નારાયણીય · અધ્યાય 10.67

સ્ફુરત્પરાનન્દરસાત્મકેન ત્વયા સમાસાદિતભોહલીલાઃ ।
અસીમમાનન્દભરં પ્રપન્ના મહાન્તમાપુર્મદમમ્બુજાક્ષ્યઃ ॥

નિલીયતેઽસૌ મયિ મય્યમાયં રમાપતિર્વિશ્વમનોભિરામઃ ।
ઇતિસ્મ સર્વાઃ કલિતાભિમાના નિરીક્ષ્ય ગોવિન્દ! તિરોહિતોઽભૂઃ ॥

રાધાભિધાં તાવદજાતગર્વામતિપ્રિયાં ગોપવધૂં મુરારે! ।
ભવાનુપાદાય ગતો વિદૂરં તયા સહ સ્વૈરવિહારકારી ॥

તિરોહિતેઽથ ત્વયિ જાતતાપાઃ સમં સમેતાઃ કમલાયતાક્ષ્યઃ ।
વને વને ત્વાં પરિમાર્ગયન્ત્યો વિષાદમાપુર્ભગવન્નપારમ્ ॥

હા ચૂત! હા ચમ્પક! કર્ણિકાર! હા મલ્લિકે! માલતિ! બાલવલ્લ્યઃ! ।
કિં વીક્ષિતો નો હૃદયૈકચોર ઇત્યાદિ તાસ્ત્વત્પ્રવણા વિલેપુઃ ॥

નિરીક્ષિતોઽયં સખિ! પઙ્કજાક્ષઃ પુરો મમેત્યાકુલમાલપન્તી ।
ત્વાં ભાવનાચક્ષુષિ વીક્ષ્ય કાચિત્ તાપં સખીનાં દ્વિગુણીચકાર ॥

ત્વદાત્મિકાસ્તા યમુનાતટાન્તે તવાનુચક્રુઃ કિલ ચેષ્ટિતાનિ ।
વિચિત્ય ભૂયોઽપિ તથૈવ માનાત્ ત્વયા વિયુક્તાં દદૃશુશ્ચ રાધામ્ ॥

તતઃ સમં તા વિપિને સમન્તાત્ તમોવતારાવધિ માર્ગયન્ત્યઃ ।
પુનર્વિમિશ્રા યમુનાતટાન્તે ભૃશં વિલેપુશ્ચ જગુર્ગુણાંસ્તે ॥

તથાવ્યથાસંકુલમાનસાનાં વ્રજાઙ્ગનાનાં કરુણૈકસિન્ધો! ।
જગત્ત્રયીમોહનમોહનાત્મા ત્વં પ્રાદુરાસીરયિ મન્દહાસી ॥

સન્દિગ્ધસન્ધર્શનમાત્મકાન્તં ત્વાં વીક્ષ્ય તન્વ્યઃ સહસા તદાનીમ્ ।
કિં કિં ન ચક્રુઃ પ્રમદાતિભારાત્ સ ત્વં ગદાત્ પાલય મારુતેશ! ॥