પદ્મ પુરાણ · અધ્યાય 1.64

વ્યાસ ઉવાચ-
પુનરન્યત્પ્રવક્ષ્યામિ સ્તોત્રં ગણાધિપસ્ય ચ।
સર્વસિદ્ધિકરં પૂતં સર્વાભીષ્ટફલપ્રદં

એકદંતં મહાકાયં તપ્તકાંચનસન્નિભમ્।
લંબોદરં વિશાલાક્ષં વંદેહં ગણનાયકં

મુંજકૃષ્ણાજિનધરં નાગયજ્ઞોપવીતકમ્।
બાલેંદુકલિકામૌલિં વંદેહં ગણનાયકં

સર્વવિઘ્નહરં દેવં સર્વવિઘ્નવિવર્જિતમ્।
મૂષકોત્તમમારુહ્ય દેવાસુરમહાહવે

યોદ્ધુકામં મહાબાહું વંદેહં ગણનાયકમ્।
અંબિકાહૃદયાનંદં માતૃકાપરિવેષ્ટિતમ્

ભક્તિપ્રિયં મદોન્મત્તં વંદેહં ગણનાયકમ્।
ચિત્રરત્નવિચિત્રાંગં ચિત્રમાલાવિભૂષણમ્

કામરૂપધરં દેવં વંદેહં ગણનાયકમ્।
ગજવક્ત્રં સુરશ્રેષ્ઠં ચારુકર્ણવિભૂષિતમ્

પાશાંકુશધરં દેવં વંદેહં ગણનાયકમ્।
યક્ષકિન્નરગંધર્વૈઃ સિદ્ધવિદ્યાધરૈસ્સદા

સ્તૂયમાનં મહાદેહં વંદેહં ગણનાયકમ્।
ગણાષ્ટકમિદં પુણ્યં ભક્તિતો યઃ પઠેન્નરઃ

સર્વસિદ્ધિમવાપ્નોતિ રુદ્રલોકે મહીયતે।
ન નિઃસ્વતાં તથાભ્યેતિ સપ્તજન્મસુ માનવઃ

ય ઇદં પઠતે નિત્યં મહારાજો ભવેન્નરઃ।
વશ્યં કરોતિ ત્રૈલોક્યં પઠનાચ્છ્રવણાદપિ।
સ્તોત્રં પરં મહાપુણ્યં ગણપસ્ય મહાત્મનઃ

ઇતિ શ્રીપાદ્મપુરાણે પ્રથમે સૃષ્ટિખંડે ગણપતિસ્તોત્રં નામ-ચતુષ્ષષ્ટિતમોઽધ્યાયઃ