નારાયણીય · અધ્યાય 7.25

સ્તમ્ભે ઘટ્ટયતો હિરણ્યકશિપોઃ કર્ણૌ સમાચૂર્ણય-
ન્નાધૂર્ણજ્જગદણ્દકુણ્ડકુહરો ઘોરસ્તવાભૂદ્ રવઃ ।
શ્રુત્વા યં કિલ દૈત્યરાજહૃદયે પૂર્વં કદાપ્યશ્રુતં
કમ્પઃ કશ્ચન સમ્પપાત્ ચલિતોઽપ્યમ્ભોજભૂર્વિષ્ટપાત્ ॥

દૈત્યે દિક્ષુ વિસૃષ્ટચક્ષુષિ મહાસંરામ્ભિણી સ્તમ્ભતઃ
સમ્ભૂતં ન મૃગાત્મકં ન મનુજાકારં વપુસ્તે વિભો! ।
કિં કિં ભીષણમેતદદ્ભુતમિતિ વ્યુદ્ભ્રાન્તચિત્તેઽસુરે
વિસ્ફુર્જદ્ધવલોગ્રરોમવિકસદ્વર્ષ્મા સમાજૃમ્ભથાઃ ॥

તપ્તસ્વર્ણસવર્ણઘૂર્ણદતિરૂક્ષાક્ષં સટાકેસર-
પ્રોત્કમ્પપ્રનિકુમ્બિતામ્બરમહો જીયાત્ તવેદં વપુઃ ।
વ્યાત્તવ્યાપ્તમહાદરીસખમુખં ખડ્ગોગ્રવલ્ગન્મહા-
જિહ્વાનિર્ગમદૃશ્યમાનસુમહાદંષ્ટ્રાયુગોડ્ડામરમ્ ॥

ઉત્સર્પદ્વલિભઙ્ગભીષુણહનું હ્વસ્વસ્થવીયસ્તર-
ગ્રીવં પીવરદોશ્શતોદ્ગતનખક્રૂરાંશુદૂરોલ્બણમ્ ।
વ્યોમોલ્લઙ્ઘિઘનાઘનોપમઘનપ્રધ્વાનનિર્ધાવિત-
સ્પર્ધાલુપ્રકરં નમામિ ભવતસ્તન્નારસિંહં વપુઃ ॥

નૂનઃ વુષ્ણુરયં નિહન્મ્યમુમિતિ ભ્રામ્યદ્ગદાભીષણં
દૈત્યેન્દ્રં સમુપાદ્રવન્તમધૃથા દોર્ભ્યાં પૃથુભ્યામમ્મુમ્ ।
વીરો નિર્ગલિતોઽથ ખડ્ગફલકે ગૃહ્ણન્ વિચિત્રશ્રમાન્
વ્યાવૃણ્વન્ પુનરાપપાત ભુવનગ્રાસોદ્યતં ત્વામહો ॥

ભ્રામ્યન્તં દિતિહાધમં પુનરપિ પ્રોદ્ગૃહ્ય દોર્ભ્યાં જવાદ્
દ્વારેઽથોરુયુગે નિપાત્ય નખરાન્ વ્યુત્ન્ખાય વક્ષોભુવિ ।
નિર્ભિન્દન્નધિગર્ભનિર્ભરગલદ્રક્તામ્બુ બદ્ધોત્સવં
પાયં પાયમુદૈરયો બહુજગત્સંહારિસિંહારવાન્ ॥

ત્યક્ત્વા તં હતમાશુ રક્તલહરીસિક્તોન્નમદ્વર્ષ્મણિ
પ્રત્યુત્પત્ય સમસ્તદૈત્યપટલીં ચાખાદ્યમાને ત્વયિ ।
ભ્રામ્યદ્ભૂમિ વિકમ્પિતામ્બુધિકુલં વ્યાલોલશૈલોત્કરં
પ્રોત્સર્પત્ખચરં ચરાચરમહો દુઃસ્થામવસ્થાં દધૌ ॥

તાવન્માંસવપાકરાલવપુષં ઘોરાન્ત્રમાલાધરં
ત્વાં મધ્યેસભમિદ્ધરોષમુષિતં દુર્વારગુર્વારવમ્ ।
અભ્યેતું ન શશક કોઽપિ ભુવને દૂરે સ્થિતા ભીરવઃ
સર્વે શર્વવિરિઞ્ચવાસવમુખાઃ પ્રત્યેકમસ્તોષત ॥

ભૂયોઽપ્યક્ષતરોષધામ્નિ ભવતિ બ્રહ્માજ્ઞયા બાલકે
પ્રહ્લાદે પદયોર્નમત્યપભયે કારુણ્યભારાકુલઃ ।
શાન્તસ્ત્વં કરમસ્ય મૂર્ધ્નિ સમધાઃ સ્તોત્રૈરથોદ્નાયત-
સ્તસ્યાકામધિયોઽપિ તેનિથ વરં લોકાય ચાનુગ્રહમ્ ॥

એવં નાટિતરૌદ્રચેષ્ટિત! વિભો! શ્રીતાપનીયાભિધ-
શ્રુત્યન્તસ્ફુટગીતસર્વમહિમન્નત્યન્તશુદ્ધાકૃતે! ।
તત્તાદૃઙ્નિખિલોત્તરં પુનરહો કસ્ત્વાં પરો લઙ્ઘયેત્
પ્રહ્લાદપ્રિય! હે મરુત્પુરપતે! સર્વામયાત્ પાહિ મામ્ ॥