નારાયણીય · અધ્યાય 10.65

ગોપીજનાય કથિતં નિયમાવસાને
મરોત્સવં ત્વમથ સાધયિતું પ્રવૃત્તઃ ।
સાન્દ્રેણ ચાન્દ્રમહસા શિશિરીકૃતાશે
પ્રાપૂરયો મુરલિકાં યમુનાવનાન્તે ॥

સમ્ભૂર્છનાભિરુદિતસ્વરમણ્ડલાભિઃ
સમ્મૂર્છયન્તમખિલં ભુવનાન્તરાલમ્ ।
ત્વદ્વેણુનાદમુપકર્ણ્ય વિભો! તરુણ્યસ્-
તત્તાદૃશં કમપિ ચિત્તવિમોહમાપુઃ ॥

તા ગેહકૃત્યનિરતાસ્તનયપ્રસક્તાઃ
કાન્તોપસેવનપરાશ્ચ સરોરુહાક્ષ્યઃ ।
સર્વં વિસૃજ્ય મુરલીરવમોહિતાસ્તે
કાન્તારદેશમયિ કાન્તતનો! સમેતાઃ ॥

કાશ્ચિન્નિજાઙ્ગપરિભૂષણમાદધાના
વેણુપ્રણાદમુપકર્ણ્ય કૃતાર્ધભૂષાઃ ।
ત્વામાગતા નનુ તથૈવ વિભૂષિતાભ્યસ્-
તા એવ સંરુરુચિરે તવ લોચનાય ॥

હારં નિતમ્બભૂવિ કાચન ધારયન્તી
કાઞ્ચીં ચ કણ્ઠભુવિ દેવ! સમાગતા ત્વામ્ ।
હારિત્વમાત્મજઘનસ્ય મુકુન્દ! તુભ્યં
વ્યક્તં બભાષ ઇવ મુગ્ધસુખી વિશેષાત્ ॥

કાચિત્ કુચે પુનરસજ્જિતકઞ્ચુલીકા
વ્યામોહતઃ પરવધૂભિરલક્ષ્યમાણા ।
ત્વામાયયૌ નિરુપમપ્રણયાતિભાર-
રાજ્યાભિષેકવિધયે કલશીધરેવ ॥

કાશ્ચિદ્ ગૃહાત્ કિલ નિરેતુમપારયન્ત્યસ્-
ત્વામેવ દેવ! હૃદયે સુદૃઢં વિભાવ્ય ।
દેહં વિધૂય પરચિત્સુખરૂપમેકં
ત્વામાવિશન્ પરમિમા નનુ ધન્યધન્યાઃ ॥

જારાત્મના ન પરમાત્મતયા સ્મરન્ત્યો
નાર્યો ગતાઃ પરમહંસગતિં ક્ષણેન ।
તત્ ત્વાં પ્રકાશપરમાત્મતનું કથઞ્ચિ-
ચ્ચિત્તે વહન્નમૃતમશ્રમમશ્નુવીય ॥

અભ્યાગતાભિરભિતો વ્રજસુન્દરીભિર્-
મુગ્ધાસ્મિતાર્દ્રવદનઃ કરુણાવલોકી ।
નિસ્સીમકાન્તિજલધિસ્ત્વમવેક્ષ્યમાણો
વિશ્વૈકહૃદ્ય! હર મે પરમેશ! રોગાન્ ॥