નારાયણીય · અધ્યાય 10.74

સમ્પ્રાપ્તો મથુરાં દિનાર્ધવિગમે તત્રાન્તરસ્મિન્ વસ-
ન્નારામે વિહિતાશનઃ સખિજનૈર્યાતઃ પુરીમીક્ષિતુમ્ ।
પ્રાપો રાજપથં ચિરશ્રુતિધૃતવ્યાલોકકૌતૂહલ-
સ્ત્રીપુંસોદ્યદગણ્યપુણ્યનિગલૈરાકૃષ્યમાણો નુ કિમ્ ॥

ત્વત્પાદદ્દુતિવત્ સરાગસુભગાસ્ત્વન્મૂર્તિવદ્ યોષિતઃ
સમ્પ્રાપ્તા વિલસત્પયોધરરુચો લોલા ભવદ્દૃષ્ટિવત્ ।
હારિણ્યસ્ત્વદુરસ્સ્થલીવદયિ તે મન્દસ્મિતપ્રૌઢિવ-
ન્નૈર્મલ્યોલ્લસિતાઃ કચૌઘરુચિવદ્ રાજત્કલાપાશ્રિતાઃ ॥

તાસામાકલયન્નપાઙ્ગવલનૈર્મોદં પ્રહર્ષાદ્ભુત-
વ્યાલોલેષુ જનેષુ તત્ર રજકં કઞ્ચિત્ પટીં પ્રાર્થયન્ ।
કસ્તે દાસ્યતિ રાજકીયવસનં યાહીતિ તેનોદિતઃ
સદ્યસ્તસ્ય કરેણ શીર્ષમહૃથાઃ સોઽપ્યાપ પુણ્યાં ગતિમ્ ॥

ભૂયો વાયકમેકમાયતમતિં તોષેણ વેષોચિતં
દાશ્વાંસં સ્વપદં નિનેથ સુકૃતં કો વેદ જીવાત્મનામ્ ।
માલાભિઃ સ્તબકૈઃ સ્તવૈરપિ પુનર્માલાકૃતા માનિતો
ભક્તિં તેન વૃતાં દિદેશિથ પરાં લક્ષ્મીં ચ લક્ષ્મીપતે! ॥

કુબ્જામબ્જવિલોચનાં પથિ પુનર્દૃષ્ટ્વાઙ્ગરાગે તયા
દત્તે સાધુ કિલાઙ્ગરાગમદદાસ્તસ્યા મહાન્તં હૃદિ ।
ચિત્તસ્થામૃજુતામથ પ્રથયિતું ગાત્રેઽપિ તસ્યાઃ સ્ફુટં
ગૃહ્ણન્ મઞ્જુ કરેણ તામુદનયસ્તાવજ્જગત્સુન્દરીમ્ ॥

તાવન્નિશ્ચિતવૈભવાસ્તવ વિભો! નાત્યન્તપાપા જના
યત્કિઞ્ચિદ્ દદતે સ્મ શક્ત્યનુગુણં તામ્બુલમાલ્યાદિકમ્ ।
ગૃહ્ણાનઃ કુસુમાદિ કિઞ્ચન તદા માર્ગે નિબદ્ધાઞ્જલિર્-
નાતિષ્ઠં બત યતોઽદ્ય વિપુલામાર્તિં વ્રજામિ પ્રભો! ॥

એષ્યામીતિ વિમુક્તયાપિ ભગવન્નાલેપદાત્ર્યા તયા
દૂરાત્ કાતરયા નિરીક્ષિતગતિસ્ત્વં પ્રાવિશો ગોપુરમ્ ।
આઘોષાનુમિતત્વદાગમમહાહર્ષોલ્લલદ્દેવકી-
વક્ષોજપ્રગલત્પયોરસમિષાત્ ત્વત્કીર્તિરન્તર્ગતા ॥

આવિષ્ટો નગરીં મહોત્સવવતીં કોદણ્ડશાલાં વ્રજન્
માધુર્યેણ નુ તેજસા નુ પુરુષૈર્દૂરેણ દત્તાન્તરઃ ।
સ્રગ્ભિર્ભૂષિતમર્ચિતં વરધનુર્મા મેતિ વાદાત્ પુરઃ
પ્રાગૃહ્ણાઃ સમરોપયઃ કિલ સમાક્રાક્ષીરભાઙ્ક્ષીરપિ ॥

શ્વઃ કંસક્ષપણોત્સવસ્ય પુરતઃ પ્રારમ્ભતૂર્યોપમ-
શ્ચાપધ્વંસમહાધ્વનિસ્તવ વિભો! દેવાનરોમાઞ્ચયત્ ।
કંસસ્યાપિ ચ વેપથુસ્તદુદિતઃ કોદણ્ડખણ્ડદ્વયી-
ચણ્ડાભ્યાહતરક્ષિપૂરુષરવૈરુત્કૂલિતોઽભૂત્ ત્વયા ॥

શિષ્ટૈર્દુષ્ટજનૈશ્ચ દૃષ્ટમિહિમા પ્રીત્યા ચ ભીત્યા તતઃ
સંપશ્યન્ પુરસમ્પદં પ્રવિવરન્ સાયં ગતો વાટિકામ્ ।
શ્રીદામ્ના સહ રાધિકાવિરહજં ખેદં વદન્ પ્રસ્વપ-
ન્નાનન્દન્નવતારકાર્યઘટનાદ્ વાતેશ! સંરક્ષ મામ્ ॥