નારાયણીય · અધ્યાય 8.32

પુરા હયગ્રીવમહાસુરેણ ષષ્ઠાન્તરાન્તોદ્યદકાણ્ડકલ્પે ।
નિદ્રોન્મુખબ્રહ્મમુખાદ્ધૃતેષુ વેદેષ્વધિત્સઃ કિલ મત્સ્યરૂપમ્ ॥

સત્યવ્રતસ્ય દ્રમિલાધિભર્તુર્નદીજલે તર્પયતસ્તદાનીમ્ ।
કરાઞ્જલૌ સ જ્વલિતાકૃતિસ્ત્વમદૃશ્યથાઃ કશ્ચન બાલમીનઃ ॥

ક્ષિપ્તં જલે ત્વાં ચકિતં વિલોક્ય નિન્યેઽન્બુપાત્રણ મુનિઃ સ્વગેહમ્ ।
સ્વલ્પૈરહોભિઃ કલશીં ચ કૂપં વાપીં સરશ્ચાનશિષે વિભો! ત્વમ્ ॥

યોગપ્રભાવાદ્ ભવદાજ્ઞયૈવ નીતસ્તતસ્ત્વં મુનિના પયોધિમ્ ।
પૃષ્ટોઽમુના કલ્પદિદૃક્ષુમેનં સપ્તાહમાસ્સ્વેતિ વદન્નયાસીઃ ॥

પ્રાપ્તે ત્વદુક્તેઽહનિ વારિધારાપરિપ્લુતે ભૂમિતલે મુનીન્દ્રઃ ।
સપ્તર્ષિભિઃ સાર્ધમપારવારિણ્યુદ્ઘૂર્ણમાનઃ શરણં યયૌ ત્વામ્ ॥

ધરાં ત્વદાદેશકરીમવાપ્તાં નૌરૂપિણીમારુરુહુસ્તદા તે ।
તત્કમ્પકમ્પ્રેષુ ચ તેષુ ભૂયસ્ત્વમમ્બુધેરાવિરભૂર્મહીયાન્ ॥

ઝષાકૃતિં યોજનલક્ષદીર્ઘાં દધાનમુચ્ચૈસ્તરતેજસં ત્વામ્ ।
નિરીક્ષ્ય તુષ્ટા મુનયસ્ત્વદુક્ત્યા ત્વત્તુઙ્ગશૃઙ્ગે તરણિં બબન્ધુઃ ॥

આકૃષ્ટનૌકો મુનિમણ્ડલાય પ્રદર્શયન્ વિશ્વજગદ્વિભાગાન્ ।
સંસ્તૂયમાનો નૃવરેણ તેન જ્ઙાનં પરં ચોપદિશન્નચારીઃ ॥

કલ્પાવધૌ સપ્ત મુનીન્ પુરોવત્ પ્રસ્તાપ્ય સત્યવ્રતભૂમિપં તમ્ ।
વૈવસ્વતાખ્યં મનુમાદધાનઃ ક્રોધાદ્ધયગ્રીવમભિદ્રુતોઽભૂઃ ॥

સ્વતુઙ્ગશૃઙ્ગક્ષતવક્ષસં તં નિપાત્ય દૈત્યં નિગમાન્ ગૃહીત્વા ।
વિરિઞ્ચયે પ્રીતહૃદે દદાનઃ પ્રભઞ્જનાગારપતે! પ્રપાયાઃ ॥