પદ્મ પુરાણ · અધ્યાય 2.110

કુંજલ ઉવાચ-
આમંત્ર્ય સ મુનીન્સર્વાન્વશિષ્ઠં તપતાંવરમ્ ।
સમુત્સુકો ગંતુકામો નહુષો દાનવં પ્રતિ

તતસ્તે મુનયઃ સર્વે વશિષ્ઠાદ્યાસ્તપોધનાઃ ।
આશીર્ભિરભિનંદ્યૈનમાયુપુત્રં મહાબલમ્

આકાશે દેવતાઃ સર્વા જઘ્નુર્વૈ દુંદુભીન્મુદા ।
પુષ્પવૃષ્ટિં પ્રચક્રુસ્તે નહુષસ્ય ચ મૂર્ધનિ

અથ દેવઃ સહસ્રાક્ષઃ સુરૈઃ સાર્દ્ધં સમાગતઃ ।
દદૌ શસ્ત્રાણિ ચાસ્ત્રાણિ સૂર્યતેજોપમાનિ ચ

દેવેભ્યો નૃપશાર્દૂલો જગૃહે દ્વિજસત્તમ ।
તાનિ દિવ્યાનિ ચાસ્ત્રાણિ દિવ્યરૂપોપમોઽભવત્

અથ તા દેવતાઃ સર્વાઃ સહસ્રાક્ષમથાબ્રુવન્ ।
સ્યંદનો દીયતામસ્મૈ નહુષાય સુરેશ્વર

દેવાનાં મતમાજ્ઞાય વજ્રપાણિઃ સ્વસારથિમ્ ।
આહૂય માતલિ તં તુ આદિદેશ તતો દ્વિજ

એનં ગચ્છ મહાત્માનમુહ્યતાં સ્યંદનેન વૈ ।
સધ્વજેન મહાપ્રાજ્ઞમાયુજં સમરોદ્યતમ્

સ ચોવાચ સહસ્રાક્ષં કરિષ્યે તવશાસનમ્ ।
એવમુક્ત્વા જગામાશુ હ્યાયુપુત્રં રણોદ્યતમ્

રાજાનં પ્રત્યુવાચૈવ દેવરાજસ્ય ભાષિતમ્ ।
વિજયી ભવ ધર્મજ્ઞ રથેનાનેન સંગરે

ઇત્યુવાચ સહસ્રાક્ષસ્ત્વામેવ નૃપતીશ્વર ।
જહિ ત્વં દાનવં સંખ્યે તં હુંડં પાપચેતનમ્

સમાકર્ણ્ય સ રાજેંદ્ર સાનંદપુલકોદ્ગમઃ ।
પ્રસાદાદ્દેવદેવસ્ય વશિષ્ઠસ્ય મહાત્મનઃ

દાનવં સૂદયિષ્યામિ સમરે પાપચેતનમ્ ।
દેવાનાં ચ વિશેષેણ મમ માયાપચારિતમ્

એવમુક્તે મહાવાક્યે નહુષેણ મહાત્મના ।
અથાયાતઃ સ્વયં દેવઃ શંખચક્રગદાધરઃ

ચક્રાચ્ચક્રં સમુત્પાટ્ય સૂર્યબિંબોપમં મહત્ ।
જ્વલતા તેજસા દીપ્તં સુવૃત્તારં શુભાવહમ્

નહુષાય દદૌ દેવો હર્ષેણ મહતા કિલ ।
તસ્મૈ શૂલં દદૌ શંભુઃ સુતીક્ષ્ણં તેજસાન્વિતમ્

તેન શૂલવરેણાસૌ શોભતે સમરોદ્યતઃ ।
દ્વિતીયઃ શંકરશ્ચાસૌ ત્રિપુરઘ્નો યથા પ્રભુઃ

બ્રહ્માસ્ત્રં દત્તવાન્બ્રહ્મા વરુણઃ પાશમુત્તમમ્ ।
ચંદ્ર તેજઃપ્રતીકાશં શંખં ચ નાદમંગલમ્

વજ્રમિંદ્રસ્તથા શક્તિં વાયુશ્ચાપં સમાર્ગણમ્ ।
આગ્નેયાસ્ત્રં તથા વહ્નિર્દદૌ તસ્મૈ મહાત્મને

શસ્ત્રાણ્યસ્ત્રાણિ દિવ્યાનિ બહૂનિ વિવિધાનિ ચ ।
દદુર્દેવા મહાત્માનસ્તસ્મૈ રાજ્ઞે મહૌજસે

કુંજલ ઉવાચ-
અથ આયુસુતો વીરો દૈવતૈઃ પરિમાનિતઃ ।
આશીર્ભિર્નંદિતશ્ચાપિ મુનિભિસ્તત્ત્વવેદિભિઃ

આરુરોહ રથં દિવ્યં ભાસ્વરં રત્નમાલિનમ્ ।
ઘંટારવૈઃ પ્રણદંતં ક્ષુદ્રઘંટાસમાકુલમ્

રથેન તેન દિવ્યેન શુશુભે નૃપનદંનઃ ।
દિવિમાર્ગે યથા સૂર્યસ્તેજસા સ્વેન વૈ કિલ

પ્રતપંસ્તેજસા તદ્વદ્દૈત્યાનાં મસ્તકેષુ સઃ ।
જગામ શીઘ્રં વેગેન યથા વાયુઃ સદાગતિઃ

યત્રાસૌ દાનવઃ પાપસ્તિષ્ઠતે સ્વબલૈર્યુતઃ ।
તેન માતલિના સાર્દ્ધં વાહકેન મહાત્મના

ઇતિ શ્રીપદ્મપુરાણે ભૂમિખંડે વેનોપાખ્યાને ગુરુતીર્થમાહાત્મ્યે ચ્યવનચરિત્રે નહુષાખ્યાને દશાધિકશતતમોઽધ્યાયઃ