પદ્મ પુરાણ · અધ્યાય 2.111

કુંજલ ઉવાચ-
નિર્ગચ્છમાને સમરાય વીરે નહુષે હિ તસ્મિન્સુરરાજ તુલ્યે ।
સકૌતુકા મંગલગીતયુક્તાઃ સ્ત્રિયસ્તુ સર્વાઃ પરિજગ્મુરત્ર

દેવતાનાં વરા નાર્યો રંભાદ્યપ્સરસસ્તથા ।
કિન્નર્યઃ કૌતુકોત્સુક્યો જગુઃ સ્વરેણ સત્તમ

ગંધર્વાણાં તથા નાર્યો રૂપાલંકારસંયુતાઃ ।
કૌતુકાય ગતાસ્તત્ર યત્ર રાજા સ તિષ્ઠતિ

પુરં મહોદયં નામ હુંડસ્યાપિ દુરાત્મનઃ ।
નંદનોપવનૈર્દિવ્યૈઃ સર્વત્ર સમલંકૃતમ્

સપ્તકક્ષાન્વિતૈર્ગેહૈઃ કલશૈરુપશોભિતઃ ।
સપતાકૈર્મહાદંડૈઃ શોભમાનં પુરોત્તમમ્

કૈલાસશિખરાકારૈઃ સોન્નતૈર્દિવમાસ્થિતૈઃ ।
સર્વશ્રિયાન્વિતૈર્દિવ્યૈર્ભ્રાજમાનં પુરોત્તમમ્

વનૈશ્ચોપવનૈર્દિવ્યૈસ્તડાગૈઃ સાગરોપમૈઃ ।
જલપૂર્ણૈઃ સુશોભૈસ્તુ પદ્મૈ રક્તોત્પલાન્વિતૈઃ

પ્રાકારૈશ્ચ મહારત્નૈરટ્ટાલકશતૈરપિ ।
પરિખાભિઃ સુપૂર્ણાભિર્જલૈઃ સ્વચ્છૈઃ પ્રશોભિતમ્

અન્યૈશ્ચૈવ મહારત્નૈર્ગજાશ્વૈશ્ચ વિરાજિતમ્ ।
સુનારીભિઃ સમાકીર્ણં પુરુષૈશ્ચ મહાપ્રભૈઃ

નાનાપ્રભાવૈર્દિવ્યૈશ્ચ શોભમાનં મહોદયમ્ ।
રાજશ્રેષ્ઠો મહાવીરો નહુષો દદૃશે પુરમ્

પુરપ્રાંતે વનં દિવ્યં દિવ્યવૃક્ષૈરલંકૃતમ્ ।
તદ્વિવેશ મહાવીરો નંદનં હિ યથાઽમરઃ

રથેન સહ ધર્માત્મા તેન માતલિના સહ ।
પ્રવિષ્ટઃ સ તુ રાજેંદ્રો વનમધ્યે સરિત્તટે

તત્ર તા રૂપસંયુક્તા દિવ્યા નાર્યઃ સમાગતાઃ ।
ગંધર્વા ગીતતત્ત્વજ્ઞા જગુર્ગીતૈર્નૃપોત્તમમ્

સૂતાશ્ચ માગધાઃ સર્વે તં સ્તુવંતિ નૃપોત્તમમ્ ।
રાજાનમાયુપુત્રં તં ભ્રાજમાનં યથા રવિમ્

શુશ્રાવ ગીતં મધુરં નહુષઃ કિન્નરેરિતમ્

ઇતિ શ્રીપદ્મપુરાણે ભૂમિખંડે વેનોપાખ્યાને ગુરુતીર્થમાહાત્મ્યે ચ્યવનચરિત્રે નહુષાખ્યાને એકાદશાધિકશતતમોઽધ્યાયઃ