નારદ પુરાણ · અધ્યાય 2.13

ઇતિ શ્રીબૃહન્નારદીયપુરાણોત્તરભાગે સમયકરણં નામ દ્વાદશો ઽધ્યાયઃ
વસિષ્ઠ ઉવાચ
ઉત્થાપયિત્વા રાજાનં મોહિની વાક્યમબ્રવીત્ ।
મા શઙ્કાં કુરુ રાજેન્દ્ર કુમારીં વિદ્ધ્યકલ્મષામ્

ઉદ્વહસ્વ મહીપાલ ગૃહ્યોક્તવિધિના હિ મામ્ ।
અનૂઢા કન્યકા રાજન્ યદિ ગર્ભં બિભર્તિ હિ

પ્રસૂયતિ દિવાકીર્તિં સર્વવર્ણવિગર્હિતમ્ ।
ચાણ્ડાલયોનયસ્તિસ્રઃ પુરાણે કવયો વિદુઃ

કુમારીસંભવાત્વેકા સગોત્રાપિ દ્વિતીયકા ।
બ્રાહ્મણ્યાં શૂદ્રજનિતા તૃતીયા નૃપપુઙ્ગવ

એતસ્માત્કારણાદ્રાજન્ કુમારીં માં સમુદ્વહ ।
તતસ્તાં ચપલાપાઙ્ગીં નૃપો રુક્માઙ્ગદો ગિરૌ

ઉદ્વાહ્ય વિધિના યુક્તસ્તસ્થૌ રાજા હસન્નિવ ।
રાજોવાચ
ન તથા ત્રિદિવપ્રાપ્તિઃ પ્રીણયેન્માં વરાનને

તવપ્રાપ્તિર્યથા દેવિ મન્દરે ઽસ્મિન્સુખાય વૈ ।
મન્યે પુરન્દરાદ્દેવિ હ્યાત્માનમધિકં ક્ષિતૌ

ત્રૈલોક્યસુન્દરીં પ્રાપ્ય ભાર્યાં ત્વાં ચારુલોચને ।
તસ્માદ્યદનુકૂલં તે તત્કરોમિ પ્રશાધિ મામ્

ઇહૈવ રમસે બાલે અથવા મન્દિરે મમ ।
મલયે મેરુશિખરે વને વા નન્દને વદ

તચ્છ્રુત્વા નૃપતેર્વાક્યં મોહિની મધુરં નૃપ ।
ઉવાચાનુશયં રાજન્વચનં પ્રીતિવર્દ્ધનમ્

સપત્નીનાં કટાક્ષાણાં ક્ષતાનિ નગરે મમ ।
ભવિષ્યન્તિ મહીપાલ કથં ગચ્છામિ તે પુરમ્

માસ્મ સીમન્તિની કાચિદ્ભવેદ્ધિ ક્ષિતિમણ્ડલે ।
યસ્યાઃ સપત્નીપ્રભવં દુઃખમામરણં ભવેત્

સાહં લબ્ધા મહીપાલ મનસા વશગા તવ ।
જ્ઞાત્વા સપત્નીપ્રભવં દુઃખં ભર્તા કૃતો મયા

વત્સ્યામિ પર્વતશ્રેષ્ઠે બહ્વાશ્ચર્યસમન્વિતે ।
ન ત્વં વસસિ રાજેન્દ્ર સંધ્યાવલ્યા વિના ક્વચિત્

તસ્યાસ્ત્વં વિરહે દુઃખી સપુત્રાયા ભવિષ્યસિ ।
દુઃખેન ભવતો રાજન્ભૂરિ દુઃખં ભવેન્મમ

યત્રૈવ ભવતઃ સૌખ્યં તત્રાહમપિ સંસ્થિતા ।
યત્ર ત્વં રંસ્યસે રાજંસ્તત્ર મે મન્દરો ગિરિઃ

ભર્તૃસ્થાને હિ વસ્તવ્યમૃદ્ધિહીને ઽપિ ભાર્યયા ।
સ મેરુઃ કાઞ્ચનમયઃ સન્નિધાને પ્રચક્ષતે

મનોરથો નામ મેરુર્યત્ર ત્વં રમસે વિભો ।
ભર્તૃસ્થાનં પરિત્યજ્ય સ્વપિતુર્વાપિ વર્જિતમ્

પિતૃસ્થાનાશ્રયરતા નારી તમસિ મજ્જતિ ।
સર્વધર્મવિહીનાપિ નારી ભવતિ સૂકરી

એવં જાનામ્યહં દોષં કથં વત્સ્યામિ મન્દરે ।
મમિષ્યામિત્વયા સાર્દ્ધમીશસ્ત્વં સુખદુઃખયોઃ

મોહિન્યાસ્તદ્વચઃ શ્રુત્વા રાજા સંહૃષ્ટમાનસઃ ।
પરિષ્વજ્ય વરારોહામિદં વચનમબ્રવીત્

ભાર્યાણાં મમ સર્વાસામુપરિષ્ટાદ્ભવિષ્યસિ ।
મા શઙ્કાં કુરુ વામોરુ યતો દુઃખં ભવિષ્યતિ

જીવિતાદધિકા સુભ્રુ ભવિષ્યસિ ગૃહે મમ ।
એહિ ગચ્છાવ તન્વઙ્ગિ સુખાય નગરં પ્રતિ

ભુઙ્ક્ષ્વ ભોગાન્મયા સાર્દ્ધં તત્રસ્થા સ્વેચ્છયા પ્રિયે

સા ત્વેવમુક્તા શશિગૌરવક્ત્રા રુક્માઙ્ગદેનાત્મવિનાશનાય ।
સંપ્રસ્થિતા નૂપુરગોષયુક્તા વિકર્ષયન્તી ગિરિજાતશોભામ્