નરસિંહપુરાણ · અધ્યાય 62

વર્ણાનામ્ આશ્રમાણાં ચ કથિતં લક્ષણં તવ
ભૂયઃ કથય રાજેન્દ્ર શુશ્રૂષા તત્ર કા નૃપ ॥

સ્નાત્વા વેશ્મનિ દેવેશમ્ અર્ચયેદ્ અચ્યુતં ત્વ્ ઇતિ
ત્વયોક્તં મમ વિપ્રેન્દ્ર તત્ કથં પૂજનં ભવેત્ ॥

યૈર્ મન્ત્રૈર્ અર્ચ્યતે વિષ્ણુર્ યેષુ સ્થાનેષુ વૈ મુને
તાનિ સ્થાનાનિ તાન્ મન્ત્રાંસ્ ત્વમ્ આચક્ષ્વ મહામુને ॥

અર્ચનં સંપ્રવક્ષ્યામિ વિષ્ણોર્ અમિતતેજસઃ
યત્ કૃત્વા મુનયઃ સર્વે પરં નિર્વાણમ્ આપ્નુયુઃ ॥

અગ્નૌ ક્રિયાવતાં દેવો હૃદિ દેવો મનીષિણામ્
પ્રતિમાસ્વ્ અલ્પબુદ્ધીનાં યોગિનાં હૃદયે હરિઃ ॥

અતો ઽગ્નૌ હૃદયે સૂર્યે સ્થણ્ડિલે પ્રતિમાસુ ચ
એતેષુ ચ હરેઃ સમ્યગ્ અર્ચનં મુનિભિઃ સ્મૃતમ્ ॥

તસ્ય સર્વમયત્વાચ્ ચ સ્થણ્ડિલે પ્રતિમાસુ ચ
આનુષ્ટુભસ્ય સૂક્તસ્ય વિષ્ણુસ્ તસ્ય ચ દેવતા ॥

પુરુષો યો જગદ્બીજં ઋષિર્ નારાયણઃ સ્મૃતઃ
દદ્યાત્ પુરુષસૂક્તેન યઃ પુષ્પાણ્ય્ અપ એવ ચ ॥

અર્ચિતં સ્યાજ્ જગત્ સર્વં તેન વૈ સચરાચરમ્
આદ્યયાવાહયેદ્ દેવમ્ ઋચા તુ પુરુષોત્તમમ્ ॥

દ્વિતીયયાસનં દદ્યાત્ પાદ્યં દદ્યાત્ તૃતીયયા
ચતુર્થ્યાર્ઘ્યઃ પ્રદાતવ્યઃ પઞ્ચમ્યાચમનીયકમ્ ॥

ષષ્ઠ્યા સ્નાનં પ્રકુર્વીત સપ્તમ્યા વસ્ત્રમ્ એવ ચ
યજ્ઞોપવીતમ્ અષ્ટમ્યા નવમ્યા ગન્ધમ્ એવ ચ ॥

દશમ્યા પુષ્પદાનં સ્યાદ્ એકાદશ્યા ચ ધૂપકમ્
દ્વાદશ્યા ચ તથા દીપં ત્રયોદશ્યાર્ચનં તથા ॥

ચતુર્દશ્યા સ્તુતિં કૃત્વા પઞ્ચદશ્યા પ્રદક્ષિણમ્
ષોડશ્યોદ્વાસનં કુર્યાચ્ *છેષકર્માણિ પૂર્વવત્ ॥

સ્નાનં વસ્ત્રં ચ નૈવેદ્યં દદ્યાદ્ આચનમીયકમ્
ષણ્માસાત્ સિદ્ધિમ્ આપ્નોતિ દેવદેવં સમર્ચયન્ ॥

સંવત્સરેણ તેનૈવ સાયુજ્યમ્ અધિગછતિ
હવિષાગ્નૌ જલે પુષ્પૈર્ ધ્યાનેન હૃદયે હરિમ્ ॥

અર્ચન્તિ સૂરયો નિત્યં જપેન રવિમણ્ડલે
આદિત્યમણ્ડલે દિવ્યં દેવદેવમ્ અનામયમ્
શઙ્ખચક્રગદાપાણિં ધ્યાત્વા વિષ્ણુમ્ ઉપાસતે ॥

ધ્યેયઃ સદા સવિતૃમણ્ડલમધ્યવર્તી નારાયણઃ સરસિજાસનસંનિવિષ્ટઃ
કેયૂરવાન્ મકરકુણ્ડલવાન્ કિરીટી હારી હિરણ્મયવપુર્ ધૃતશઙ્ખચક્રઃ ॥

એતત્ પઠન્ કેવલમ્ એવ સૂક્તં દિને દિને ભાવિતવિષ્ણુબુદ્ધિઃ
સ સર્વપાપં પ્રવિહાય વૈષ્ણવં પદં પ્રયાત્ય્ અચ્યુતતુષ્ટિકૃન્ નરઃ ॥

પત્રેષુ પુષ્પેષુ ફલેષુ તોયેષ્વ્ અક્રીતલભ્યેષુ સદૈવ સત્સુ
ભક્ત્યૈકલભ્યે પુરુષે પુરાણે મુક્ત્યૈ કિમર્થં ક્રિયતે ન યત્નઃ ॥

ઇત્ય્ એવમ્ ઉક્તઃ પુરુષસ્ય વિષ્ણોર્ અર્ચાવિધિસ્ તે ઽદ્ય મયા નૃપેન્દ્ર
અનેન નિત્યં કુરુ વિષ્ણુપૂજાં પ્રાપ્તું તદિષ્ટં યદિ વૈષ્ણવં પદમ્ ॥