નારાયણીય · અધ્યાય 4.19

પૃથોસ્તુ નપ્તા પૃથુધર્મકર્મઠઃ પ્રાચીનબર્હિર્યુવતૌ શતદ્રુતૌ ।
પ્રચેતસો નામ સુચેતસઃ સુતાનજીજનત્ ત્વત્કરુણાઙ્કુરાનિવ ॥

પિતુઃ સિસૃક્ષાનિરતસ્ય શાસનાદ્ ભવત્તપસ્યાનિરતા દશાપિ તે ।
પયોનિધિં પશ્ચિમમેત્ય તત્તટે સરોવરં સન્દદૃશુર્મનોહરમ્ ॥

તદા ભવત્તીર્થમિદં સમાગતો ભવો ભવત્સેવકદર્શનાદૃતઃ ।
પ્રકાશમાસાદ્ય પુરઃ પ્રચેતસામુપાદિશદ્ ભક્તતમસ્તવ સ્તવમ્ ॥

સ્તવં જપન્તસ્તમમી જલાન્તરે ભવન્તમાસેવિષતાયુતં સમાઃ ।
ભવત્સુખાસ્વાદરસાદમીષ્વિયાન્ બભૂવ કલો ધ્રુવવન્ન શીઘ્રતા ॥

તપોભિરેષામતિમાત્રવર્ધિભિઃ સ યજ્ઞહિંસાનિરતોઽપિ પાવિતઃ ।
પિતાપિ તેષામ્ ગૃહયાતનારદપ્રદર્શિતાત્મા ભવદાત્મતાં યયૌ ॥

કૃપાબલેનૈવ તત્ઃ પ્રચેતસાં પ્રકાશમાગાઃ પતગેન્દ્રવાહનઃ ।
વિરાજિચક્રાદિવરાયુધાંશુભિર્ભુજાભિરષ્ટાભિરુદઞ્ચિતદ્યુતિઃ ॥

પ્રચેતસાં તાવદયાચતામપિ ત્વમેવ કારુણ્યભરાદ્ વારાનદાઃ ।
ભવદ્વિચિન્તાપિ શિવાયદેહિનાં ભવત્વસૌ રુદ્રનુતિશ્ચ કામદા ॥

અવાપ્ય કાન્તાં તનયાં મહીરુહાં તયા રમધ્વં દશલક્ષવત્સરીમ્ ।
સુતોઽસ્તુ દક્ષો નનુ તત્ક્ષણાચ્ચ માં પ્રયાસ્યથેતિ ન્યગદો મુદૈવ તાન્ ॥

તતશ્ચ તે ભૂતલરોધિનસ્તરૂન્ ક્રૂધા દહન્તો દ્રુહિણેન વારિતાઃ ।
દ્રુમૈશ્ચ દત્તાં તનયામવાપ્ય તાં ત્વદુક્તકાલં સુખિનોઽભિરેમિરે ॥

અવાપ્ય દક્ષં ચ સુતં કૃતાધ્વરાઃ પ્રચેતસો નારદલબ્ધયા ધિયા ।
અવાપુરાનન્દપદં તથાવિધુસ્ત્વમીશ! વાતાલયનાથ! પાહિ મામ્ ॥