નારાયણીય · અધ્યાય 10.51

કદાચન વ્રજશિશુભિઃ સમં ભવાન્
વનાશને વિહિતમતિઃ પ્રગેતરામ્ ।
સમાવૃતો બહુતરવત્સમણ્ડલૈઃ
સતેમનૈર્નિરગમદીશ! જેમનૈઃ ॥

વિનિર્યતસ્તવ ચરણામ્બુજદ્વયા-
દુદાઞ્ચિતં ત્રિભુવનપાવનં રજઃ ।
મહર્ષયઃ પુલકધરૈઃ કલેબરૈ-
રુદૂહિરે ધૃતભવદીક્ષણોત્સવાઃ ॥

પ્રચારયત્યવિરલશાદ્વલે તલે
પશૂન્ વિભો! ભવતિ સમં કુમારકૈઃ ।
અઘાસુરો ન્યરુણદઘાય વર્તનીં
ભયાનકઃ સપદિ શયાનકાકૃતિઃ ॥

મહાચલપ્રતિમતનોર્ગુહાનિભ-
પ્રસારિતપ્રથિતમુખસ્ય કાનને ।
મુખોદરં વિહરણકૌતુકાદ્ ગતાઃ
કુમારકાઃ કિમપિ વિદૂરગે ત્વયિ ॥

પ્રમાદતઃ પ્રવિશતિ પન્નગોદરં
ક્વથત્તનૌ પશુપકુલે સવાત્સકે ।
વિદન્નિદં ત્વમપિ વિવેશિથ પ્રભો!
સુહૃજ્જનં વિશરણામાશુ રક્ષિતુમ્ ॥

ગલેદરે વિપુલિતવર્ષ્મણા ત્વયા
મહોરગે લુઠતિ નિરુદ્ધમારુતે ।
દ્રુતં ભવાન્ વિદલિતકણ્ઠમણ્ડલો
વિમોચયન્ પશુપશૂન્ વિનિર્યયૌ ॥

ક્ષણં દિવિ ત્વદુપગમાર્થમાસ્થિતં
મહાસુરપ્રભવમહો મહો મહત્ ।
વિનિર્ગતે ત્વયિ તુ નિલીનમઞ્જસા
નભઃસ્હ્તલે નનૃતુરથો જગુઃ સુરાઃ ॥

સવિસ્મયૈઃ કમલભવાદિભિઃ સુરૈર્-
અનુદ્રુતસ્તદનુ ગતઃ કુમારકૈઃ ।
દિને પુનસ્તરુણદશામુપેયુષિ
સ્વકૈર્ભવાનતનુત ભોજનોત્સવમ્ ॥

વિષાણિકામપિ મુરલીં નિતમ્બકે
નિવેશયન્ કબલધરઃ કરામ્બુજે ।
પ્રહાસયન્ કલવચનૈઃ કુમારકાન્
બુભોજિથ ત્રિદશગણૈર્મુદા નુતઃ ॥

સુખાશનં ત્વિહ તવ ગોપમણ્ડલે
મખાશનાત્ પ્રિયમિવ દેવમણ્ડલે ।
ઇતિ સ્તુતસ્ત્રિદશવરૈર્જગત્પ્રભો!
મરુત્પુરીનિલય! ગદાત્ પ્રપાહિ મામ્ ॥