નરસિંહપુરાણ · અધ્યાય 55

માર્કણ્ડેય કથં શુક્રઃ પુરા બલિમખે ગુરુઃ
વામનેન સ વિદ્ધાક્ષઃ સ્તુત્વા તલ્લબ્ધવાન્ કથમ્ ॥

વામનેન સ વિદ્ધાક્ષો બહુતીર્થેષુ ભાર્ગવઃ
જાહ્નવીસલિલે સ્થિત્વા દેવમ્ અભ્યર્ચ્ય વામનમ્ ॥

ઊર્ધ્વબાહુઃ સ દેવેશં શઙ્ખચક્રગદાધરમ્
હૃદિ સંચિન્ત્ય તુષ્ટાવ નરસિંહં સનાતનમ્ ॥

નમામિ દેવં વિશ્વેશં વામનં વિષ્ણુરૂપિણમ્
બલિદર્પહરં શાન્તં શાશ્વતં પુરુષોત્તમમ્ ॥

ધીરં શૂરં મહાદેવં શઙ્ખચક્રગદાધરમ્
વિશુદ્ધં જ્ઞાનસંપન્નં નમામિ હરિમ્ અચ્યુતમ્ ॥

સર્વશક્તિમયં દેવં સર્વગં સર્વભાવનમ્
અનાદિમ્ અજરં નિત્યં નમામિ ગરુડધ્વજમ્ ॥

સુરાસુરૈર્ ભક્તિમદ્ભિઃ સ્તુતો નારાયણઃ સદા
પૂજિતં ચ હૃષિકેશં તં નમામિ જગદ્ગુરુમ્ ॥

હૃદિ સંકલ્પ્ય યદ્રૂપં ધ્યાયન્તિ યતયઃ સદા
જ્યોતીરૂપમ્ અનૌપમ્યં નરસિંહં નમામ્ય્ અહમ્ ॥

ન જાનન્તિ પરં રૂપં બ્રહ્માદ્યા દેવતાગણાઃ
યસ્યાવતારરૂપાણિ સમર્ચન્તિ નમામિ તમ્ ॥

એતત્ સમસ્તં યેનાદૌ સૃષ્ટં દુષ્ટવધાત્ પુનઃ
ત્રાતં યત્ર જગલ્ લીનં તં નમામિ જનાર્દનમ્ ॥

ભક્તૈર્ અભ્યર્ચિતો યસ્ તુ નિત્યં ભક્તપ્રિયો હિ યઃ
તં દેવમ્ અમલં દિવ્યં પ્રણમામિ જગત્પતિમ્ ॥

દુર્લભં ચાપિ ભક્તાનાં યઃ પ્રયચ્છતિ તોષિતઃ
તં સર્વસાક્ષિણં વિષ્ણું પ્રણમામિ સનાતનમ્ ॥

ઇતિ સ્તુતો જગન્નાથઃ પુરા શુક્રેણ પાર્થિવ
પ્રાદુર્ બભૂવ તસ્યાગ્રે શઙ્ખચક્રગદાધરઃ ॥

ઉવાચ શુક્રમ્ એકાક્ષં દેવો નારાયણસ્ તદા
કિમર્થં જાહ્નવીતીરે સ્તુતો ઽહં તદ્ બ્રવીહિ મે ॥

દેવદેવ મયા પૂર્વમ્ અપરાધો મહાન્ કૃતઃ
તદ્દોષસ્યાપનુત્ત્યર્થં સ્તુતવાન્ અસ્મિ સાંપ્રતમ્ ॥

મમાપરાધાન્ નયનં નષ્ટમ્ એકં તવાધુના
સંતુષ્ટો ઽસ્મિ તતઃ શુક્ર સ્તોત્રેણાનેન તે મુને ॥

ઇત્ય્ ઉક્ત્વા દેવદેવેશસ્ તં મુનિં પ્રહસન્ન્ ઇવ
પાઞ્ચજન્યેન તચ્ચક્ષુઃ પસ્પર્શ ચ જનાર્દનઃ ॥

સ્પૃષ્ટમાત્રે તુ શઙ્ખેન દેવદેવેન શાર્ઙ્ગિણા
બભૂવ નિર્મલં ચક્ષુઃ પૂર્વવન્ નૃપસત્તમ ॥

એવં દત્ત્વા મુનેશ્ ચક્ષુઃ પૂજિતસ્ તેન માધવઃ
જગામાદર્શનં સદ્યઃ શુક્રો ઽપિ સ્વાશ્રમં યયૌ ॥

ઇત્ય્ એતદ્ ઉક્તં મુનિના મહાત્મના પ્રાપ્તં પુરા દેવવરપ્રસાદાત્
શુક્રેણ કિં તે કથયામિ રાજન્ પુનશ્ ચ માં પૃચ્છ મનોરથાન્તઃ ॥