નરસિંહપુરાણ · અધ્યાય 4

નવધા સૃષ્ટિર્ ઉત્પન્ના બ્રહ્મણો ઽવ્યક્તજન્મનઃ
કથં સા વવૃધે સૂત એતત્ કથય મે ઽધુના ॥

પ્રથમં બ્રહ્મણા સૃષ્ટા મરીચ્યાદય એવ ચ
મરીચિર્ અત્રિશ્ ચ તથા અઙ્ગિરાઃ પુલહઃ ક્રતુઃ ॥

પુલસ્ત્યશ્ ચ મહાતેજાઃ પ્રચેતા ભૃગુર્ એવ ચ
નારદો દશમશ્ ચૈવ વસિષ્ઠશ્ ચ મહામતિઃ ॥

સનકાદયો નિવૃત્તાખ્યે તે ચ ધર્મે નિયોજિતાઃ
પ્રવૃત્તાખ્યે મરીચ્યાદ્યા મુક્ત્વૈકં નારદં મુનિમ્ ॥

યો ઽસૌ પ્રજાપતિસ્ ત્વ્ અન્યો દક્ષનામાઙ્ગસંભવઃ
તસ્ય દૌહિત્રવંશેન જગદ્ એતચ્ ચરાચરમ્ ॥

દેવાશ્ ચ દાનવાશ્ ચૈવ ગન્ધર્વોરગપક્ષિણઃ
સર્વે દક્ષસ્ય કન્યાસુ જાતાઃ પરમધાર્મિકાઃ ॥

ચતુર્વિધાનિ ભૂતાનિ હ્ય્ અચરાનિ ચરાણિ ચ
વૃદ્ધિં ગતાનિ તાન્ય્ એવમ્ અનુસર્ગોદ્ભવાનિ તુ ॥

અનુસર્ગસ્ય કર્તારો મરીચ્યાદ્યા મહર્ષયઃ
વસિષ્ઠાન્તા મહાભાગ બ્રહ્મણો માનસોદ્ભવાઃ ॥

સર્ગે તુ ભુતાનિ ધિયશ્ ચ ખાનિ ખ્યાતાનિ સર્વં સૃજતે મહાત્મા
સ એવ પશ્ચાચ્ ચતુરાસ્યરૂપી મુનિસ્વરૂપી ચ સૃજત્ય્ અનન્તઃ ॥