નરસિંહપુરાણ · અધ્યાય 32

સહસ્રાનીકસ્ય હરેર્ અવતારાંશ્ ચ શાર્ઙ્ગિણઃ
સાંપ્રતં શ્રોતુમ્ ઇચ્છામિ તન્ મે વદ મહામતે ॥

હન્ત તે કથયિષ્યામિ ચરિતં તસ્ય ધીમતઃ
સહસ્રાનીકસ્ય હરેર્ અવતારાંશ્ ચ મે શૃણુ ॥

સહસ્રાનીકો ઽભિષિક્તો નિજરાજ્યે દ્વિજોત્તમૈઃ
પાલયામ્_અસ ધર્મેણ રાજ્યં સ તુ નૃપાત્મજઃ ॥

તસ્ય પાલયતો રાજ્યં રાજપુત્રસ્ય ધીમતઃ
ભક્તિર્ બભૂવ દેવેશે નરસિંહે સુરોત્તમે ॥

તં દ્રષ્ટુમ્ આગતઃ સાક્ષાદ્ વિષ્ણુભક્તં ભૃગુઃ પુરા
અર્ઘ્યપાદ્યાસનૈ રાજા તમ્ અભ્યર્ચ્યાબ્રવીદ્ ઇદમ્ ॥

પાવિતો ઽહં મુનિશ્રેષ્ઠ સાંપ્રતં તવ દર્શનાત્
ત્વદ્દર્શનમ્ અપુણ્યાનાં કલાવ્ અસ્મિન્ સુદુર્લભમ્ ॥

નરસિંહં પ્રતિષ્ઠાપ્ય દેવદેવં સનાતનમ્
આરાધયિતુમ્ ઇચ્છામિ વિધાનં તત્ર મે વદ ॥

અવતારાન્ અશેષાંશ્ ચ દેવદેવસ્ય ચક્રિણઃ
શ્રોતુમ્ ઇચ્છામિ સકલાંસ્ તાન્ પુણ્યાન્ અપિ મે વદ ॥

શૃણુ ભૂપાલપુત્ર ત્વં ન હિ કશ્ચિત્ કલૌ યુગે
હરૌ ભક્તિં કરોત્ય્ અત્ર નૃસિંહે ચાતિભક્તિમાન્ ॥

સ્વભાવાદ્ યસ્ય ભક્તિઃ સ્યાન્ નરસિંહે સુરોત્તમે
તસ્યારયઃ પ્રણશ્યન્તિ કાર્યસિદ્ધિશ્ ચ જાયતે ॥

ત્વમ્ અતીવ હરેર્ ભક્તઃ પાણ્ડુવંશે ઽપિ સત્તમઃ
તેન તે નિખિલં વક્ષ્યે શૃણુષ્વૈકાગ્રમાનસઃ ॥

યઃ કુર્યાચ્ છોભનં વેશ્મ નરસિંહસ્ય ભક્તિમાન્
સ સર્વપાપનિર્મુક્તો વિષ્ણુલોકમ્ અવાપ્નુયાત્ ॥

પ્રતિમાં લક્ષણોપેતાં નરસિંહસ્ય કારયેત્
સ સર્વપાપનિર્મુક્તો વિષ્ણુલોકમ્ અવાપ્નુયાત્ ॥

પ્રતિષ્ઠાં નરસિંહસ્ય યઃ કરોતિ યથાવિધિ
નિષ્કામો નરશાર્દૂલ દેહબાધાત્ પ્રમુચ્યતે ॥

નરસિંહં પ્રતિષ્ઠપ્ય યઃ પૂજામ્ આચરેન્ નરઃ
તસ્ય કામાઃ પ્રસિધ્યન્તિ પરમં પદમ્ આપ્નુયાત્ ॥

બ્રહ્માદયઃ સુરાઃ સર્વે વિષ્ણુમ્ આરાધ્ય તે પુરા
સ્વં સ્વં પદમ્ અનુપ્રાપ્તાઃ કેશવસ્ય પ્રસાદતઃ ॥

યે યે નૃપવરા રાજન્ માન્ધાતૃપ્રમુખા નૃપાઃ
તે તે વિષ્ણું સમારાધ્ય સ્વર્ગલોકમ્ ઇતો ગતાઃ ॥

યસ્ તુ પૂજયતે નિત્યં નરસિંહં સુરેશ્વરમ્
સ સ્વર્ગમોક્ષભાગી સ્યાન્ નાત્ર કાર્યા વિચારણા ॥

તસ્માદ્ એકમના ભૂત્વા યાવજ્જીવં પ્રતિજ્ઞયા
અર્ચનાન્ નરસિંહસ્ય પ્રાપ્સ્યસે સ્વાભિવાઞ્છિતમ્ ॥

વિધિવત્ સ્થાપયેદ્ યસ્ તુ કારયિત્વા જનાર્દનમ્
ન તુ નિર્ગમનં તસ્ય વિષ્ણુલોકાદ્ ભવેન્ નૃપ ॥

નરો નૃસિંહં તમ્ અનન્તવિક્રમં સુરાસુરૈર્ અર્ચિતપાદપઙ્કજમ્
સંસ્થાપ્ય ભક્ત્યા વિધિવચ્ ચ પૂજયેત્ પયાતિ સાક્ષાત્ પરમેશ્વરં હરિમ્ ॥