પદ્મ પુરાણ · અધ્યાય 1.71

વ્યાસ ઉવાચ-
અથાન્યો નમુચિઃ ક્રુદ્ધઃ સ્યંદનસ્થો દિવૌકસઃ।
વિશિખૈરર્દયામસ ઘોરૈરાશીવિષોપમૈઃ

તતસ્તુ સંયુગે દેવાઃ સિદ્ધકિન્નરપન્નગાઃ।
ન શક્નુવંતિ બાણાનાં વેગં સોઢું સમંતતઃ

રથમુચ્ચૈશ્શ્રવોશ્વેન યુક્તં માતલિનેરિતમ્।
પુરુહૂતઃ સમાસ્થાય પ્રાગમત્તં મહાબલમ્

દૃષ્ટ્વા શક્રં મહાવીર્યં નમુચિર્દૈત્યપુંગવઃ।
અબ્રવીદ્વાસવં સંખ્યે વચનં સાનુગં તદા

પ્રાકૃતં નિર્જરં હત્વા ન યશોસ્તિ ન ચ પ્રિયમ્।
ન લાભકૃતકં વાપિ ન જયસ્તુ પુરષ્ટુત

તસ્માત્વયિ હતેત્રૈવ સર્વં ભવતિ શાશ્વતમ્।
દેવરાજ્યં પ્રલપ્સ્યામિ સુખં ભોગ્યં સુરાલયે

તમબ્રવીન્મહાતેજાઃ શક્રઃ પરપુરંજયઃ।
શૂરતા વાક્યમાત્રેણ સર્વત્ર સુલભા ભવેત્

મહાપરાક્રમં યદ્વા અસ્તિ તે દાનવાધમ।
દર્શયસ્વાહવે વીર્યં પુરં નેષ્યામિ ભાસ્કરેઃ

એતચ્છ્રુત્વા મહાતેજાશ્ચુકોપ દૈત્યપુંગવઃ।
પંચભિર્નિશિતૈર્બાણૈર્જઘાન સુરસત્તમમ્

તાંસ્તુ ચિચ્છેદ મઘવા ક્ષુરપ્રૈઃ પંચભિર્દ્રુતમ્।
જગ્મતુસ્તૌ મહાવીર્યૌ સમરે વિષયૈષિણૌ

અન્યોન્યં સહસા વેગાચ્છરૈશ્ચિચ્છિદતુઃ શરાન્।
બિભિદાતેથ ગાત્રાણિ વિશિખૈર્ભિદુરોપમૈઃ

અત્યપૂર્વં કૃતં કર્મ તાભ્યામેવ રણે ભૃશમ્।
લાઘવં શરસંધાન ગ્રહમોક્ષં સુદુર્લભમ્

દૃષ્ટ્વા તુ વિસ્મયં જગ્મુર્દેવાસુરગણાસ્તદા।
એતસ્મિન્નંતરે દૈત્યો માયાસ્સંપ્રમુમોચ હ

વિશિખાઃ શતશસ્તત્ર વિનિશ્ચેરુસ્સમંતતઃ।
શક્રઃ કોપાત્પુનઃ શીઘ્રં ધનુરુદ્યમ્ય વીર્યવાન્

જઘાન વિશિખૈરુગ્રૈઃ સર્વગાત્રેષુ સંજ્વલન્।
તતો માર્ગણસાહસ્રૈરષ્ટભિસ્ત્વધિકં તથા

બિભિદાતે તતોન્યોન્યં ચિચ્છિદાતે પરસ્પરમ્।
શરૈર્નિરંતરાકાશં દદૃશુસ્તત્ર સંયુગે

નિપતંતિ ધરાપૃષ્ઠે ખડ્ગપાતૈઃ સહસ્રશઃ।
એવં સુદીર્ઘકાલે તુ ગતે તસ્મિન્મહાહવે

માયાસ્ત્રં દર્શયામાસ ક્રૂરકૃન્નમુચિસ્તદા।
તામસં ત્રિષુલોકેષુ કૃતં સ્યાત્તુ નિરંતરમ્

પરસ્પરં ન પશ્યંતિ દેવાસુરગણા ભૃશમ્।
સૂર્યચંદ્રગ્રહાણાં ચ વહ્નીનાં ચ દિવૌકસામ્

તસ્મિંસ્તમસિ દુષ્પારે ગભસ્તિર્નૈવ દૃશ્યતે।
દૈત્યસ્ય ચ તતસ્તૂર્ણં શરૈરગ્નિશિખોપમૈઃ

વિભગ્નાઃ સર્વદેવાશ્ચ શક્રશ્ચરણસંમુખે।
શરૈર્વિભિન્નદેહાસ્તુ નિપેતુર્ધરણીતલે

પ્રભગ્નાશ્ચાપરે શૂરાસ્સંયાંતિ ચ દિશો દશ।
કૂટં તસ્ય પરિજ્ઞાય સર્વદેવાર્ચિતો હરિઃ

સૌમ્યમસ્ત્રં મુમોચાથ દિવિ સૂર્યશતપ્રભમ્।
વિલંબિતં સમાલોક્ય શક્ત્યા ચ બહુઘંટયા

જઘાનોરસિ દૈત્યસ્ય સ પપાત વ્યથાન્વિતઃ।
ચિરાત્સંલભ્ય સંજ્ઞાં ચ દૈતેયઃ ક્રોધમૂર્ચ્છિતઃ

ગત્વા વેગાત્સુરશ્રેષ્ઠમૈરાવતં દધાર હ।
ત્રાસયામાસ સુતરામિંદ્રસ્ય દ્વિરદં રુષા

ધૃત્વા સ તુ ગજં સેંદ્રં મુમોચ ધરણીતલે।
તતો ભૂમિગતઃ શક્રઃ કશ્મલં ચ ક્ષણં ગતઃ

અવપ્લુત્ય સ દૈત્યેંદ્રો ગજદંતાંતરસ્થિતઃ।
શક્રં ગ્રહીતુકામસ્ય વધાર્થં યૂથપસ્ય સઃ

અસિનાઽસુરમુખ્યસ્ય શિરશ્છિત્વા ન્યપાતયત્।
સર્વે પ્રજહૃષુર્દેવા ગંધર્વા લલિતં જગુઃ।
મુદિતાસ્તે ચ મુનયઃ સ્તુવંતિ સુરસત્તમમ્

ઇતિ શ્રીપાદ્મપુરાણે પ્રથમે સૃષ્ટિખંડે દ્વિતીય નમુચિવધોનામૈકસપ્તતિતમોઽધ્યાયઃ