પદ્મ પુરાણ · અધ્યાય 1.68

વ્યાસ ઉવાચ-
બલં ચ નિહતં દૃષ્ટ્વા નમુચિં ચ સ્વકાગ્રજમ્।
મુચિસ્તત્રાબ્રવીદ્વાક્યં જ્યેષ્ઠો મે સૂદિતસ્ત્વયા

પરોક્ષેણાધુના ત્વાં ચ શરૈર્નેષ્યામિ ભાસ્કરિમ્।
તમબ્રવીન્મહાતેજાઃ શક્રઃ સર્વસુરાર્ચિતઃ

ભ્રાતુસ્તે ધર્મપંથાનમિદાનીં લપ્સ્યસે ધ્રુવમ્।
વહ્નેરુષ્ણમવિજ્ઞાય પ્રમોહાચ્છલભા યથા

સહસા પ્રવિશંત્યગ્નિં તથા માં યોદ્ધુમિચ્છસિ।
એવં બ્રુવાણમિન્દ્રં ચ જઘાન વિશિખૈસ્ત્રિભિઃ

સ ચિચ્છેદ ત્રિભિર્બાણૈઃ શક્રઃ પરપુરંજયઃ।
તતો જઘાન દશભિરિંદ્રમૈરાવણં ત્રિભિઃ

સપ્તભિર્માતલિં છિત્વા નાદૈરુચ્ચૈર્નનાદ હ।
શક્રં પ્રતિ પુનર્દૈત્યો ભ્રામયામાસ સંભ્રમાત્

આયસીં તાં ગદાં કોપાન્મહાબલપરાક્રમઃ।
તતસ્તુ લાઘવાચ્છક્રો જઘાન કુલિશેન હિ

ભિદુરસ્યાવપાતેન ગતાસુર્નિપપાત હ।
દનુજસ્ય પ્રપાતેન સંચચાલ વસુંધરા

દેવાઃ પ્રચક્રુર્નૃત્યાનિ દાનવા વિપ્રદુદ્રુવુઃ

ઇતિ શ્રીપાદ્મપુરાણે પ્રથમે સૃષ્ટિખંડે મુચિવધોનામાષ્ટષષ્ટિતમોઽધ્યાયઃ