પદ્મ પુરાણ · અધ્યાય 1.36

પુલસ્ત્ય ઉવાચ।
તતો દેવાઃ પ્રયાતાસ્તે વિમાનૈર્બહુભિસ્તદા।
રામોપ્યનુજગામાશુ કુંભયોનેસ્તપોવનમ્

ઉક્તં ભગવતા તેન ભૂયોપ્યાગમનં ક્રિયાઃ।
પૂર્વમેવ સભાયાં ચ યો માં દ્રષ્ટું સમાગતઃ

તદહં દેવતાદેશાત્તત્કાર્યાર્થે મહામુનિં।
પશ્યામિ તં મુનિં ગત્વા દેવદાનવપૂજિતમ્

ઉપદેશં ચ મે તુષ્ટઃ સ્વયં દાસ્યતિ સત્તમઃ।
દુઃખી યેન પુનર્મર્ત્યે ન ભવામિ કદાચન

પિતા દશરથો મહ્યં કૌસલ્યા જનની તથા।
સૂર્યવંશે સમુત્પન્નસ્તથાપ્યેવં સુદુઃખિતઃ

રાજ્યકાલે વને વાસો ભાર્યયા ચાનુજેન ચ।
હરણં ચાપિ ભાર્યાયા રાવણેન કૃતં મમ

અસહાયેન તુ મયા તીર્ત્વા સાગરમુત્તમમ્।
રુદ્ધ્વા તુ તાં પુરીં સર્વાં કૃત્વા તસ્ય કુલક્ષયમ્

દૃષ્ટા સીતા મયા ત્યક્તા દેવાનાં તુ પુરસ્તદા।
શુદ્ધાં તાં માં તથોચુસ્તે મયા સીતા તથા ગૃહમ્

સમાનીતા પ્રીતિમતા લોકવાક્યાદ્વિસર્જિતા।
વને વસતિ સા દેવી પુરે ચાહં વસામિ વૈ

જાતોહમુત્તમે વંશે ઉત્તમોહં ધનુષ્મતામ્।
ઉત્તમં દુઃખમાપન્નો હૃદયં નૈવ ભિદ્યતે

વજ્રસારસ્ય સારેણ ધાત્રાહં નિર્મિતો ધ્રુવમ્।
ઇદાનીં બ્રાહ્મણાદેશાદ્ભ્રમામિ ધરણીતલે

તપઃ સ્થિતસ્તુ શૂદ્રોસૌ મયા પાપો નિપાતિતઃ।
દેવવાક્યાત્તુ મે ભૂયઃ પ્રાણો મે હૃદિ સંસ્થિતઃ

પશ્યામિ તં મુનિં વંદ્યં જગતોસ્ય હિતે રતમ્।
દૃષ્ટેન મે તથા દુઃખં નાશમેષ્યતિ સત્વરમ્

ઉદયેન સહસ્રાંશોર્હિમં યદ્વદ્વિલીયતે।
તદ્વન્મે દુઃખસંપ્રાપ્તિઃ સર્વથા નાશમેષ્યતિ

દૃષ્ટ્વા ચ દેવાન્સંપ્રાપ્તાનગસ્ત્યો ભગવાનૃષિઃ।
અર્ઘ્યમાદાય સુપ્રીતઃ સર્વાંસ્તાનભ્યપૂજયત્

તે તુ ગૃહ્ય તતઃ પૂજાં સંભાષ્ય ચ મહામુનિં।
જગ્મુસ્તેન તદા હૃષ્ટા નાકપૃષ્ઠં સહાનુગાઃ

ગતેષુ તેષુ કાકુત્સ્થઃ પુષ્પકાદવરુહ્ય ચ।
અભિવાદયિતું પ્રાપ્તઃ સોગસ્ત્યમૃષિમુત્તમમ્

રાજોવાચ।
સુતો દશરથસ્યાહં ભવંતમભિવાદિતુમ્।
આગતો વૈ મુનિશ્રેષ્ઠ સૌમ્યેનેક્ષસ્વ ચક્ષુષા

નિર્ધૂતપાપસ્ત્વાં દૃષ્ટ્વા ભવામીહ ન સંશયઃ।
એતાવદુક્ત્વા સ મુનિમભિવાદ્ય પુનઃ પુનઃ

કુશલં ભૃત્યવર્ગસ્ય મૃગાણાં તનયસ્ય ચ।
ભગવદ્દર્શનાકાંક્ષી શૂદ્રં હત્વા ત્વિહાગતઃ

અગસ્ત્ય ઉવાચ।
સ્વાગતં તે રઘુશ્રેષ્ઠ જગદ્વંદ્ય સનાતન।
દર્શનાત્તવ કાકુત્સ્થ પૂતોહં મુનિભિઃ સહ

ત્વત્કૃતે રઘુશાર્દૂલ ગૃહાણાર્ઘં મહાદ્યુતે।
સ્વાગતં નરશાર્દૂલ દિષ્ટ્યા પ્રાપ્તોસિ શત્રુહન્

ત્વં હિ નિત્યં બહુમતો ગુણૈર્બહુભિરુત્તમૈઃ।
અતસ્ત્વં પૂજનીયો વૈ મમ નિત્યં હૃદિસ્થિતઃ

સુરા હિ કથયંતિ ત્વાં શૂદ્રઘાતિનમાગતં।
બ્રાહ્મણસ્ય ચ ધર્મેણ ત્વયા વૈ જીવિતઃ સુતઃ

ઉષ્યતાં ચેહ ભગવઃ સકાશે મમ રાઘવ।
પ્રભાતે પુષ્પકેણાસિ ગંતાયોધ્યાં મહામતે

ઇદં ચાભરણં સૌમ્ય સુકૃતં વિશ્વકર્મણા।
દિવ્યં દિવ્યેનવપુષા દીપ્યમાનં સ્વતેજસા

પ્રતિગૃહ્ણીષ્વ રાજેન્દ્ર મત્પ્રિયં કુરુ રાઘવ।
લબ્ધસ્ય હિ પુનર્દ્દાને સુમહત્ફલમુચ્યતે

ત્વં હિ શક્તઃ પરિત્રાતું સેંદ્રાનપિ સુરોત્તમાન્।
તસ્માત્પ્રદાસ્યે વિધિવત્પ્રતીચ્છસ્વ નરર્ષભ

અથોવાચ મહાબાહુરિક્ષ્વાકૂણાં મહારથઃ।
કૃતાંજલિર્મુનિશ્રેષ્ઠં સ્વં ચ ધર્મમનુસ્મરન્

પ્રતિગ્રહો વૈ ભગવંસ્તવ મેઽત્ર વિગર્હિતઃ।
ક્ષત્રિયેણ કથં વિપ્ર પ્રતિગ્રાહ્યં વિજાનતા

બ્રાહ્મણેન તુ યદ્દત્તં તન્મે ત્વં વક્તુમર્હસિ।
સપુત્રો ગૃહવાનસ્મિ સમર્થોસ્મિ મહામુને

આપદા ચન ચાક્રાંતઃ કથં ગ્રાહ્યઃ પ્રતિગ્રહઃ।
ભાર્યા મે સુચિરં નષ્ટા ન ચાન્યા મમ વિદ્યતે

કેવલં દોષભાગી ચ ભવામીહ ન સંશયઃ।
કષ્ટાં ચૈવ દશાં પ્રાપ્ય ક્ષત્રિયોપિ પ્રતિગ્રહી

કુર્વન્ન દોષમાપ્નોતિ મનુરેવાત્ર કારણમ્।
વૃદ્ધૌ ચ માતાપિતરૌ સાધ્વી ભાર્યા શિશુઃ સુતઃ

અપ્યકાર્યશતં કૃત્વા ભર્તવ્યા મનુરબ્રવીત્।
નાહં પ્રતીચ્છે વિપ્રર્ષે ત્વયા દત્તં પ્રતિગ્રહં

ન ચ મે ભવતા કોપઃ કાર્યો વૈ સુરપૂજિત

અગસ્ત્ય ઉવાચ।
ન ચ પ્રતિગ્રહે દોષો ગૃહીતે પાર્થિવૈર્નૃપ।
ભવાન્વૈ તારણે શક્તસ્ત્રૈલોક્યસ્યાપિ રાઘવ

તારય બ્રાહ્મણં રામ વિશેષેણ તપસ્વિનં।
તસ્માત્પ્રદાસ્યે વિધિવત્પ્રતીચ્છસ્વ નરાઘિપ

રામ ઉવાચ।
ક્ષત્રિયેણ કથં વિપ્ર પ્રતિગ્રાહ્યં વિજાનતા।
બ્રાહ્મણેન તુ યદ્દત્તં તન્મે ત્વં વક્તુમર્હસિ

અગસ્ત્ય ઉવાચ।
આસીત્કૃતયુગે રામ બ્રહ્મપૂતે પુરાતને।
અપાર્થિવાઃ પ્રજાઃ સર્વાઃ સુરાણાં ચ શતક્રતુઃ

તાઃ પ્રજા દેવદેવેશં રાજાર્થં સમુપાગમન્।
સુરાણાં વિદ્યતે રાજા દેવદેવઃ શતક્રતુઃ

શ્રેયસેસ્માસુ લોકેશ પાર્થિવં કુરુ સાંપ્રતં।
યસ્મિન્પૂજાં પ્રયુંજાનાઃ પુરુષા ભુંજતે મહીમ્

તતો બ્રહ્મા સુરશ્રેષ્ઠો લોકપાલાન્સવાસવાન્।
સમાહૂયાબ્રવીત્સર્વાંસ્તેજોભાગોઽત્ર યુજ્યતામ્

તતો દદુર્લોકપાલાશ્ચતુર્ભાગં સ્વતેજસા।
અક્ષયશ્ચ તતો બ્રહ્મા યતો જાતોઽક્ષયો નૃપઃ

તં બ્રહ્મા લોકપાલાનામંશં પુંસામયોજયત્।
તતો નૃપસ્તદા તાસાં પ્રજાનાં ક્ષેમપંડિતઃ

તત્રૈંદ્રેણ તુ ભાગેન સર્વાનાજ્ઞાપયેન્નૃપઃ।
વારુણેન ચ ભાગેન સર્વાન્પુષ્ણાતિ દેહિનઃ

કૌબેરેણ તથાંશેન ત્વર્થાન્દિશતિ પાર્થિવઃ।
યશ્ચ યામ્યો નૃપે ભાગસ્તેન શાસ્તિ ચ વૈ પ્રજાઃ

તત્ર ચૈંદ્રેણ ભાગેન નરેન્દ્રોસિ રઘૂત્તમ।
પ્રતિગૃહ્ણીષ્વાભરણં તારણાર્થે મમ પ્રભો

તતો રામઃ પ્રજગ્રાહ મુનેર્હસ્તાન્મહાત્મનઃ।
દિવ્યમાભરણં ચિત્રં પ્રદીપ્તમિવ ભાસ્કરં

પ્રતિગૃહ્ય તતોગસ્ત્યાદ્રાઘવઃ પરવીરહા।
નિરીક્ષ્ય સુચિરં કાલં વિચાર્ય ચ પુનઃ પુનઃ

મૌક્તિકાનિ વિચિત્રાણિ ધાત્રીફલસમાનિ ચ।
જાંબૂનદનિબદ્ધાનિ વજ્રવિદ્રુમનીલકૈઃ

પદ્મરાગૈઃ સગોમેધૈર્વૈડૂર્યૈઃ પુષ્પરાગકૈઃ।
સુનિબદ્ધં સુવિભક્તં સુકૃતં વિશ્વકર્મણા

દૃષ્ટ્વા પ્રીતિસમાયુક્તો ભૂયશ્ચેદં વ્યચિંતયત્।
નેદૃશાનિ ચ રત્નાનિ મયા દૃષ્ટાનિ કાનિચિત્

ઉપશોભાનિ બદ્ધાનિ પૃથ્વીમૂલ્યસમાનિ ચ।
વિભીષણસ્ય લંકાયાં ન દૃષ્ટાનિ મયા પુરા

ઇતિ સંચિત્ય મનસા રાઘવસ્તમૃષિં પુનઃ।
આગમં તસ્ય દિવ્યસ્ય પ્રષ્ટું સમુપચક્રમે

અત્યદ્ભુતમિદં બ્રહ્મન્ન પ્રાપ્યં ચ મહીક્ષિતામ્।
કથં ભગવતા પ્રાપ્તં કુતો વા કેન નિર્મિતમ્

કુતૂહલવશાચ્ચૈવ પૃચ્છામિ ત્વાં મહામતે।
કરતલેસ્થિતે રત્ને કરમધ્યં પ્રકાશતે

અધમં તદ્વિજાનીયાત્સર્વશાસ્ત્રેષુ ગર્હિતમ્।
દિશઃ પ્રકાશયેદ્યત્તન્મધ્યમં મુનિસત્તમ

ઊર્ધ્વગં ત્રિશિખં યત્સ્યાદુત્તમં તદુદાહૃતમ્।
એતાન્યુત્તમજાતીનિ ઋષિભિઃ કીર્તિતાનિ તુ

આશ્ચર્યાણાં બહૂનાં હિ દિવ્યાનાં ભગવાન્નિધિઃ।
એવં વદતિ કાકુત્સ્થે મુનિર્વાક્યમથાબ્રવીત્

અગસ્ત્ય ઉવાચ।
શૃણુ રામ પુરાવૃત્તં પુરા ત્રેતાયુગે મહત્।
દ્વાપરે સમનુપ્રાપ્તે વને યદ્દૃષ્ટવાનહમ્

આશ્ચર્યં સુમહાબાહો નિબોધ રઘુનંદન।
પુરા ત્રેતાયુગે હ્યાસીદરણ્યં બહુવિસ્તરમ્

સમંતાદ્યોજનશતં મૃગવ્યાઘ્રવિવર્જિતમ્।
તસ્મિન્નિષ્પુરુષેઽરણ્યે ચિકીર્ષુસ્તપ ઉત્તમમ્

અહમાક્રમિતું સૌમ્ય તદરણ્યમુપાગતઃ।
તસ્યારણ્યસ્ય મધ્યં તુ યુક્તં મૂલફલૈઃ સદા

શાકૈર્બહુવિધાકારૈર્નાનારૂપૈઃ સુકાનનૈઃ।
તસ્યારણ્યસ્ય મધ્યે તુ પંચયોજનમાયતમ્

હંસકારંડવાકીર્ણં ચક્રવાકોપશોભિતમ્।
તત્રાશ્ચર્યં મયા દૃષ્ટં સરઃ પરમશોભિતમ્

વિસારિકચ્છપાકીર્ણં બકપંક્તિગણૈર્યુતમ્।
સમીપે તસ્ય સરસસ્તપસ્તપ્તું ગતઃ પુરા

દેશં પુણ્યમુપેત્યૈવં સર્વહિંસાવિવર્જિતમ્।
તત્રાહમવસં રાત્રિં નૈદાઘીં પુરુષર્ષભ

પ્રભાતે પુરુત્થાય સરસ્તદુપચક્રમે।
અથાપશ્યં શવમહમસ્પૃષ્ટજરસં ક્વચિત્

તિષ્ઠંતં પરયા લક્ષ્મ્યા સરસો નાતિદૂરતઃ।
તદર્થં ચિંતયાનોહં મુહૂર્તમિવ રાઘવ

અસ્ય તીરે ન વૈ પ્રાણી કો વાપ્યેષ સુરર્ષભઃ।
મુનિર્વા પાર્થિવો વાપિ ક્વ મુનિઃ પાર્થિવોપિ વા

અથવા પાર્થિવસુતસ્તસ્યૈવં સંભવઃ કૃતઃ।
અતીતેહનિ રાત્રૌ વા પ્રાતર્વાપિ મૃતો યદિ

અવશ્યં તુ મયા જ્ઞેયા સરસોસ્ય વિનિષ્ક્રિયા।
યાવદેવં સ્થિતશ્ચાહં ચિંતયાનો રઘૂત્તમ

અથાપશ્યં મૂહૂર્તાત્તુ દિવ્યમદ્ભુતદર્શનમ્।
વિમાનં પરમોદારં હંસયુક્તં મનોજવમ્

પુરસ્તત્ર સહસ્રં તુ વિમાનેપ્સરસાં નૃપ।
ગંધર્વાશ્ચૈવ તત્સંખ્યા રમયંતિ વરં નરમ્

ગાયંતિ દિવ્યગેયાનિ વાદયંતિ તથા પરે।
અથાપશ્યં નરં તસ્માદ્વિમાનાદવરોહિતમ્

શવમાંસં ભક્ષયન્તં ચ સ્નાત્વા રઘુકુલોદ્વહ।
તતો ભુક્ત્વા યથાકામં સ માંસં બહુપીવરમ્

અવતીર્ય સરઃ શીઘ્રમારુરોહ દિવં પુનઃ।
તમહં દેવસંકાશં શ્રિયા પરમયાન્વિતમ્

ભો ભો સ્વર્ગિન્મહાભાગ પૃચ્છામિ ત્વાં કથં ત્વિદમ્।
જુગુપ્સિતસ્તવાહારો ગતિશ્ચેયં તવોત્તમા

યદિ ગુહ્યં ન ચૈતત્તે કથય ત્વદ્ય મે ભવાન્।
કામતઃ શ્રોતુમિચ્છામિ કિમેતત્પરમં વચઃ

કો ભવાન્વદ સંદેહમાહારશ્ચ વિગર્હિતઃ।
ત્વયેદં ભુજ્યતે સૌમ્ય કિમર્થં ક્વ ચ વર્તસે

કસ્યાયમૈશ્વરોભાવઃ શવત્વેન વિનિર્મિતઃ।
આહારં ચ કથં નિંદ્યં શ્રોતુમિચ્છામિ તત્ત્વતઃ

શ્રુત્વા ચ ભાષિતં તત્ર મમ રામ સતાં વર।
પ્રાંજલિઃ પ્રત્યુવાચેદં સ સ્વર્ગી રઘુનંદન

શૃણુષ્વાદ્ય યથાવૃત્તં મમેદં સુખદુઃખજમ્।
કામો હિ દુરિતક્રમ્યઃ શૃણુ યત્પૃચ્છસે દ્વિજ

પુરા વૈદર્ભકો રાજા પિતા મે હિ મહાયશાઃ।
વાસુદેવ ઇતિ ખ્યાતસ્ત્રિષુ લોકેષુ ધાર્મિકઃ

તસ્ય પુત્રદ્વયં બ્રહ્મન્દ્વાભ્યાં સ્ત્રીભ્યામજાયત।
અહં શ્વેત ઇતિ ખ્યાતો યવીયાન્સુરથોઽભવત્

પિતર્યુપરતે તસ્મિન્પૌરા મામભ્યષેચયન્।
તત્રાહંકારયન્રાજ્યં ધર્મે ચાસં સમાહિતઃ

એવં વર્ષસહસ્રાણિ બહૂનિ સમુપાવ્રજન્।
મમ રાજ્યં કારયતઃ પરિપાલયતઃ પ્રજાઃ

સોહં નિમિત્તે કસ્મિંશ્ચિદ્વૈરાગ્યેણ દ્વિજોત્તમ।
મરણં હૃદયે કૃત્વા તપોવનમુપાગમમ્

સોહં વનમિદં રમ્યં ભૃશં પક્ષિવિવર્જિતમ્।
પ્રવિષ્ટસ્તપ આસ્થાતુમસ્યૈવ સરસોંતિકે

રાજ્યેઽભિષિચ્ય સુરથં ભ્રાતરં તં નરાધિપમ્।
ઇદં સરઃ સમાસાદ્ય તપસ્તપ્તં સુદારુણમ્

દશવર્ષસહસ્રાણિ તપસ્તપ્ત્વા મહાવને।
શુભં તુ ભવનં પ્રાપ્તો બ્રહ્મલોકમનામયમ્

સ્વર્ગસ્થમપિ માં બ્રહ્મન્ક્ષુત્પિપાસે દ્વિજોત્તમ।
અબાધેતાં ભૃશં ચાહમભવં વ્યથિતેંદ્રિયઃ

તતસ્ત્રિભુવનશ્રેષ્ઠમવોચં વૈ પિતામહમ્।
ભગવન્સ્વર્ગલોકોઽયં ક્ષુત્પિપાસા વિવર્જિતઃ

કસ્યેયં કર્મણઃ પક્તિઃ ક્ષુત્પિપાસે યતો હિ મે।
આહારઃ કશ્ચ મે દેવ બ્રૂહિ ત્વં શ્રીપિતામહ

તતઃ પિતામહઃ સમ્યક્ચિરં ધ્યાત્વા મહામુને।
મામુવાચ તતો વાક્યં નાસ્તિ ભોજ્યં સ્વદેહજમ્

ૠતે તે સ્વાનિ માંસાનિ ભક્ષય ત્વં તુ હિ નિત્યશઃ।
સ્વશરીરં ત્વયા પુષ્ટં કુર્વતા તપ ઉત્તમમ્

નાદત્તં જાયતે તાત શ્વેત પશ્ય મહીતલે।
આગ્રહાદ્ભિક્ષમાણાય ભિક્ષાપિ પ્રાણિને પુરા

ન હિ દત્તા ગૃહે ભ્રાંત્યા મોહાદતિથયે તદા।
તેન સ્વર્ગગતસ્યાપિ ક્ષુત્પિપાસે તવાધુના

સ ત્વં પ્રપુષ્ટમાહારૈઃ સ્વશરીરમનુત્તમમ્।
ભક્ષયસ્વ ચ રાજેંદ્ર સા તે તૃપ્તિર્ભવિષ્યતિ

એવમુક્તસ્તતો દેવં બ્રહ્માણમહમુક્તવાન્।
ભક્ષિતે ચ સ્વકે દેહે પુનરન્યન્ન મે વિભો

ક્ષુધાનિવારણં નૈવ દેહસ્યાસ્ય વિનૌદનં।
ખાદામિ હ્યક્ષયં દેવ પ્રિયં મે ન હિ જાયતે

તતોબ્રવીત્પુનર્બ્રહ્મા તવ દેહોઽક્ષયઃ કૃતઃ।
દિનેદિને તે પુષ્ટાત્મા શવઃ શ્વેત ભવિષ્યતિ

યાવદ્વર્ષશતં પૂર્ણં સ્વમાંસં ખાદ ભો નૃપ।
યદાગચ્છતિ ચાગસ્ત્યઃ શ્વેતારણ્યં મહાતપાઃ

ભગવાનતિદુર્ધર્ષસ્તદા કૃચ્છ્રાદ્વિમોક્ષ્યસે।
સ હિ તારયિતું શક્તઃ સેંદ્રાનપિ સુરાસુરાન્

આહારં કુત્સિતં ચેમં રાજર્ષે કિં પુનસ્તવ।
સુરકાર્યં મહત્તેન સુકૃતં તુ મહાત્મના

ઉદધિં નિર્જલં કૃત્વા દાનવાશ્ચ નિપાતિતાઃ।
વિંધ્યશ્ચાદિત્યવિદ્વેષાદ્વર્ધમાનો નિવારિતઃ

લંબમાના મહી ચૈષા ગુરુત્વેનાધિવાસિતા।
દક્ષિણા દિગ્દિવં યાતા ત્રૈલાક્યં વિષમસ્થિતમ્

મયા ગત્વા સુરૈઃ સાર્દ્ધં પ્રેષિતો દક્ષિણાં દિશમ્।
સમાં કુરુ મહાભાગ ગુરુત્વેન જગત્સમમ્

એવં ચ તેન મુનિના સ્થિત્વા સર્વા ધરા સમા।
કૃતા રાજેંદ્ર મુનિના એવમદ્યાપિ દૃશ્યતે

સોહં ભગવત શ્રુત્વા દેવદેવસ્ય ભાષિતમ્।
ભુંજે ચ કુત્સિતાહારં સ્વશરીરમનુત્તમમ્

પૂર્ણં વર્ષશતં ચાદ્ય ભોજનં કુત્સિતં ચ મે।
ક્ષયં નાભ્યેતિ તદ્વિપ્ર તૃપ્તિશ્ચાપિ મમોત્તમા

તં મુનિં કૃચ્છ્રસન્તપ્તશ્ચિંતયામિ દિવાનિશમ્।
કદા વૈ દર્શનં મહ્યં સ મુનિર્દાસ્યતે વને

એવં મે ચિંતયાનસ્ય ગતં વર્ષશતન્ત્વિહ।
સોગસ્ત્યો હિ ગતિર્બ્રહ્મન્મુનિર્મે ભવિતા ધ્રુવં

ન ગતિર્ભવિતા મહ્યં કુંભયોનિમૃતે દ્વિજમ્।
શ્રુત્વેત્થં ભાષિતં રામ દૃષ્ટ્વાહારં ચ કુત્સિતમ્

કૃપયા પરયા યુક્તસ્તં નૃપં સ્વર્ગગામિનમ્।
કરોમ્યહં સુધાભોજ્યં નાશયામિ ચ કુત્સિતમ્

ચિન્તયન્નિત્યવોચં તમગસ્ત્યઃ કિં કરિષ્યતિ।
અહમેતત્કુત્સિતં તે નાશયામિ મહામતે

ઈપ્સિતં પ્રાર્થયસ્વાસ્માન્મનઃ પ્રીતિકરં પરમ્।
સ સ્વર્ગી માં તતઃ પ્રાહ કથં બ્રહ્મવચોન્યથા

કર્તું મુને મયા શક્યં ન ચાન્યસ્તારયિષ્યતિ।
ૠતે વૈ કુંભયોનિં તં મૈત્રાવરુણસંભવમ્

અપૃષ્ટોપિ મયા બ્રહ્મન્નેવમૂચે પિતામહઃ।
એવં બ્રુવાણં તં શ્વેતમુક્તવાનહમસ્મિ સઃ

આગતસ્તવ ભાગ્યેન દૃષ્ટોહં નાત્ર સંશયઃ।
તતઃ સ્વર્ગી સ માં જ્ઞાત્વા દંડવત્પતિતો ભુવિ

તમુત્થાપ્ય તતો રામાબ્રવં કિં તે કરોમ્યહમ્।
રાજોવાચ।
આહારાત્કુત્સિતાદ્બ્રહ્મંસ્તારયસ્વાદ્ય દુષ્કૃતાત્

યેન લોકોઽક્ષયઃ સ્વર્ગો ભવિતા ત્વત્કૃતેન મે।
તતઃ પ્રતિગ્રહો દત્તો જગદ્વંદ્ય નૃપેણ હિ

ભવાન્મામનુગૃહ્ણાતુ પ્રતીચ્છસ્વ પ્રતિગ્રહમ્

કૃતા મતિસ્તારણાય ન લોભાદ્રઘુનંદન।
ગૃહીતે ભૂષણે રામ મમ હસ્તગતે તદા

માનુષઃ પૌર્વિકો દેહસ્તદા નષ્ટોસ્ય ભૂપતે।
પ્રણષ્ટે તુ શરીરે ચ રાજર્ષિઃ પરયા મુદા

મયોક્તોસૌ વિમાનેન જગામ ત્રિદિવં પુનઃ।
તેન મે શક્રતુલ્યેન દત્તમાભરણં શુભં

તસ્મિન્નિમિત્તે કાકુત્સ્થ દત્તમદ્ભુતકર્મણા।
શ્વેતો વૈદર્ભકો રાજા તદાભૂદ્ગતકલ્મષઃ

ઇતિ શ્રીપાદ્મપુરાણે પ્રથમે સૃષ્ટિખંડે રામાગસ્ત્યસંવાદોનામ ષટ્ત્રિંશોઽધ્યાયઃ