નારાયણીય · અધ્યાય 10.45

અયિ સબલ! મુરારે! પાણિજાનુપ્રચારૈઃ
કિમપિ ભવનભાગાન્ ભૂષયન્તૌ ભવન્તૌ ।
ચલિતચરણકઞ્જે મઞ્જુમઞ્જીરશિઞ્જા-
શ્રવણકુતુકભાજૌ ચેરતુશ્ચારુ વેગાત્ ॥

મૃદુ મૃદુ વિહસન્તાવુન્મિષદ્દન્તવન્તૌ
વદનપતિતકેશૌ દૃશ્યપાદાબ્જદેશૌ ।
ભુજગલિતકરાન્તવ્યાલગત્કઙ્કણાઙ્કૌ
મતિમહરતમુચ્ચૈઃ પશ્યતાં વિશ્વન્ ણામ્ ॥

અનુસરતિ જનૌઘે કૌતુકવ્યાકુલાક્ષે
કિમપિ કૃતનિનાદં વ્યાહસન્તૌ દ્રવન્તૌ ।
બલિતવદનપદ્મં પૃષ્ઠતો દત્તદૃષ્ટી
કિમિવ ન વિદધાથે કૌતુકં વાસુદેવ! ॥

દુતગતિષુ પતન્તાવુત્થિતૌ લિપ્તપઙ્કૌ
દિવિ મુનિભિરપઙ્કૈઃ સસ્મિતં વન્દ્યમાનૌ ।
દ્રુતમથ જનનીભ્યાં સાનુકમ્પં ગૃહીતૌ
મુહુરપિ પરિરબ્ધૌ દ્રાગ્ યુવાં ચુમ્બિતૌ ચ ॥

સ્નુતકુચભરમઙ્કે ધારયન્તી ભવન્તં
તરલમતિ યશોદા સ્તન્યદા ધન્યધન્યા ।
કપટપશુપ! મધ્યે મુગ્ધહાસાઙ્કુરં તે
દશનમુકુલહૃદ્યં વીક્ષ્યં વક્ત્રં જહર્ષ ॥

તદનુ ચરણચારી દારકૈઃ સાકમારા-
ન્નિલયતતિષુ ખેલન્ બાલચાપલ્યશાલી ।
ભવનશુકબિડાલાન્ વત્સકાંશ્ચાનુધાવન્
કથમપિ કૃતહાસૈર્ગોપકૈર્વારિતોઽભૂઃ ॥

હલધરસહિતસ્ત્વં યત્ર યત્રોપયાતો
વિવશપતિતનેત્રાસ્તત્ર તત્રૈવ ગોપ્યઃ ।
વિગલિતગૃહકૃત્યા વિસ્મૃતાપત્યભૃત્યા
મુરહર! મુહુરત્યન્તાકુલા નિત્યમાસન્ ॥

પ્રતિનવનવનીતં ગોપિકાદત્તમિચ્છન્
કલપદમુપગાયન્ કોમલં ક્વાપિ નૃત્યન્ ।
સદયયુવતિલોકૈરર્પિતં સર્પિરશ્નન્
ક્વચન નવવિપક્વં દુગ્ધમત્યાપિબસ્ત્વમ્ ॥

મમ ખલુ બલિગેહે યાચનં જાતમાસ્તામ્-
ઇહ પુનરબલાનામગ્રતો નૈવ કુર્વે ।
ઇતિ વિહિતમતિઃ કિં દેવ! સન્ત્યજ્ય યાચ્ઞાં
દધિઘૃતમહરસ્ત્વં ચારુણા ચોરણેન ॥

તવ દધિઘૃતમોષે ઘોષયોષાજનાના-
મભજત હૃદિ રોષો નાવકાશં ન શોકઃ ।
હૃદયમપિ મુષિત્વા હર્ષસિન્ધૌ ન્યધાસ્ત્વં
સ મમ શમય રોગાન્ વાતગેહાધિનાથ! ॥

શાખાગ્રેઽથ વિધું વિલોક્ય ફલમિત્યમ્બાં ચ તાતં મુહુઃ
સમ્પ્રાર્થ્યાથ તદા તદીયવચસા પ્રોત્ક્ષિપ્તબાહૌ ત્વયિ ।
ચિત્રં દેવ! શશી સ તે કરમગાત્ કિં બ્રૂમહે સમ્પત-
જ્જ્યોતિર્મણ્ડલપૂરિતાખિલવપુઃ પ્રાગા વિરાડ્રૂપતામ્ ॥

કિં કિં બતેદમિતિ સંભ્રમભાજમેનં
બ્રહ્માર્ણવે ક્ષણમમું પરિમજ્જ્ય તાતમ્ ।
માયાં પુનસ્તનયમોહમયીં વિતન્વ-
ન્નાનન્દચિન્મય! જગન્મય! પાહિ રોગાત્ ॥