ।
અન્યથા વચનં તસ્ય કથં દેવિ ભવિષ્યતિ

દત્તાત્રેયો મુનિશ્રેષ્ઠઃ સાક્ષાદ્દેવો ભવિષ્યતિ ।
શુશ્રૂષિતસ્ત્વયા દેવિ મયા ચ તપસા પુરા

પુત્રરત્નં તેન દત્તં વૈષ્ણવાંશપ્રધારકમ્ ।
સદા હનિષ્યતિ પરં દાનવં પાપચેતનમ્

સર્વદૈત્યપ્રહર્તા ચ પ્રજાપાલો મહાબલઃ ।
દત્તાત્રેયેણ મે દત્તો વૈષ્ણવાંશઃ સુતોત્તમઃ

એવં સંભાષ્ય તાં દેવીં રાજા ચેંદુમતીં તદા ।
મહોત્સવં તતશ્ચક્રે પુત્રસ્યાગમનં પ્રતિ

હર્ષેણ મહતાવિષ્ટો વિષ્ણું સસ્માર વૈ પુનઃ

સર્વોપપન્નં સુરવર્ગયુક્તમાનંદરૂપં પરમાર્થમેકમ્ ।
ક્લેશાપહં સૌખ્યપ્રદં નરાણાં સદ્વૈષ્ણવાનામિહ મોક્ષદં પરમ્

ઇતિ શ્રીપદ્મપુરાણે ભૂમિખંડે વેનોપાખ્યાને ગુરુતીર્થમાહાત્મ્યે ચ્યવનચરિત્રે નહુષાખ્યાને ષોડશાધિકશતતમોઽધ્યાયઃ