નરસિંહપુરાણ · અધ્યાય 11

પ્રણિપત્ય જગન્નાથં ચરાચરગુરું હરિમ્
માર્કણ્ડેયો ઽભિતુષ્ટાવ ભોગપર્યઙ્કશાયિનમ્ ॥

પ્રસીદ ભગવન્ વિષ્ણો પ્રસીદ પુરુષોત્તમ
પ્રસીદ દેવદેવેશ પ્રસીદ ગરુડધ્વજ ॥

પ્રસીદ વિષ્ણો લક્ષ્મીશ પ્રસીદ ધરણીધર
પ્રસીદ લોકનાથાદ્ય પ્રસીદ પરમેશ્વર ॥

પ્રસીદ સર્વદેવેશ પ્રસીદ કમલેક્ષણ
પ્રસીદ મન્દરધર પ્રસીદ મધુસૂદન ॥

પ્રસીદ સુભગાકાન્ત પ્રસીદ ભુવનાધિપ
પ્રસીદાદ્ય મહાદેવ પ્રસીદ મમ કેશવ ॥

જય કૃષ્ણ જયાચિન્ત્ય જય વિષ્ણો જયાવ્યય
જય વિશ્વ જયાવ્યક્ત જય વિષ્ણો નમો ઽસ્તુ તે ॥

જય દેવ જયાજેય જય સત્ય જયાક્ષર
જય કાલ જયેશાન જય સર્વ નમો ઽસ્તુ તે ॥

જય યજ્ઞપતે નાથ જય વિશ્વપતે વિભો
જય ભૂતપતે નાથ જય સર્વપતે વિભો ॥

જય વિશ્વપતે નાથ જય દક્ષ નમો ઽસ્તુ તે
જય પાપહરાનન્ત જય જન્મજરાપહ ॥

જય ભદ્રાતિભદ્રેશ જય ભદ્ર નમો ઽસ્તુ તે
જય કામદ કાકુત્સ્થ જય માનદ માધવ ॥

જય શંકર દેવેશ જય શ્રીશ નમો ઽસ્તુ તે
જય કુઙ્કુમરક્તાભ જય પઙ્કજલોચન ॥

જય ચન્દનલિપ્તાઙ્ગ જય રામ નમો ઽસ્તુ તે
જય દેવ જગન્નાથ જય દેવકિનન્દન ॥

જય સર્વગુરો જ્ઞેય જય શંભો નમો ઽસ્તુ તે
જય સુન્દર પદ્માભ જય સુન્દરિવલ્લભ
જય સુન્દરસર્વાઙ્ગ જય વન્દ્ય નમો ઽસ્તુ તે ॥

જય સર્વદ સર્વેશ જય શર્મદ શાશ્વત
જય કામદ ભક્તાનાં પ્રભવિષ્ણો નમો ઽસ્તુ તે ॥

નમઃ કમલનાભાય નમઃ કમલમાલિને
લોકનાથ નમસ્ તે ઽસ્તુ વીરભદ્ર નમો ઽસ્તુ તે ॥

નમસ્ ત્રૈલોક્યનાથાય ચતુર્મૂર્તે જગત્પતે
નમો દેવાધિદેવાય નમો નારાયણાય તે ॥

નમસ્ તે વાસુદેવાય નમસ્ તે પીતવાસસે
નમસ્ તે નરસિંહાય નમસ્ તે શાર્ઙ્ગધારિણે ॥

નમઃ કૃષ્ણાય રામાય નમશ્ ચક્રાયુધાય ચ
નમઃ શિવાય દેવાય નમસ્ તે ભુવનેશ્વર ॥

નમો વેદાન્તવેદ્યાય નમો ઽનન્તાય વિષ્ણવે
નમસ્ તે સકલાધ્યક્ષ નમસ્ તે શ્રીધરાઅચ્યુત ॥

લોકાધ્યક્ષ જગત્પૂજ્ય પરમાત્મન્ નમો ઽસ્તુ તે
ત્વં માતા સર્વલોકાનાં ત્વમ્ એવ જગતઃ પિતા ॥

ત્વમ્ આર્તાનાં સુહૃન્ મિત્રં પ્રિયસ્ ત્વં પ્રપિતામહઃ
ત્વં ગુરુસ્ ત્વં ગતિઃ સાક્ષી ત્વં પતિસ્ ત્વં પરાયણઃ ॥

ત્વં ધ્રુવસ્ ત્વં વષટ્કર્તા ત્વં હવિસ્ ત્વં હુતાશનઃ
ત્વં શિવસ્ ત્વં વસુર્ ધાતા ત્વં બ્રહ્મા ત્વં સુરેશ્વરઃ ॥

ત્વં યમસ્ ત્વં રવિર્ વાયુસ્ ત્વં જલં ત્વં ધનેશ્વરઃ
ત્વં મનુસ્ ત્વમ્ અહોરાત્રં ત્વં નિશા ત્વં નિશાકરઃ
ત્વં ધૃતિસ્ ત્વં શ્રિયઃ કાન્તિસ્ ત્વં ક્ષમા ત્વં ધરાધરઃ ॥

ત્વં કર્તા જગતામ્ ઈશસ્ ત્વં હન્તા મધુસૂદન
ત્વમ્ એવ ગોપ્તા સર્વસ્ય જગતસ્ ત્વં ચરાચર ॥

કરણં કારણં કર્તા ત્વમ્ એવ પરમેશ્વરઃ
શઙ્ખચક્રગદાપાણે ભો સમુદ્ધર માધવ ॥

પ્રિય પદ્મપલાશાક્ષ શેષપર્યઙ્કશાયિનમ્
ત્વામ્ એવ ભક્ત્યા સતતં નમામિ પુરુષોત્તમમ્ ॥

શ્રીવત્સાઙ્ક જગદ્બીજં શ્યામલં કમલેક્ષણમ્
નમામિ તે વપુર્ દેવ કલિકલ્મષનાશનમ્ ॥

લક્ષ્મીધરમ્ ઉદારાઙ્ગં દિવ્યમાલાવિભૂષિતમ્
ચારુપૃષ્ઠં મહાબાહું ચારુભૂષણભૂષિતમ્ ॥

પદ્મનાભં વિશાલાક્ષં પદ્મપત્ત્રનિભેક્ષણમ્
દીર્ઘતુઙ્ગમહાઘ્રાણં નીલજીમૂતસંનિભમ્ ॥

દીર્ઘબાહું સુગુપ્તાઙ્ગં રત્નહારોજ્જ્વલોરસમ્
સુભ્રૂલલાટમુકુટં સ્નિગ્ધદન્તં સુલોચનમ્ ॥

ચારુબાહું સુતામ્રૌષ્ઠં રત્નોજ્જ્વલિતકુણ્ડલમ્
વૃત્તકણ્ઠં સુપીનાંસં સરસં શ્રીધરં હરિમ્ ॥

સુકુમારમ્ અજં નિત્યં નીલકુઞ્ચિતમૂર્ધજમ્
ઉન્નતાંસં મહોરસ્કં કર્ણાન્તાયતલોચનમ્ ॥

હેમારવિન્દવદનમ્ ઇન્દિરાયનમ્ ઈશ્વરમ્
સર્વલોકવિધાતારં સર્વપાપહરં હરિમ્ ॥

સર્વલક્ષણસંપન્નં સર્વસત્ત્વમનોરમમ્
વિષ્ણુમ્ અચ્યુતમ્ ઈશાનમ્ અનન્તં પુરુષોત્તમમ્ ॥

નતો ઽસ્મિ મનસા નિત્યં નારાયણમ્ અનામયમ્
વરદં કામદં કાન્તમ્ અનન્તં સૂનૃતં શિવમ્ ॥

નમામિ શિરસા વિષ્ણો સદા ત્વાં ભક્તવત્સલ
અસ્મિન્ન્ એકાર્ણવે ઘોરે વાયુસ્કમ્ભિતચઞ્ચલે ॥

અનન્તભોગશયને સહસ્રફણશોભિતે
વિચિત્રશયને રમ્યે સેવિતે મન્દવાયુના ॥

ભુજપઞ્ચરસંસક્ત કમલાલયસેવિતમ્
ઇહ ત્વાં મનસા સર્વમ્ ઇદાનીં દૃષ્ટવાન્ અહમ્ ॥

ઇદાનીં તુ સુદુઃખાર્તો માયયા તવ મોહિતઃ
એકોદકે નિરાલમ્બે નષ્ટસ્થાવરજઙ્ગમે ॥

શૂન્યે તમસિ દુષ્પારે દુઃખપઙ્કે નિરામયે
શીતાતપજરારોગ શોકતૃષ્ણાદિભિઃ સદા ॥

પીડિતો ઽસ્મિ ભૃશં તાત સુચિરં કાલમ્ અચ્યુત
શોકમોહગ્રહગ્રસ્તો વિચરન્ ભવસાગરે ॥

ઇહાદ્ય વિધિના પ્રાપ્તસ્ તવ પાદાબ્જસંનિધૌ
એકાર્ણવે મહાઘોરે દુસ્તરે દુઃખપીડિતઃ ॥

ચિરભ્રમપરિશ્રાન્તસ્ ત્વામ્ અદ્ય શરણં ગતઃ
પ્રસીદ સુમહામાય વિષ્ણો રાજીવલોચન ॥

વિશ્વયોને વિશાલાક્ષ વિશ્વાત્મન્ વિશ્વસંભવ
અનન્યશરણં પ્રાપ્તમ્ અતો ઽત્ર કુલનન્દન ॥

ત્રાહિ માં કૃપયા કૃષ્ણ શરણાગતમ્ આતુરમ્
નમસ્ તે પુણ્ડરીકાક્ષ પુરાણપુરુષોત્તમ ॥

અઞ્જનાભ હૃષીકેશ માયામય નમો ઽસ્તુ તે
મામ્ ઉદ્ધર મહાબાહો મગ્ને સંસારસાગરે ॥

ગહ્વરે દુસ્તરે દુઃખ ક્લિષ્ટે ક્લેશમહાગ્રહૈઃ
અનાથં કૃપણં દીનં પતિતં ભવસાગરે
માં સમુદ્ધર ગોવિન્દ વરદેશ નમો ઽસ્તુ તે ॥

નમસ્ ત્રૈલોક્યનાથાય હરયે ભૂધરાય ચ
દેવદેવ નમસ્ તે ઽસ્તુ શ્રીવલ્લભ નમો ઽસ્તુ તે ॥

કૃષ્ણ કૃષ્ણ કૃપાલુસ્ ત્વમ્ અગતીનાં ગતિર્ ભવાન્
સંસારાર્ણવમગ્નાનાં પ્રસીદ મધુસૂદન ॥

ત્વામ્ એકમ્ આદ્યં પુરુષં પુરાણં જગત્પતિં કારણમ્ અચ્યુતં પ્રભુમ્
જનાર્દનં જન્મજરાર્તિનાશનં સુરેશ્વરં સુન્દરમ્ ઇન્દિરાપતિમ્ ॥

બૃહદ્ભુજં શ્યામલકોમલં શુભં વરાનનં વારિજપત્ત્રનેત્રમ્
તરંગભઙ્ગાયતકુન્તલં હરિં સુકાન્તમ્ ઈશં પ્રણતો ઽસ્મિ શાશ્વતમ્ ॥

સા જિહ્વા યા હરિં સ્તૌતિ તચ્ ચિત્તં યત્ ત્વદર્પિતમ્
તાવ્ એવ કેવલૌ શ્લાઘ્યૌ યૌ ત્વત્પૂજાકરૌ કરૌ ॥

જન્માન્તરસહસ્રેષુ યન્ મયા પાતકં કૃતમ્
તન્ મે હર ત્વં ગોવિન્દ વાસુદેવેતિ કીર્તનાત્ ॥

ઇતિ સ્તુતસ્ તતો વિષ્ણુર્ માર્કણ્ડેયેન ધીમતા
સંતુષ્ટઃ પ્રાહ વિશ્વાત્મા તં મુનિં ગરુડધ્વજઃ ॥

પ્રીતો ઽસ્મિ તપસા વિપ્ર સ્તુત્યા ચ ભૃગુનન્દન
વરં વૃણીષ્વ ભદ્રં તે પ્રાર્થિતં દદ્મિ તે વરમ્ ॥

ત્વત્પાદપદ્મે દેવેશ ભક્તિં મે દેહિ સર્વદા
યદિ તુષ્ટો મમાદ્ય ત્વમ્ અન્યદ્ એકં વૃણોમ્ય્ અહમ્ ॥

સ્તોત્રેણાનેન દેવેશ યસ્ ત્વાં સ્તોષ્યતિ નિત્યશઃ
સ્વર્લોકવસતિં તસ્ય દેહિ દેવ જગત્પતે ॥

દીર્ઘાયુષ્ટ્વં તુ યદ્ દત્તં ત્વયા મે તપ્યતઃ પુરા
તત્ સર્વં સફલં જાતમ્ ઇદાનીં તવ દર્શનાત્ ॥

વસ્તુમ્ ઇચ્છામિ દેવેશ તવ પાદાબ્જમ્ અર્ચયન્
અત્રૈવ ભગવન્ નિત્યં જન્મમૃત્યુવિવર્જિતઃ ॥

મય્ય્ અસ્તુ તે ભૃગુશ્રેષ્ઠ ભક્તિર્ અવ્યભિચારિણી
ભક્ત્યા મુક્તિર્ ભવત્ય્ એવ તવ કાલેન સત્તમ ॥

યસ્ ત્વ્ ઇદં પઠતે સ્તોત્રં સાયં પ્રાતસ્ તવેરિતમ્
મયિ ભક્તિં દૃઢાં કૃત્વા મમ લોકે સ મોદતે ॥

યત્ર યત્ર ભૃગુશ્રેષ્ઠ સ્થિતસ્ ત્વં માં સ્મરિષ્યસિ
તત્ર તત્ર સમેષ્યામિ દાન્તો ભક્તવશો ઽસ્મિ ભોઃ ॥

ઇત્ય્ ઉક્ત્વા તં મુનિશ્રેષ્ઠં માર્કણ્ડેયં સ માધવઃ
વિરરામ સ સર્વત્ર પશ્યન્ વિષ્ણું યતસ્ તતઃ ॥

ઇતિ તે કથિતં વિપ્ર ચરિતં તસ્ય ધીમતઃ
માર્કણ્ડેયસ્ય ચ મુનેસ્ તેનૈવોક્તં પુરા મમ ॥

યે વિષ્ણુભક્ત્યા ચરિતં પુરાણં ભૃગોસ્ તુ પૌત્રસ્ય પઠન્તિ નિત્યમ્
તે મુક્તપાપા નરસિંહલોકે વસન્તિ ભક્તૈર્ અભિપૂજ્યમાનાઃ ॥