નારાયણીય · અધ્યાય 10.78

ત્રિદિવવર્ધકિવર્ધિતકૌશલં ત્રિદશ્દત્તસમસ્તવિભૂતિમત્ ।
જલધિમધ્યગતઃ ત્વમભૂષયો નવપુરં વપુરઞ્ચિતરોચિષા ॥

દદુષિ રેવતભુભૃતિ રેવતીં હલભૃતે તનયાં વિધિશાસનાત્ ।
મહિતમુત્સવઘોષમપૂપુષઃ સમુદિતૈર્મુદિતૈઃ સહ યાદવૈઃ ॥

અથ વિદર્ભસુતાં ખલુ રુક્મિણીં પ્રણયિણીં ત્વયિ દેવ! સહોદરઃ ।
સ્વયમદિત્સત ચેદિમહીભુજે સ્વતમસા તમસાધુમુપાશ્રયન્ ॥

ચિરધૃતપ્રણયા ત્વયિ બાલિકા સપદિ કાઙ્ક્ષિતભઙ્ગસમાકુલા ।
તવ નિવેદયિતું દ્વિજમાદિશત્ સ્વકદનં કદનઙ્ગવિનિર્મિતમ્ ॥

દ્વિજસુતોઽપિ ચ તૂર્ણમુપાયયૌ તવ પુરં હિ દુરાશદુરાસદમ્ ।
મુદમવાપ ચ સાદરપૂજિતઃ સ ભવતા ભવતાપહૃતા સ્વયમ્ ॥

સ ચ ભવન્તમવોચત કુણ્ડિને નૃપસુતા ખલુ રાજતિ રુક્મિણી ।
ત્વયિ સમુત્સુકયા નિજધીરતારહિતયા હિ તયા પ્રહિતોઽસ્મ્યહમ્ ॥

તવ હૃતાસ્મિ પુરૈવ ગુણૈરહં હરતિ માં કિલ ચેદિનૃપોઽધુના ।
અયિ કૃપાલય! પાલય મામિતિ પ્રજગદે જગદેકપતે! તયા ॥

અશરણાં યદિ માં ત્વમુપેક્ષસે સપદિ જીવિતમેવ જાહામ્યહમ્ ।
ઇતિ ગિરા સુતનોરતનોદ્ ભૃશં સુહૃદયં હૃદયં તવ કાતરમ્ ॥

અકથયસ્ત્વમથૈનમયે સખે! તદધિકા મમ મન્મથવેદના ।
નૃપસમક્ષમુપેત્ય હરામ્યહં તદયિ તાં દયિતામસિતેક્ષણામ્ ॥

પ્રમુદિતેન ચ તેન સમં તદા રથગતો લઘુ કુણ્ડિનમેયિવાન્ ।
ગુરુમરુત્પુરનાયક! મે ભવાન્ વિતનુતાં તનુતાં નિખિલાપદામ્ ॥