નારાયણીય · અધ્યાય 3.15

મતિરિહ ગુણસક્તા બન્ધકૃત્ તેષ્વસક્તા
ત્વમૃતકૃદુપરુન્ધે ભક્તિયોગસ્તુ સક્તિમ્ ।
મહદનુગમલભ્યા ભક્તિરેવાત્ર સાધ્યા
કપિલતનુરિતિ ત્વં દેવહૂત્યૈ ન્યગાદીઃ ॥

પ્રકૃતિમહદહઙ્કારાશ્ચ માત્રાશ્ચ ભૂતાન્યપિ
હૃદપિ દશાક્ષી પૂરુષઃ પઞ્ચવિંશઃ ।
ઇતિ વિદિતવિભાગો મુચ્યતેઽસૌ પ્રકૃત્યાં
કપિલતનુરિતિ ત્વં દેવહૂત્યૈ ન્યગાદીઃ ॥

પ્રકૃતિગતગુણૌઘૈર્નાજ્યતે પૂરુષોઽયં
યદિ તુ સજતિ તસ્યાં તદ્ગુણાસ્તં ભજેરન્ ।
મદનુભજનતત્ત્વાલોચનૈઃ સાપ્યપેયાત્
કપિલતનુરિતિ ત્વં દેવહૂત્યૈ ન્યગાદીઃ ॥

વિમલમતિરુપાત્તૈરાસનાદ્યૈર્મદઙ્ગં
ગુરુડસમધિરૂઢં દિવ્યભૂષાયુધાઙ્કમ્ ।
રુચિતુલિતતમાલં શીલયેતાનુવેલં
કપિલતનુરિતિ ત્વં દેવહૂત્યૈ ન્યગાદીઃ ॥

મમ ગુણગુણલીલાકર્ણનૈઃ કીર્તિનાદ્યૈર્
મયિ સુરસરિદોઘપ્રખ્યચિત્તાનુવૃત્તિઃ ।
ભવતિ પરમભક્તિઃ સા હિ મૃત્યોર્વિજેત્રી
કપિલતનુરિતિ ત્વં દેવહૂત્યૈ ન્યગાદીઃ ॥

અહહ બહુલહિંસાસઞ્ચિતાર્થૈઃ કુડુમ્બં
પ્રતિદિનમનુપુષ્ણન્ સ્ત્રીજિતો બાલલાલી ।
વિશતિ હિ ગૃહસક્તો યાતનાં મય્યભક્તઃ
કપિલતનુરિતિ ત્વં દેવહૂત્યૈ ન્યગાદીઃ ॥

યુવતિજઠરખિન્નો જાતબોધોઽપ્યકાણ્ડે
પ્રસવગલિતબોધઃ પીડયોલ્લઙ્ઘ્ય બાલ્યમ્ ।
પુનરપિ બત મુહ્યત્યેવ તારુણ્યકાલે
કપિલતનુરિતિ ત્વં દેવહૂત્યૈ ન્યગાદીઃ ॥

પિતૃસુરગણયાજી ધાર્મિકો યો ગૃહસ્થઃ
સ ચ નિપતતિ કાલે દક્ષિણાધ્વોપગામી ।
મયિ નિહિતમકાં કર્મ તૂદક્પથાર્થં
કપિલતનુરિતિ ત્વં દેવહૂત્યૈ ન્યગાદીઃ ॥

ઇતિ સુવિદિતવેદ્યાં દેવ! હે દેવહૂતિં
કૃતનુતિમનુગૃહ્ય ત્વં ગતો યોગિસઙ્ઘૈઃ ।
વિમલમતિરથાસૌ ભક્તિયોગેન મુક્તા
ત્વમપિ જનહિતીર્થં વર્તસે પ્રાગુદીચ્યામ્ ॥

પરમ! કિમુ બહૂક્ત્યા ત્વત્પદામ્ભોજભક્તિં
સકલભયવિનેત્રીં સર્વકામોપનેત્રીમ્ ।
વદસિ ખલુ દૃઢં ત્વં ત્વદ્ વિધૂયામયાન્ મે
ગુરુપવનપુરેશ્! ત્વય્યુપાધત્સ્વ ભક્તિમ્ ॥