નારાયણીય · અધ્યાય 8.30

શક્રેણ સંયતિ હતોઽપિ બલિર્મહાત્મા
શુક્રેણ જીવિતતનુઃ ક્રતુવર્ધિતોષ્મા ।
વિક્રાન્તિમાન્ ભયનિલીનસુરાં ત્રિલોકીં
ચક્રે વશે સ તવ ચક્રમુખાદભીતઃ ॥

પુત્રાર્તિદર્શનવશાદદિતિર્વિષણ્ણા
તં કાશ્યપં નિજપતિં શરણં પ્રપન્ના ।
ત્વત્પૂજનં તદુદિતં હિ પયોવ્રતાખ્યં
સા દ્વાદશાહમચરત્ ત્વયિ ભક્તિપૂર્ણા ॥

તસ્યાવધૌ ત્વયિ નિલીનમતેરમુષ્યાઃ
શ્યામશ્ચતુર્ભુજવપુઃ સ્વયમાવિરાસીઃ ।
નમ્રાં ચ તામિહ ભવત્તનયો ભવેયં
ગોપ્યં મદીક્ષણમિતિ પ્રલપન્નયાસીઃ ॥

ત્વં કાશ્યપે તપસિ સન્નિદધત્ તદાનીં
પ્રાપ્તોઽસિ ગર્ભમદિતેઃ પ્રણુતો વિધાત્રા ।
પ્રાસૂત ચ પ્રકટવૈષ્ણવદિવ્યરૂપં
સા દ્વાદશીશ્રવણપુણ્યદિને ભવન્તમ્ ॥

પુણ્યાશ્રમં તમભિવર્ષતિ પુષ્પવર્ષૈર્-
હર્ષાકુલે સુરકુલે કૃતતૂર્યઘોષે ।
બદ્ધ્વાઞ્જલિં જય જયેતિ તનુઃ પિતૃભ્યાં
ત્વં તત્ક્ષણે પટુતમં વટુરૂપમાધાઃ ॥

તાવત્ પ્રજાપતિમુખૈરુપનીય મૌઞ્જી-
દણ્ડાજિનાક્ષવલયાદિભિરર્ચ્યમાનઃ ।
દેદીપ્યમાનવપુરીશ! કૃતાગ્નિકાર્યસ્
ત્વં પ્રાસ્થિથા બલિગૃહં પ્રકૃતાશ્વમેધમ્ ॥

ગાત્રેણ ભાવિમહિમોચિતગૌરવં પ્રાગ્
વ્યાવૃણ્વતેવ ધરણીં ચલયન્નયાસીઃ ।
છત્રં પરોષ્મતિરણાર્થમિવાદધાનો
દણ્ડં ચ દાનવજનેષ્વિવં સન્નિધાતુમ્ ॥

તાં નર્મદિત્તરતટે હયમેધશાલા-
માસેદુષિ ત્વયિ રુચા તવ રુદ્ધનેત્રૈઃ ।
ભાસ્વાન્ કિમેષ દહનો નુ સનત્કુમારો
યોગી નુ કોઽયમિતિ શુક્રમુખૈઃ શશઙ્કે ॥

આનીતમાશુ ભૃગુભિર્મહસાભિભૂતૈસ્
ત્વાં રમ્યરૂપમસુરઃ પુલકાવૃતાઙ્ગઃ ।
ભક્ત્યા સમેત્ય સુકૃતી પરિષિચ્ય પાદૌ
તત્તોયમન્વધૃત મૂર્ધતિ તીર્થતીર્થમ્ ॥

પ્રહ્લાદવંશજતયા ક્રતુભિર્દ્વિજેષુ
વિશ્વાસતો નુ તદિદં દિતિજોઽપિ લેભે ।
યત્ તે પદામ્બુ ગિરિશસ્ય શિરોભિલાલ્યં
સ ત્વં વિભો! ગુરુપુરાલય! પાલયેથાઃ ॥