નારાયણીય · અધ્યાય 10.66

ઉપયાતાનાં સુદૃશાં કુસુમાયુધબાણપાતવિવશાનામ્ ।
અભિવાઞ્છિતં વિધાતું કૃતમતિરપિ તા જગાથ વામમિવ ॥

ગગનગતં મુનિનિવહં શ્રાવયિતું જગિથ કુલવધૂધર્મમ્ ।
ધર્મ્યં ખલુ તે વચનં કર્મ તુ નો નિર્મલસ્ય વિશ્વાસ્યમ્ ॥

આકર્ણ્ય તે પ્રતીપાં વાણીમેણીદૃશઃ પરં દીનાઃ ।
મા મા કરુણાસિન્ધો! પરિત્યજેત્યતિચિરં વિલેપુસ્તાઃ ॥

તાસાં રુદિતૈર્લપિતૈઃ કરુણાકુલમાનસો મુરારે! ત્વમ્ ।
તાભિઃ સમં પ્રવૃત્તો યમુનાપુલિનેષુ કામમભિરન્તુમ્ ॥

ચન્દ્રકરસ્યન્દલસત્સુન્દરયમુનાતટાન્તવીથીષુ ।
ગોપીજનોત્તરીયૈરાપાદિતસંસ્તરો ન્યષીદસ્ત્વમ્ ॥

સુમધુરનર્માલપનૈઃ કરસંગ્રહણૈશ્ચ ચુમ્બનોલ્લાસૈઃ ।
ગાઢાલિઙ્ગનસઙ્ગૈસ્ત્વમઙ્ગનાલોકમાકુલીચકૃષે ॥

વાસોહરણદિને યદ્ વાસોહરણં પ્રતિશ્રુતં તાસામ્ ।
તદપિ વિભો! રસવિવશસ્વાન્તાનાં કાન્તસુભ્રુવામદધાઃ ॥

કન્દલિતધર્મલેશં કુન્દમૃદુસ્મેરવક્ત્રપાથોજમ્ ।
નન્દસુત! ત્વાં ત્રિજગત્સુન્દરમુપગૂહ્ય નન્દિતા બાલાઃ ॥

વિરહેશ્વઙ્ગારમયઃ શૃઙ્ગારમયશ્ચ સઙ્ગમેઽપિ ત્વમ્ ।
નિતરામઙ્ગારમયસ્તત્ર પુનઃ સઙ્ગમેઽપિ ચિત્રમિદમ્ ॥

રાધાતુઙ્ગપયોધરસાધુપરિરમ્ભલોલુપાત્માનમ્ ।
આરાધયે ભવન્તં પવનપુરાધીશ! શમય સકલગદાન્ ॥