પદ્મ પુરાણ · અધ્યાય 2.104

કુંજલ ઉવાચ-
ગતે તસ્મિન્મહાભાગે દત્તાત્રેયે મહામુનૌ ।
આજગામ મહારાજ આયુશ્ચ સ્વપુરં પ્રતિ

ઇંદુમત્યા ગૃહં હૃષ્ટઃ પ્રવિવેશ શ્રિયાન્વિતમ્ ।
સર્વકામસમૃદ્ધાર્થમિંદ્રસ્ય સદનોપમમ્

રાજ્યં ચક્રે સ મેધાવી યથા સ્વર્ગે પુરંદરઃ ।
સ્વર્ભાનુસુતયા સાર્દ્ધમિંદુમત્યા દ્વિજોત્તમ

સા ચ ઇંદુમતી રાજ્ઞી ગર્ભમાપ ફલાશનાત્ ।
દત્તાત્રેયસ્ય વચનાદ્દિવ્યતેજઃ સમન્વિતમ્

ઇંદુમત્યા મહાભાગ સ્વપ્નં દૃષ્ટમનુત્તમમ્ ।
રાત્રૌ દિવાન્વિતં તાત બહુમંગલદાયકમ્

ગૃહાંતરે વિશંતં ચ પુરુષં સૂર્યસન્નિભમ્ ।
મુક્તામાલાન્વિતં વિપ્રં શ્વેતવસ્ત્રેણશોભિતમ્

શ્વેતપુષ્પકૃતામાલા તસ્ય કંઠે વિરાજતે ।
સર્વાભરણશોભાંગો દિવ્યગંધાનુલેપનઃ

ચતુર્ભુજઃ શંખપાણિર્ગદાચક્રાસિધારકઃ ।
છત્રેણ ધ્રિયમાણેન ચંદ્રબિંબાનુકારિણા

શોભમાનો મહાતેજા દિવ્યાભરણભૂષિતઃ ।
હારકંકણકેયૂર નૂપુરાભ્યાં વિરાજિતઃ

ચંદ્રબિંબાનુકારાભ્યાં કુંડલાભ્યાં વિરાજિતઃ ।
એવંવિધો મહાપ્રાજ્ઞો નરઃ કશ્ચિત્સમાગતઃ

ઇંદુમતીં સમાહૂય સ્નાપિતા પયસા તદા ।
શંખેન ક્ષીરપૂર્ણેન શશિવર્ણેન ભામિની

રત્નકાંચનબદ્ધેન સંપૂર્ણેન પુનઃ પુનઃ ।
શ્વેતં નાગં સુરૂપં ચ સહસ્રશિરસં વરમ્

મહામણિયુતં દીપ્તં ધામજ્વાલાસમાકુલમ્ ।
ક્ષિપ્તં તેન મુખપ્રાંતે દત્તં મુક્તાફલં પુનઃ

કંઠે તસ્યાઃ સ દેવેશ ઇંદુમત્યા મહાયશાઃ ।
પદ્મં હસ્તે તતો દત્વા સ્વસ્થાનં પ્રતિ જગ્મિવાન્

એવંવિધં મહાસ્વપ્નં તયા દૃષ્ટં સુતોત્તમમ્ ।
સમાચષ્ટ મહાભાગા આયું ભૂમિપતીશ્વરમ્

સમાકર્ણ્ય મહારાજશ્ચિંતયામાસ વૈ પુનઃ ।
સમાહૂય ગુરું પશ્ચાત્કથિતં સ્વપ્નમુત્તમમ્

શૌનકં સુમહાભાગં સર્વજ્ઞં જ્ઞાનિનાં વરમ્ ।
રાજોવાચ-
અદ્ય રાત્રૌ મહાભાગ મમ પત્ન્યા દ્વિજોત્તમ

વિપ્રો ગેહં વિશન્દૃષ્ટઃ કિમિદં સ્વપ્નકારણમ્ ।
શૌનક ઉવાચ-
વરો દત્તસ્તુ તે પૂર્વં દત્તાત્રેયેણ ધીમતા

આદિષ્ટં ચ ફલં રાજ્ઞાં સુગુણં સુતહેતવે ।
તત્ફલં કિં કૃતં રાજન્કસ્મૈ ત્વયા નિવેદિતમ્

સુભાર્યાયૈ મયા દત્તમિતિ રાજ્ઞોદિતં વચઃ ।
શ્રુત્વોવાચ મહાપ્રાજ્ઞઃ શૌનકો દ્વિજસત્તમઃ

દત્તાત્રેયપ્રસાદેન તવ ગેહે સુતોત્તમઃ ।
વૈષ્ણવાંશેન સંયુક્તો ભવિષ્યતિ ન સંશયઃ

સ્વપ્નસ્ય કારણં રાજન્નેતત્તે કથિતં મયા ।
ઇંદ્રોપેંદ્ર સમઃ પુત્રો દિવ્યવીર્યો ભવિષ્યતિ

પુત્રસ્તે સર્વધર્માત્મા સોમવંશસ્ય વર્દ્ધનઃ ।
ધનુર્વેદે ચ વેદે ચ સગુણોસૌ ભવિષ્યતિ

એવમુક્ત્વા સ રાજાનં શૌનકો ગતવાન્ગૃહમ્ ।
હર્ષેણ મહતાવિષ્ટો રાજાભૂત્પ્રિયયા સહ

ઇતિ શ્રીપદ્મપુરાણે ભૂમિખંડે વેનોપાખ્યાને ગુરુતીર્થમાહાત્મ્યે ચ્યવનચરિત્રે ચતુરધિકશતતમોઽધ્યાયઃ