નારાયણીય · અધ્યાય 10.70

ઇતિ ત્વયિ રસાકુલં રમિતવલ્લભે વલ્લવાઃ
કદાપિ પુનરમ્બિકાકમિતુરમ્બિકાકાનને ।
સમેત્ય ભવતા સમં નિશિ નિષેવ્ય દિવ્યોત્સવં
સુખં સુષુપુરગ્રસીદ્ વ્રજપમુગ્રનાગસ્તદા ॥

સમુન્મુખમથોલ્મુકૈરભિહતેઽપિ તસ્મિન્ બલા-
દમુઞ્ચતિ ભવત્પદે ન્યપતિ પાહિ પાહીતિ તૈઃ ।
તદા ખલુ પદા ભવાન્ સમુપગમ્ય પસ્પર્શ તં
બભૌ સ ચ નિજાં તનું સમુપસાદ્ય વૈદ્યાધરીમ્ ॥

સુદર્શનધર! પ્રભો! નનુ સુદર્શનાખ્યોઽસ્મ્યહં
સુનીન્ ક્વચિદપાહસં ત ઇહ માં વ્યધુર્વાહસમ્ ।
ભવત્પદસમર્પણાદમલતાં ગતોઽસ્મીત્યસૌ
સ્તુવન્ નિજપદં યયૌ વ્રજપદં ચ ગોપા મુદા ॥

કદાપિ ખલુ સીરિણા વિહરતિ ત્વયિ સ્ત્રીજનૈર્-
જહાર્ ધનદાનુગઃ સ કિલ શઙ્ખચૂડોઽબલાઃ ।
અતિદ્રુતમનુદ્રુતસ્તમથ મુક્તનારીજનં
રુરોજિથ શિરોમણિં હલભૃતે ચ તસ્યાદદાઃ ॥

દિનેષુ ચ સુહૃજ્જનૈઃ સહ વનેષુ લીલાપરં
મનોભવમનોહરં રસિતવેણુનાદામૃતમ્ ।
ભવન્તમમરીદૃશામમૃતપારણાદાયિનં
વિચિન્ત્ય કિમુ નાલપન્ વિરહતાપિતા ગોપિકાઃ ॥

ભોજરાજભૃતકસ્ત્વથ કશ્ચિત્ કષ્ટદુષ્ટપથદૃષ્ટિરરિષ્ટઃ ।
નિષ્ઠુરાકૃતિરપષ્ઠુનિનાદસ્તિષ્ઠતે સ્મ ભવતે વૃષરૂપી ॥

શાક્વરોઽથ જગતીધૃતિહારી મૂર્તિમેષ બૃહતીં પ્રદધાનઃ ।
પઙ્ક્તિમાશુ પરિઘૂર્ણ્ય પશૂનાં છન્દસાં નિધિમવાપ ભવન્તમ્ ॥

તુઙ્ગશૃઙ્ગમુખમાશ્વભિયન્તં સસઙ્ગૃહય્ય રભસાદભિયં તમ્ ।
ભદ્રરૂપમપિ દૈત્યમભદ્રં મર્દયન્નમદયઃ સુરલોકમ્ ॥

ચિત્રમદ્ય ભગવન્! વૃષઘાતાત્ સુસ્થિરાજનિ વૃષસ્થિતિરુર્વ્યામ્ ।
વર્ધતે ચ વૃષચેતસિ ભૂયાન્મોદ ઇત્યભિનુતોઽસિ સુરસ્ત્વમ્ ॥

ઔક્ષકાણિ! પરિધાવત દૂરં વીક્ષ્યતામયમિહોક્ષવિભેદી ।
ઇત્થમાત્તહસિતૈઃ સહ ગોપૈર્ગેહગસ્ત્વમવ વાતપુરેશ! ॥