Padma Purana · Chapter 1.71

vyāsa uvāca-
athānyo namuciḥ kruddhaḥ syaṃdanastho divaukasaḥ/
viśikhairardayāmasa ghorairāśīviṣopamaiḥ

tatastu saṃyuge devāḥ siddhakinnarapannagāḥ/
na śaknuvaṃti bāṇānāṃ vegaṃ soḍhuṃ samaṃtataḥ

rathamuccaiśśravośvena yuktaṃ mātalineritam/
puruhūtaḥ samāsthāya prāgamattaṃ mahābalam

dṛṣṭvā śakraṃ mahāvīryaṃ namucirdaityapuṃgavaḥ/
abravīdvāsavaṃ saṃkhye vacanaṃ sānugaṃ tadā

prākṛtaṃ nirjaraṃ hatvā na yaśosti na ca priyam/
na lābhakṛtakaṃ vāpi na jayastu puraṣṭuta

tasmātvayi hatetraiva sarvaṃ bhavati śāśvatam/
devarājyaṃ pralapsyāmi sukhaṃ bhogyaṃ surālaye

tamabravīnmahātejāḥ śakraḥ parapuraṃjayaḥ/
śūratā vākyamātreṇa sarvatra sulabhā bhavet

mahāparākramaṃ yadvā asti te dānavādhama/
darśayasvāhave vīryaṃ puraṃ neṣyāmi bhāskareḥ

etacchrutvā mahātejāścukopa daityapuṃgavaḥ/
paṃcabhirniśitairbāṇairjaghāna surasattamam

tāṃstu ciccheda maghavā kṣurapraiḥ paṃcabhirdrutam/
jagmatustau mahāvīryau samare viṣayaiṣiṇau

anyonyaṃ sahasā vegāccharaiścicchidatuḥ śarān/
bibhidātetha gātrāṇi viśikhairbhiduropamaiḥ

atyapūrvaṃ kṛtaṃ karma tābhyāmeva raṇe bhṛśam/
lāghavaṃ śarasaṃdhāna grahamokṣaṃ sudurlabham

dṛṣṭvā tu vismayaṃ jagmurdevāsuragaṇāstadā/
etasminnaṃtare daityo māyāssaṃpramumoca ha

viśikhāḥ śataśastatra viniścerussamaṃtataḥ/
śakraḥ kopātpunaḥ śīghraṃ dhanurudyamya vīryavān

jaghāna viśikhairugraiḥ sarvagātreṣu saṃjvalan/
tato mārgaṇasāhasrairaṣṭabhistvadhikaṃ tathā

bibhidāte tatonyonyaṃ cicchidāte parasparam/
śarairniraṃtarākāśaṃ dadṛśustatra saṃyuge

nipataṃti dharāpṛṣṭhe khaḍgapātaiḥ sahasraśaḥ/
evaṃ sudīrghakāle tu gate tasminmahāhave

māyāstraṃ darśayāmāsa krūrakṛnnamucistadā/
tāmasaṃ triṣulokeṣu kṛtaṃ syāttu niraṃtaram

parasparaṃ na paśyaṃti devāsuragaṇā bhṛśam/
sūryacaṃdragrahāṇāṃ ca vahnīnāṃ ca divaukasām

tasmiṃstamasi duṣpāre gabhastirnaiva dṛśyate/
daityasya ca tatastūrṇaṃ śarairagniśikhopamaiḥ

vibhagnāḥ sarvadevāśca śakraścaraṇasaṃmukhe/
śarairvibhinnadehāstu nipeturdharaṇītale

prabhagnāścāpare śūrāssaṃyāṃti ca diśo daśa/
kūṭaṃ tasya parijñāya sarvadevārcito hariḥ

saumyamastraṃ mumocātha divi sūryaśataprabham/
vilaṃbitaṃ samālokya śaktyā ca bahughaṃṭayā

jaghānorasi daityasya sa papāta vyathānvitaḥ/
cirātsaṃlabhya saṃjñāṃ ca daiteyaḥ krodhamūrcchitaḥ

gatvā vegātsuraśreṣṭhamairāvataṃ dadhāra ha/
trāsayāmāsa sutarāmiṃdrasya dviradaṃ ruṣā

dhṛtvā sa tu gajaṃ seṃdraṃ mumoca dharaṇītale/
tato bhūmigataḥ śakraḥ kaśmalaṃ ca kṣaṇaṃ gataḥ

avaplutya sa daityeṃdro gajadaṃtāṃtarasthitaḥ/
śakraṃ grahītukāmasya vadhārthaṃ yūthapasya saḥ

asinā'suramukhyasya śiraśchitvā nyapātayat/
sarve prajahṛṣurdevā gaṃdharvā lalitaṃ jaguḥ/
muditāste ca munayaḥ stuvaṃti surasattamam

iti śrīpādmapurāṇe prathame sṛṣṭikhaṃḍe dvitīya namucivadhonāmaikasaptatitamo'dhyāyaḥ