નારાયણીય · અધ્યાય 10.79

બલસમેતબલાનુગતો ભવાન્ પુરમગાહત ભીષ્મકમાનિતઃ ।
દ્વિજસુતં ત્વદુપાગમવાદિનં ધૃતરસા તરસા પ્રણનામ સા ॥

ભુવનકાન્તમવેક્ષ્ય ભવદ્વપુર્નૃપસુતસ્ય નિશમ્ય ચ ચેષ્ટિતમ્ ।
વિપુલખેદજુષાં પુરવાસિનાં સરુદિતૈરુદિતૈરગમન્નિશા ॥

તદનુ વન્દિતુમિન્દુમુખી શિવાં વિહિતમઙ્ગલભૂષણભાસુરા ।
નિરગમદ્ ભવદર્પિતજીવિતા સ્વપુરતઃ પુરતઃ સુભટાવૃતા ॥

કુલવધૂભિરુપેત્ય કુમારિકા ગિરિસુતાં પરિપૂજ્ય ચ સાદરમ્ ।
મુહુરયાચત તત્પદપઙ્કજે નિપતિતા પતિતાં તવ કેવલમ્ ॥

સમવલોક્ય કુતુહલસઙ્કુલે નૃપકુલે નિભૃતં ત્વયિ ચ સ્થિતે ।
નૃપસુતા નિરગાદ્ ગિરિજાલયાત્ સુરુચિરં રુચિરઞ્જિતદિઙ્મુખા ॥

ભુવનમોહનરૂપરુચા તદા વિવશિતાખિલરાજકદમ્બયા ।
ત્વમપિ દેવ! કટાક્ષવિમોક્ષણૈઃ પ્રમદયા મદયાઞ્ચકૃષે મનાક્ ॥

ક્વ તુ ગમિષ્યસિ ચન્દ્રમુખીતિ તાં સરસમેત્ય કરેણ હરન્ ક્ષણાત્ ।
સમધિરોપ્ય રથં ત્વમપાહૃથા ભુવિ તતો વિતતો નિનદો દ્વિષામ્ ॥

ક્વ નુ ગતઃ પશુપાલ ઇતિ ક્રુધા કૃતરણા યદુભિશ્ચ જિતા નૃપાઃ ।
ન તુ ભવાનુદચાલ્યત તૈરહો પિશુનકૈઃ શુનકૈરિવ કેસરી ॥

તદનુ રુક્મિણમાગતમાહવે વધમુપેક્ષ્ય નિબધ્ય વિરૂપયન્ ।
હૃતમદં પરિમુચ્ય બલોક્તિભિઃ પુરમયા રમયા સહ કાન્તયા ॥

નવસમાગમલ્જ્જિતમાનસાં પ્રણયકૌતુકજૃમ્ભિતમન્મથામ્ ।
અરમયઃ ખલુ નાથ! યથાસુખં રહસિ તાં હસિતાંશુલસન્મુખીમ્ ॥

વિવિધનર્મ ભિરેવમહર્નિશં પ્રમદમાકલયન્ પુનરેકદા ।
ઋજુમતેઃ કિલ વક્રાગિરા ભવાન્ વરતનોરતનોદતિલોલતામ્ ॥

તદધિકૈરથ લાલનકૌશલૈઃ પ્રણયિનીમધિકં રમયન્નિમામ્ ।
અયિ મુકુન્દ! ભવચ્ચરિતાનિ નઃ પ્રગદતાં ગદતાન્તિમપાકુરુ ॥