નારાયણીય · અધ્યાય 10.77

સૈરન્ધ્ર્યાસ્તદનુ ચિરં સ્મરાતુરાયા
યાતોઽભૂઃ સલલિતમુદ્ધવેન સાર્ધમ્ ।
આવાસં ત્વદુપગમોત્સવં સદૈવ
ધ્યાયન્ત્યાઃ પ્રતિદિનવાસસજ્જિકાયાઃ ॥

ઉપગતે ત્વયિ પૂર્ણમનોરથાં
પ્રમદસમ્ભ્રમકમ્પ્રપયોધરામ્ ।
વિવિધમાનનમાદધતીં મુદા
રહસિ તાં રમયઞ્ચકૃષે સુખમ્ ॥

પૃષ્ટા વરં પુનરસાવવૃણોદ્ વરાકી
ભૂયસ્ત્વયા સુરતમેવ નિશાન્તરેષુ ।
સાયુજ્યમસ્ત્વિતિ વદેદ્ બુધ એવ કામં
સામીપ્યમસ્ત્વનિશામિત્યપિ નાબ્રવીત્ કિમ્ ॥

તતો ભવાન્ દેવ! નિશાસુ કાસુચિન્-
મૃગીદૃશં તાં નિભૃતં વિનોદયન્ ।
અદાદુપશ્લોક ઇતિ શ્રુતં સુતં
સ નારદાત્ સાત્ત્વતતન્ત્રવિદ્ બભૌ ॥

અક્રૂરમન્દિરમિતોઽથ બલોદ્ધવાભ્યા-
મભ્યર્ચિતો બહુ નુતો મુદિતેન તેન ।
એનં વિસૃજ્ય વિપિનાગતપાણ્ડવેય-
વૃત્તં વિવેદિથ તથા ધૃતરાષ્ટ્રચેષ્ટામ્ ॥

વિઘાતાજ્જામાતુઃ પરમસુહૃદો ભોજનૃપતેર્-
જરાસન્ધે રુન્ધત્યનવધિરુષાન્ધેઽથ મથુરામ્ ।
રથાદ્યૈર્દ્યોલબ્ધૈઃ કતિપયબલસ્ત્વં બલયુત-
સ્ત્રયોવિંશત્યક્ષૌહિણિ તદુપનીતં સમહૃથાઃ ॥

બદ્ધં બલાદથ બલેન બલોત્તરં ત્વં
ભૂયો બલોદ્યમરસેન મુમોચિથૈનમ્ ।
નિશ્શેષદિગ્જયસમાહૃતવિશ્વસૈન્યાત્
કોઽન્યસ્તતો હિ બલપૌરુષવાંસ્તદાનીમ્ ॥

ભગ્નઃ સ લગ્નહૃદયોઽપિ નૃપૈઃ પ્રણુન્નો
યુદ્ધં ત્વયા વ્યધિત ષોડશકૃત્વ એવમ્ ।
અક્ષૌહિણીઃ શિવ શિવાસ્ય જઘન્થ વિષ્ણો!
સમ્ભૂય સૈકનવતિત્રિશતં તદાનીમ્ ॥

અષ્ટાદશેઽસ્ય સમરે સમુપેયુષિ ત્વં
દૃષ્ટ્વા પુરોઽથ યવનં યવનત્રિકોટ્યા ।
ત્વષ્ટ્રા વિધાપ્ય પુરમાશુ પયોધિમધ્યે
તત્રાથ યોગબલતઃ સ્વજનાનનૈષીઃ ॥

પદ્ભ્યાં ત્વં પદ્મમાલી ચકિત્ ઇવ પુરાન્નિર્ગતો ધાવમાનો
મ્લેચ્છેશેનાનુયાતો વધસુકૃતવિહીનેન શૈલે ન્યલૈષીઃ ।
સુપ્તેનાઙ્ઘ્ર્યાહતેન દ્રુતમથ મુચુકુન્દેન ભસ્મીકૃતેઽસ્મિન્
ભૂપાયાસ્મૈ ગુહાન્તે સુલલિતવપુષા તસ્થિષે ભક્તિભાજે ॥

એક્ષ્વાકોઽહં વિરક્તોઽસ્મ્યખિલનૃપસુખે ત્વત્પ્રસાદૈકકાઙ્ક્ષી
હા દેવેતિ સ્તુવન્તં વરવિતતિષુ તં નિસ્પૃહં વીક્ષ્ય હૃષ્યન્ ।
મુક્તેસ્તુલ્યાં ચ ભક્તિં ધુતસકલમલં મોક્ષમપ્યાશુ દત્ત્વા
કાર્યં હિંસાવિશુદ્ધ્યૈ તપ ઇતિ ચ તદા પ્રાર્થ લોકપ્રતીત્યૈ ॥

તદનુ મથુરાં ગત્વા હત્વા ચમૂં યવનાહૃતાં
મગધપતિના માર્ગે સૈન્યૈઃ પુરેવ નિવારિતઃ ।
ચરમવિજયં દર્પાયાસ્મૈ પ્રદાય પલાયિતો
જલધિનગરીં યાતો વાતાલયેશ્વર! પાહિ મામ્ ॥