નરસિંહપુરાણ · અધ્યાય 65

ત્વત્તો હિ શ્રોતુમ્ ઇચ્છામિ ગુહ્યક્ષેત્રાણિ વૈ હરેઃ
નામાનિ ચ સુગુહ્યાનિ વદ પાપહરાણિ ચ ॥

મન્દરસ્થં હરિં દેવં બ્રહ્મા પૃચ્છતિ કેશવમ્
ભગવન્તં દેવદેવં શઙ્ખચક્રગદાધરમ્ ॥

કેષુ કેષુ ચ ક્ષેત્રેષુ દ્રષ્ટવ્યો ઽસિ મયા હરે
ભક્તૈર્ અન્યૈઃ સુરશ્રેષ્ઠ મુક્તિકામૈર્ વિશેષતઃ ॥

યાનિ તે ગુહ્યનામાનિ ક્ષેત્રાણિ ચ જગત્પતે
તાન્ય્ અહં શ્રોતુમ્ ઇચ્છામિ ત્વત્તઃ પદ્માયતેક્ષણ ॥

કિં જપન્ સુગતિં યાતિ નરો નિત્યમ્ અતન્દ્રિતઃ
ત્વદ્ભક્તાનાં હિતાર્થાય તન્ મે વદ સુરેશ્વર ॥

શૃણુષ્વાવહિતો બ્રહ્મન્ ગુહ્યનામાનિ મે ઽધુના
ક્ષેત્રાણિ ચૈવ ગુહ્યાનિ તવ વક્ષ્યામિ તત્ત્વતઃ ॥

કોકામુખે તુ વારાહં મન્દરે મધુસૂદનમ્
અનન્તં કપિલદ્વીપે પ્રભાસે રવિનન્દનમ્ ॥

માલ્યોદપાને વૈકુણ્ઠં મહેન્દ્રે તુ નૃપાત્મજમ્
ઋષભે તુ મહાવિષ્ણું દ્વારકાયાં તુ ભૂપતિમ્ ॥

પાણ્ડુસહ્યે તુ દેવેશં વાસુરૂઢે જગત્પતિમ્
વલ્લીવટે મહાયોગં ચિત્રકૂટે નરાધિપમ્ ॥

નિમિષે પીતવાસં ચ ગવાં નિષ્ક્રમણે હરિમ્
શાલગ્રામે તપોવાસમ્ અચિન્ત્યં ગન્ધમાદને ॥

કુબ્જાગારે હૃષીકેશં ગન્ધદ્વારે પયોધરમ્
ગરુડધ્વજં તુ સકલે ગોવિન્દં નામ સાયકે ॥

વૃન્દાવને તુ ગોપાલં મથુરાયાં સ્વયંભુવમ્
કેદારે માધવં વિન્દ્યાદ્ વારાણસ્યાં તુ કેશવમ્ ॥

પુષ્કરે પુષ્કરાક્ષં તુ ધૃષ્ટદ્યુમ્ને જયધ્વજમ્
તૃણબિન્દુવને વીરમ્ અશોકં સિન્ધુસાગરે ॥

કસેરટે મહાબાહુમ્ અમૃતં તૈજસે વને
વિશ્વાસયૂપે વિશ્વઈશં નરસિંહં મહાવને ॥

હલાઙ્ગરે રિપુહરં દેવશાલાં ત્રિવિક્રમમ્
પુરુષોત્તમં દશપુરે કુબ્જકે વામનં વિદુઃ ॥

વિદ્યાધરં વિતસ્તાયાં વારાહે ધરણીધરમ્
દેવદારુવને ગુહ્યં કાવેર્યાં નાગશાયિનમ્ ॥

પ્રયાગે યોગમૂર્તિં ચ પયોષ્ણ્યાં ચ સુદર્શનમ્
કુમારતીર્થે કૌમારં લોહિતે હયશીર્ષકમ્ ॥

ઉજ્જયિન્યાં ત્રિવિક્રમં લિઙ્ગકૂટે ચતુર્ભુજમ્
હરિહરં તુ ભદ્રાયાં દૃષ્ટ્વા પાપાત્ પ્રમુચ્યતે ॥

વિશ્વરૂપં કુરુક્ષેત્રે મણિકુણ્ડે હલાયુધમ્
લોકનાથમ્ અયોધ્યાયાં કુણ્ડિને કુણ્ડિનેશ્વરમ્ ॥

ભાણ્ડારે વાસુદેવં તુ ચક્રતીર્થે સુદર્શનમ્
આઢ્યે વિષ્ણુપદં વિદ્યાચ્ *છૂકરે શૂકરં વિદુઃ ॥

બ્રહ્મેશં માનસે તીર્થે દણ્ડકે શ્યામલં વિદુઃ
ત્રિકૂટે નાગમોક્ષં ચ મેરુપૃષ્ઠે ચ ભાસ્કરમ્ ॥

વિરજં પુષ્પભદ્રાયાં બાલં કેરલકે વિદુઃ
યશસ્કરં વિપાશાયાં માહિષ્મત્યાં હુતાશનમ્ ॥

ક્ષીરાબ્ધૌ પદ્મનાભં તુ વિમલે તુ સનાતનમ્
શિવનદ્યાં શિવકરં ગયાયાં ચ ગદાધરમ્ ॥

સર્વત્ર પરમાત્માનં યઃ પશ્યતિ સ મુચ્યતે
અષ્ટષષ્ટિશ્ ચ નામાનિ કથિતાનિ મયા તવ ॥

ક્ષેત્રાણિ ચૈવ ગુહ્યાનિ કથિતાનિ વિશેષતઃ
એતાનિ મમ નામાનિ રહસ્યાનિ પ્રજાપતે ॥

યઃ પઠેત્ પ્રાતર્ ઉત્થાય શૃણુયાદ્ વાપિ નિત્યશઃ
ગવાં શતસહસ્રસ્ય દત્તસ્ય ફલમ્ આપ્નુયાત્ ॥

દિને દિને શુચિર્ ભૂત્વા નામાન્ય્ એતાનિ યઃ પઠેત્
દુઃસ્વપ્નં ન ભવેત્ તસ્ય મત્પ્રસાદાન્ ન સંશયઃ ॥

અષ્ટષષ્ટિસ્ તુ નામાનિ ત્રિકાલં યઃ પઠેન્ નરઃ
વિમુક્તઃ સર્વપાપેભ્યો મમ લોકે સ મોદતે ॥

દ્રષ્ટવ્યાનિ યથાશક્ત્યા ક્ષેત્રાણ્ય્ એતાનિ માનવૈઃ
વૈષ્ણવૈસ્ તુ વિશેષેણ તેષામ્ મુક્તિં દદામ્ય્ અહમ્ ॥

હરિં સમભ્યર્ચ્ય તદગ્રસંસ્થિતો હરિં સ્મરન્ વિષ્ણુદિને વિશેષતઃ
ઇમં સ્તવં યઃ પઠતે સ માનવઃ પ્રાપ્નોતિ વિષ્ણોર્ અમૃતાત્મકં પદમ્ ॥