પદ્મ પુરાણ · અધ્યાય 1.63

પુલસ્ત્ય ઉવાચ-
એતસ્મિન્નંતરે પૂર્વં વ્યાસશિષ્યો મહામુનિઃ।
નમસ્કૃત્ય ગુરું ભીષ્મ સંજયઃ પરિપૃચ્છતિ

દેવાનાં પૂજનોપાયં ક્રમં બ્રૂહિ સુનિશ્ચિતમ્।
અગ્રે પૂજ્યતમઃ કોસૌ કો મધ્યો નિત્યપૂજને

અંતે ચ પૂજા કસ્યૈવ કસ્ય કો વા પ્રભાવકઃ।
કિંવા કં ચ ફલં બ્રહ્મન્પૂજયિત્વા લભેન્નરઃ

વ્યાસ ઉવાચ-
ગણેશં પૂજયેદગ્રે ત્વવિઘ્નાર્થં પરે ત્વિહ।
વિનાયકત્વમાપ્નોતિ યથા ગૌરીસુતો હિ સઃ

પાર્વત્યજનયત્પૂર્વં સુતૌ મહેશ્વરાદિમૌ।
સર્વલોકધરૌ શૂરૌ દેવૌ સ્કંદગણાધિપૌ

તૌ ચ દૃષ્ટ્વા નગસુતા સિધ્યર્થં પર્યભાષત।
ઇદં તુ મોદકં પુત્રૌ દેવૈર્દત્તં મુદાન્વિતૈઃ

મહાબુદ્ધીતિ વિખ્યાતં સુધયા પરિનિર્મિતમ્।
ગુણં ચાસ્ય પ્રવક્ષ્યામિ શૃણુતં તુ સમાહિતૌ

અસ્યૈવાઘ્રાણમાત્રેણ અમરત્વં લભેદ્ધ્રુવમ્।
સર્વશાસ્ત્રાર્થતત્ત્વજ્ઞઃ સર્વશસ્ત્રાસ્ત્રકોવિદઃ

નિપુણઃ સર્વતંત્રેષુ લેખકશ્ચિત્રકૃત્સુધીઃ।
જ્ઞાનવિજ્ઞાનતત્ત્વજ્ઞઃ સર્વજ્ઞો નાત્ર સંશયઃ

પુત્રૌ ધર્માદધિકતાં પ્રાપ્ય સિદ્ધિશતં વ્રજેત્।
યસ્તસ્ય વૈ પ્રદાસ્યામિ પિતુસ્તે સંમતં ત્વિદમ્

શ્રુત્વા માતૃમુખાદેવં વચઃ પરમકોવિદઃ।
સ્કંદસ્તીર્થં યયૌ સદ્યઃ સર્વં ત્રિભુવનસ્થિતં

બર્હિણં સ્વં સમારુહ્ય ત્વભિષેકઃ કૃતઃ ક્ષણાત્।
પિતરૌ પ્રદક્ષિણં કૃત્વા લંબોદરધરસ્સુધીઃ

તત એવ મુદાયુક્તઃ પિત્રોરેવાગ્રત સ્થિતઃ।
પુરતશ્ચ તથા સ્કંદો મે દેહીતિ બ્રુવન્સ્થિતઃ

તતસ્તુ તૌ સમીક્ષ્યાથ પાર્વતી વિસ્મિતાબ્રવીત્।
સર્વતીર્થાભિષેકૈસ્તુ સર્વદેવૈર્ન તૈસ્તથા

સર્વયજ્ઞવ્રતૈર્મંત્રૈર્યોગૈરન્યૈર્યમૈસ્તથા।
પિત્રોરર્ચાકૃતઃ કોપિ કલાં નાર્હતિ ષોડશીમ્

તસ્માત્સુતશતાદેષોઽધિકઃ શતગુણૈરપિ।
અતો દદામિ હેરમ્બે મોદકં દેવનિર્મિતમ્

અસ્યૈવ કારણાદસ્ય અગ્રે પૂજા મખેષુ ચ।
વેદશાસ્ત્રસ્તવાદૌ ચ નિત્યં પૂજાવિધાસુ ચ

પાર્વત્યા સહ ભૂતેશો દદૌ તસ્મૈ વરં મહત્।
અસ્યૈવ પૂજનાદગ્રે દેવાસ્તુષ્ટા ભવંતુ ચ

સર્વાસામપિ દેવીનાં પિતૄણાં ચ સમંતતઃ।
તપો ભવતુ નિત્યં ચ પૂજિતેઽગ્રે ગણેશ્વરે

તતઃ સર્વેષુ યજ્ઞેષુ પૂજયેદ્ગણપં દ્વિજઃ।
કોટિકોટિગુણં તેષુ દેવદેવી વચો યથા

દત્વા સર્વગુણં પુણ્યં દેવદેવ્યા તથા મુદા।
કૃતં ગણાધિપત્યં ચ સર્વદેવાગ્રતસ્તદા

તસ્માત્પ્રાજ્યેષુ યજ્ઞેષુ સ્તોત્રેષુ નિત્યપૂજને।
ગણેશં પૂજયિત્વા તુ સર્વસિદ્ધિં લભેન્નરઃ

એવં જ્ઞાત્વા તુ દેવૈસ્તુ દયિતપ્રાપ્તિ કામ્યયા।
પૂજિતશ્ચાથસર્વૈસ્તુ સ્વર્ગમોક્ષાર્થતો ધ્રુવમ્

નક્તાહારશ્ચતુર્થ્યાં તુ પૂજયિત્વા ગણાધિપં।
લિંગે વા પ્રતિમા ચિત્રે દેવઃ પૂજ્યો ભવેદ્યદિ

ગણાધિપ નમસ્તુભ્યં સર્વવિઘ્નપ્રશાંતિદ।
ઉમાનંદપ્રદ પ્રાજ્ઞ ત્રાહિ માં ભવસાગરાત્

હરાનંદકરધ્યાન જ્ઞાનવિજ્ઞાનદ પ્રભો।
વિઘ્નરાજ નમસ્તુભ્યં પ્રસન્નો ભવ સર્વદા

કૃતોપવાસો ગણપં પૂજયેદ્યો નરો મુદા।
સર્વપાપવિનિર્મુક્તઃ સુરલોકે મહીયતે

સ્તોત્રં તસ્ય પ્રવક્ષ્યામિ નામદ્વાદશકં શુભં।
ૐનમો ગણપતયે મંત્ર એષ ઉદાહૃતઃ

ગણપતિર્વિઘ્નરાજો લંબતુંડો ગજાનનઃ।
દ્વૈમાતુરશ્ચ હેરમ્બ એકદંતો ગણાધિપઃ

વિનાયકશ્ચારુકર્ણઃ પશુપાલો ભવાત્મજઃ।
દ્વાદશૈતાનિ નામાનિ પ્રાતરુત્થાય યઃ પઠેત્

વિશ્વં તસ્ય ભવેદ્વશ્યં ન ચ વિઘ્નં ભવેત્ક્વચિત્।
મહાપ્રેતાશ્શમં યાંતિ પીડ્યતે વ્યાધિભિર્ન ચ।
સર્વપાપાદ્વિનિર્મુક્તો હ્યક્ષયં સ્વર્ગમશ્નુતે

ઇતિ શ્રીપાદ્મપુરાણે પ્રથમે સૃષ્ટિખંડે ગણપતિસ્તોત્રં નામ।
ત્રિષષ્ટિતમોઽધ્યાયઃ