પદ્મ પુરાણ · અધ્યાય 1.69

વ્યાસ ઉવાચ-
તારેયો બલસંપન્નઃ શક્રતુલ્યપરાક્રમઃ।
જઘાન વિશિખૈસ્સ્કન્દં પિતૃઘાતિનમાહવે

તતસ્સ્કન્દો મહાબાહુર્હરિતુલ્યપરાક્રમઃ।
વિચકર્ત શરાંસ્તાંસ્તાન્નિર્બિભેદ શરોત્તમૈઃ

સ દૈત્યસ્સહસા સ્કંદં છાદયામાસ માર્ગણૈઃ।
અસંભ્રાન્તઃ પ્રચિચ્છેદ વિશાખો વિશિખૈસ્તદા

તારેયોગ્નિશરૈઃ સ્કંદં જઘાન રણમૂર્ધનિ।
વિશિખં ભિદુરપ્રખ્યં ચખાન હરનંદને

વૈશ્વાનરેણ સેનાનીસ્તત્ર સંપર્યવારયત્।
રૌદ્રમસ્ત્રં પુનર્દૈત્યઃ પ્રેષયામાસ તં પ્રતિ

તન્નિરસ્તં કૃતં તેન બાણેનાસ્ફાલિતેન ચ।
અઘોરં પ્રાક્ષિપદ્દૈત્યો ઘોરરૂપં સુદારુણં

ભૂધરા વિટપાસ્સિંહાસ્તથા સર્પાદયઃ શરાઃ।
ધાવંતિ પાર્વતીપુત્રં કોટિકોટિસહસ્રશઃ

છિત્વા તાંસ્તુશરાન્સ્કંદો બિભેદ દૈત્યપુંગવં।
આપાદં શીર્ષપર્યંતં શરૈરગ્ન્યર્કસન્નિભૈઃ

સ્વર્ણપુંખાઃ શરા લગ્ના દેહે દૈત્યપતેર્ભૃશં।
રેજુસ્તે સ્વર્ણશકલા યથા કૃષ્ણશિલોચ્ચયે

તસ્ય દેહાત્તતશ્ચૈવ બહુ સુસ્રાવ શોણિતં।
યથા ચ માધવે માસિ પુરુપુષ્પશ્શમી તરુઃ

સ્યંદનાધશ્ચરાશ્વાશ્ચ શિશ્યિરે ભૂમિલગ્નકાઃ।
અથ ક્રુદ્ધો મહાદૈત્યઃ શૂલં ભીમં ચ દારુણં

ધૃત્વા તં પ્રતિચિક્ષેપ કાલમૃત્યુસમપ્રભં।
પાર્વતીનંદનેનાપિ શૂલં પાશુપતેન હ

ક્ષિપ્તં તેન કૃતં દગ્ધં મુહૂર્તેન રણાજિરે।
પુનઃ શક્તિં મુમોચાથ બ્રહ્મદત્તાન્તુ દાનવઃ

શૂલં પ્રતિજઘાનાથ શતકૂટસમપ્રભમ્।
તતોઽસ્ત્રે વજ્રસંકાશે જઘટાતે વિયત્યપિ

તયોસ્સવીર્યયોરસ્ત્રે ધરણ્યાં પ્રણિપેતતુઃ।
તતો દૈત્યપતિઃ સ્કંદં શરૈરગ્નિશિખોપમૈઃ

અર્દયામાસ સહસા ઘનધારેવ પર્વતં।
તાંસ્તુ ચ્છિત્વા મહાબાહુઃ સેનાનીશ્ચાપમસ્ય વૈ

વિચકર્તાર્ધચંદ્રેણ તથા યંતુઃ શિરોમહત્।
તથાશ્વાન્બહુભિર્બાણૈઃ પાતયામાસ ભૂતલે

ગૃહીત્વા મુસલં વેગાત્સ દુદ્રાવ સ્થલે ગુહં।
જઘાન તેન દૈત્યેન્દ્રઃ શિખિનં શિખિવાહનં

તતો મોહં ગતો બર્હી પ્રચકંપે મુહુર્મુહુઃ।
તતઃ સ્કંદઃ પુનસ્તં ચ જઘાનાસુરપુંગવં

પ્રચિચ્છેદાસિના વેગાન્મુસલં ચાતિદારુણં।
તારેયઃ શક્તિમાદાય જઘાન ક્રૌંચદારણમ્

સોપિ શક્તિં મુમોચાથ અમોઘાં દુષ્ટઘાતિનીમ્।
તતઃ સંદહ્ય સા શક્તિર્વિશ્વપ્રલયકારિણી

યમદંડસમાનં ચ ભિત્વા પુનર્ગુહં ગતા।
સ ગતાસુઃ પપાતોર્વ્યાં ચાલયંશ્ચ વસુંધરાં

પુષ્પધૂપાદિભિઃ સ્કંદઃ સર્વદેવૈઃ પ્રપૂજિતઃ

ઇતિ શ્રીપાદ્મપુરાણે પ્રથમે સૃષ્ટિખંડે તારેયવધોનામૈકોનસપ્તતિતમોઽધ્યાયઃ