Padma Purana · Chapter 1.69

vyāsa uvāca-
tāreyo balasaṃpannaḥ śakratulyaparākramaḥ/
jaghāna viśikhaisskandaṃ pitṛghātinamāhave

tatasskando mahābāhurharitulyaparākramaḥ/
vicakarta śarāṃstāṃstānnirbibheda śarottamaiḥ

sa daityassahasā skaṃdaṃ chādayāmāsa mārgaṇaiḥ/
asaṃbhrāntaḥ praciccheda viśākho viśikhaistadā

tāreyogniśaraiḥ skaṃdaṃ jaghāna raṇamūrdhani/
viśikhaṃ bhiduraprakhyaṃ cakhāna haranaṃdane

vaiśvānareṇa senānīstatra saṃparyavārayat/
raudramastraṃ punardaityaḥ preṣayāmāsa taṃ prati

tannirastaṃ kṛtaṃ tena bāṇenāsphālitena ca/
aghoraṃ prākṣipaddaityo ghorarūpaṃ sudāruṇaṃ

bhūdharā viṭapāssiṃhāstathā sarpādayaḥ śarāḥ/
dhāvaṃti pārvatīputraṃ koṭikoṭisahasraśaḥ

chitvā tāṃstuśarānskaṃdo bibheda daityapuṃgavaṃ/
āpādaṃ śīrṣaparyaṃtaṃ śarairagnyarkasannibhaiḥ

svarṇapuṃkhāḥ śarā lagnā dehe daityapaterbhṛśaṃ/
rejuste svarṇaśakalā yathā kṛṣṇaśiloccaye

tasya dehāttataścaiva bahu susrāva śoṇitaṃ/
yathā ca mādhave māsi purupuṣpaśśamī taruḥ

syaṃdanādhaścarāśvāśca śiśyire bhūmilagnakāḥ/
atha kruddho mahādaityaḥ śūlaṃ bhīmaṃ ca dāruṇaṃ

dhṛtvā taṃ praticikṣepa kālamṛtyusamaprabhaṃ/
pārvatīnaṃdanenāpi śūlaṃ pāśupatena ha

kṣiptaṃ tena kṛtaṃ dagdhaṃ muhūrtena raṇājire/
punaḥ śaktiṃ mumocātha brahmadattāntu dānavaḥ

śūlaṃ pratijaghānātha śatakūṭasamaprabham/
tato'stre vajrasaṃkāśe jaghaṭāte viyatyapi

tayossavīryayorastre dharaṇyāṃ praṇipetatuḥ/
tato daityapatiḥ skaṃdaṃ śarairagniśikhopamaiḥ

ardayāmāsa sahasā ghanadhāreva parvataṃ/
tāṃstu cchitvā mahābāhuḥ senānīścāpamasya vai

vicakartārdhacaṃdreṇa tathā yaṃtuḥ śiromahat/
tathāśvānbahubhirbāṇaiḥ pātayāmāsa bhūtale

gṛhītvā musalaṃ vegātsa dudrāva sthale guhaṃ/
jaghāna tena daityendraḥ śikhinaṃ śikhivāhanaṃ

tato mohaṃ gato barhī pracakaṃpe muhurmuhuḥ/
tataḥ skaṃdaḥ punastaṃ ca jaghānāsurapuṃgavaṃ

pracicchedāsinā vegānmusalaṃ cātidāruṇaṃ/
tāreyaḥ śaktimādāya jaghāna krauṃcadāraṇam

sopi śaktiṃ mumocātha amoghāṃ duṣṭaghātinīm/
tataḥ saṃdahya sā śaktirviśvapralayakāriṇī

yamadaṃḍasamānaṃ ca bhitvā punarguhaṃ gatā/
sa gatāsuḥ papātorvyāṃ cālayaṃśca vasuṃdharāṃ

puṣpadhūpādibhiḥ skaṃdaḥ sarvadevaiḥ prapūjitaḥ

iti śrīpādmapurāṇe prathame sṛṣṭikhaṃḍe tāreyavadhonāmaikonasaptatitamo'dhyāyaḥ