નારાયણીય · અધ્યાય 10.71

યત્નેષુ સર્વેષ્વપિ નાવકેશી કેશી સ ભોજેશિતુરિષ્ટબન્ધુઃ ।
ત્વં સિન્ધુજાવાપ્ય ઇતીવ મત્વા સંપ્રાપ્તવાન્ સિન્ધુજવાજિરૂપઃ ॥

ગન્ધર્વતામેષ ગતોઽપિ રૂક્ષૈર્નાદૈઃ સમુદ્વેજિતસર્વલોકઃ ।
ભવદ્વિલોકાવધિ ગોપવાટીં પ્રમર્દ્ય પાપઃ પુનરા પતત્ ત્વામ્ ॥

તાર્ક્ષ્યાર્પિતાઙ્ઘ્રેસ્તવ તાર્ક્ષ્ય એષ ચિક્ષેપ વક્ષોભુવિ નામ પાદમ્ ।
ભૃગોઃ પદાઘાતકથં નિશમ્ય સ્વેનાપિ શક્યં તદિતીવ મોહાત્ ॥

પ્રવઞ્ચયન્નસ્ય ખુરાઞ્ચલં દ્રાગમું ચ વિક્ષેપિથ દૂરદૂરમ્ ।
સંમૂર્છિતોઽપિ હતિમૂર્છિતેન ક્રોધોષ્મણા ખાદિતુમાદ્રુતસ્ત્વામ્ ॥

ત્વં વાહદણ્ડે કૃતધીશ્ચ બાહાદણ્ડં ન્યધાસ્તસ્ય મુખે તદાનીમ્ ।
તદ્વૃદ્ધિરુદ્ધશ્વસનો ગતાસુઃ સપ્તીભવન્નપ્યયમૈક્યમાગાત્ ॥

આલમ્ભમાત્રેણ પશોઃ સુરાણાં પ્રસાદકે નૂત્ન ઇવાશ્વમેધે ।
કૃતે ત્વયા હર્ષવશાત્ સુરેન્દ્રાસ્ત્વાં તુષ્ટુષુઃ કેશવનામધેયમ્ ॥

કંસાય તે શૌરિસુતત્વમુક્ત્વા તં તદ્વધોત્કં પ્રતિરુધ્ય વાચા ।
પ્રાપ્તેન કેશિક્ષપણાવસાને શ્રીનારદેન ત્વમભિષ્ટુતોઽભૂઃ ॥

કદાપિ ગોપૈઃ સહ કાનનાન્તે નિલાયનક્રીડનલોલુપં ત્વામ્ ।
મયાત્મજઃ પ્રાપ દુરન્તમાયો વ્યોમાભિધો વ્યોમચરોપરોધી ॥

સ ચોરપાલાયિતવલ્લવેષુ ચોરાયિતો ગોપશિશૂન્ પશૂંશ્ચ ।
ગુહાસુ કૃત્વા પિદધે શિલાભિસ્ત્વયા ચ બુદ્ધ્વા પરિમર્દિતોઽભૂત્ ॥

એવંવિધૈશ્ચાદ્ભુતકેલિભેદૈરાનન્દમૂર્છામતુલાં વ્રજસ્ય ।
પદે પદે નૂતનયન્નસીમં પરાત્મરૂપિન્! પવનેશ!પાયાઃ ॥