નારાયણીય · અધ્યાય 10.50

તરલમધુકૃદ્બૃન્દે બૃન્દાવનેઽથ મનોહરે
પશુપશિશુભિઃ સાકં વત્સાનુપાલનલોલુપઃ ।
હલધરસખો દેવ! શ્રીમન્! વિચેરિથ ધારયન્
ગવલમુરલીવેત્રં નેત્રાભિરામતનુદ્યુતિઃ ॥

વિહિતજગતીરક્ષં લક્ષ્મીકરામ્બુજલીલિતં
દદતિ ચરણદ્વન્દ્વં બૃન્દાવને ત્વયિ પાવને ।
કિમિવ ન બભૌ સમ્પત્સમ્પૂરિતં તરુવલ્લરી-
સલિલધરણીગોત્રક્ષેત્રાદિકં કમલાપતે! ॥

વિલસદુલપે કાન્તારાન્તે સમીરણશીતલે
વિપુલયમુનાતીરે ગોવર્ધનાચલમૂર્ધસુ ।
લલિતમુરલીનાદઃ સઞ્ચારયન્ ખલુ વાત્સકં
ક્વચન દિવસે દૈત્યં વત્સાકૃતિં ત્વમુદૈક્ષથાઃ ॥

રભસવિલસત્પુચ્છં વિચ્છાયતોઽસ્ય વિલોકયન્
કિમપિ વલિતસ્કન્ધં રન્ધ્રપ્રતીક્ષમુદીક્ષિતમ્ ।
તમથ ચરણે બિભ્રદ્ વિભ્રામયન્ મુહુરુચ્ચકૈઃ
કુહચન મહાવૃક્ષે ચિક્ષેપિથ ક્ષતજીવિતમ્ ॥

નિપતતિ મહાદૈત્યે જાત્યા દુરાત્મનિ તત્ક્ષણં
નિપતનજવક્ષુણ્ણક્ષોણીરુહક્ષતકાનને ।
દિવિ પરમિલદ્બૃન્દા બૃન્દારકાઃ કુસુમોત્કરૈઃ
શિરસિ ભવતો હર્ષાદ્ વર્ષન્તિ નામ તદા હરે! ॥

સુરભિલતમા મૂર્ધન્યૂર્ધ્વં કુતઃ કુસુમાવલી
નિપતતિ તવેત્યુક્તો બાલૈઃ સહેલમુદૈરયઃ ।
ઝટિતિ દનુજક્ષેપેણોર્ધ્વં ગતસ્તરુમણ્ડલાત્
કુસુમનિકરઃ સોઽયં નૂનં સમેતિ શનૈરિતિ ॥

ક્વચન દિવસે ભૂયો ભૂયસ્તરેપરુષાતપે
તપનતનયાપાથઃ પાતું ગતા ભવદાદયઃ ।
ચલિતગરુતં પ્રેક્ષામાસુર્બકં ખલુ વિસ્મૃતં
ક્ષિતિધરગરુચ્છેદે કૈલાસશૈલમિવાપરમ્ ॥

પિબતિ સલિલં ગોપવ્રાતે ભવનતમભિદ્રુતઃ
સ કિલ નિગિનલન્નગ્નિપ્રખ્યં પુનર્દ્રુતમુદ્વમન્ ।
દલયિતુમગાત્ ત્રોટ્યાઃ કોટ્યા તદા યુ ભવાન્ વિભો!
ખલજનભિદાચુઞ્ચુશ્ચઞ્ચૂ પ્રગૃહ્ય દદાર તમ્ ॥

સપદિ સહજાં સન્દ્રષ્ટું વા મૃતાં ખલુ પૂતના-
મનુજમઘમપ્યગ્રે ગત્વા પ્રતીક્ષિતુમેવ વા ।
શમનનિલયં યાતે તસ્મિન્ બકે સુમનોગણે
કિરતિ સુમનોબૃન્દં બૃન્દાવનાદ્ ગૃહમૈયથાઃ ॥

લલિતમુરલીનાદં દૂરાન્નિશમ્ય વધૂજનૈસ્-
ત્વરિતમુપગમ્યારાદારૂઢમોદમુદીક્ષિતઃ ।
જનિતજનનીનન્દાનન્દઃ સમીરણમન્દિર-
પ્રથિતવસતે! શૌરે! દૂરીકુરુષ્વ મમામયાન્ ॥