પદ્મ પુરાણ · અધ્યાય 1.70

વ્યાસ ઉવાચ-
તતો દેવાંતકો દૈત્યો વ્યનદત્સમરં પ્રતિ।
રણં ચકાર ધર્મેણ સંદષ્ટૌષ્ઠપુટો બલી

સ ગત્વા ચાબ્રવીદ્વાક્યં સર્વલોકવિગર્હિતં।
ન જાનાસિ મહદ્ધર્મં દુષ્ટ મોહાદ્યથાક્રમમ્

પાપપુણ્યપ્રયોગેણ નિગ્રહાનુગ્રહે પ્રભુઃ।
અહં ચ નિર્મિતો ધાત્રા કરોમિ તવ શાસનમ્

ન જાનાસિ યતો ધર્મં કાલમૃત્યુ પુરઃસરઃ।
ન રોગો ન જરા કાલો ન મૃત્યુર્ન ચ કિંકરઃ

ધર્માત્પ્રચલિતઃ કર્મી કષ્ટં યાતિ દિવાનિશમ્।
ઉક્તં વસું મહાવીર્યં યમં ધર્મૈકસાક્ષિકમ્

સ જઘાન ત્રિભિર્બાણૈઃ કાલમૃત્યુસમપ્રભૈઃ।
પ્રચિચ્છેદ સ ધર્માત્મા તે ત્વન્યૈર્વિશિખૈસ્ત્રિભિઃ

તતસ્તૂચ્ચૈઃ શરૈઃ પ્રાજ્યૈર્યુગાંતાનલસપ્રભૈઃ।
નિજઘાન યમં સંખ્યે સ ચિચ્છેદ શરૈઃ શરાન્

એતસ્મિન્નંતરે ક્રુદ્ધૌ પરસ્પરજયૈષિણૌ।
જઘ્નતુઃ સમરેન્યોન્યં મહાબલપરાક્રમૌ

અહોરાત્રં તયોર્યુદ્ધમવર્ત્તત સુદારુણમ્।
એતસ્મિન્નન્તરે ક્રુદ્ધઃ શક્ત્યા પ્રશમનં રુષા

બિભેદ દૈત્યશાર્દૂલો હ્યહંકારયુતો બલી।
તામેવાથ રુષા ધર્મો ગૃહીત્વા શક્તિકાં દ્રુતં

નિજઘાન તયૈવામુંસ્તનયોરંતરે ભૃશમ્।
સ વિહ્વલિત સર્વાંગો મુખાદાગતશોણિતઃ

તતઃ ક્રુદ્ધો મહાતેજા ધૃત્વા દંડં સુદારુણમ્।
અમોઘં પાતયામાસ તસ્ય દૈત્યસ્ય વિગ્રહે

સાશ્વં રથં તથા સૂતં યોદ્ધારં શસ્ત્રસંચયમ્।
ચકાર ભસ્મસાત્તં ચ શમનઃ ક્રોધમૂર્ચ્છિતઃ

પતિતે ચ તથા દૈત્યે દુર્ધર્ષો નામ દાનવઃ।
શમનં શૂલહસ્તસ્તુ પ્રદુદ્રાવ જિઘાંસયા

શૂલહસ્તં સમાયાંતં બડવાનલસન્નિભમ્।
આસસાદ રણે મૃત્યુઃ શક્તિહસ્તોતિનિર્ભયઃ

સ ચ દૃષ્ટ્વાઽસુરો મૃત્યું શૂલેનૈવ જઘાન હ।
શક્તિં ચૈવ તતો મૃત્યુઃ પ્રચિક્ષેપ રણાજિરે

સંદહ્ય સહસા શૂલં વહ્નિકૂટસમપ્રભમ્।
દૈત્યસ્ય હૃદયં ભિત્વા ગતા સા ચ ધરાતલમ્

સરથઃ સ પપાતોર્વ્યાં શક્તિજર્જરવિગ્રહઃ।
અથાન્યો દુર્મુખો મૃત્યું કૃષ્ટચાપો મહાબલઃ

ખડ્ગચર્મધરઃ કાલો રથ એવ ગતોભવત્।
દૃષ્ટ્વા તં વિશિખૈઃ પ્રાજ્યૈર્જઘાન સ યમં રણે

સ ચાપ્લત્ય રથાદ્દેવો હ્યસિના ચ સકુંડલમ્।
શિરશ્ચિચ્છેદ સહસા પાતયિત્વા ચ ભૂતલે

હતશેષં બલં સર્વં પ્રદુદ્રાવ દિશો દશ

ઇતિ શ્રીપાદ્મપુરાણે પ્રથમે સૃષ્ટિખંડે દેવાંતકર્દુર્ધર્ષદુર્મુખવધોનામ સપ્તતિમોઽધ્યાયઃ