નારદ પુરાણ · અધ્યાય 2.1

ઇતિ શ્રીબૃહન્નારદીયપુરાણે બૃહદુપાખ્યાને ચતુર્થપાદે પુરાણમહિમાવર્ણનં નામ પઞ્ચવિંશોત્તરશતતમો ઽધ્યાયઃ
સમાપ્તોયં બૃહન્નારદીયપુરાણસ્ય પૂર્વભાગઃ
શ્રીરાધામદનમોહનો જયતિ તરામ્
ઉત્તરભાગઃ
શ્રીગણેશાય નમઃ
શ્રીકૃષ્ણાય નમઃ
પાન્તુ વો જલદશ્યામાઃ શાર્ઙ્ગજ્યાઘાતકર્કશાઃ ।
ત્રૈલોક્યમણ્ડપસ્તંભાશ્ચત્વારો હરિબાહવઃ

સુરદ સુરશિરોરત્નનિઘૃષ્ટમણિરઞ્જિતમ્ ।
હરિપાદાંબુજદ્વન્દ્વમભીષ્ટપ્તદમસ્તુ નઃ

માન્ધાતોવાચ
પાપેન્ધનસ્ય ઘોરસ્ય શુષ્કાર્દ્રસ્ય દ્વિજોત્તમ ।
કોવહ્નિર્દહતે તસ્ય તદ્ભવાન્વક્તુમર્હતિ

નાજ્ઞાતં ત્રિષુ લોકેષુ ચતુર્મુખસમુદ્ભવ ।
વિદ્યતે તવ વિપ્રેન્દ્ર ત્રિવિધસ્ય સુનિશ્ચિતમ્

અજ્ઞાતં પાતકં શુષ્કં જ્ઞાતં ચાર્દ્રમુદાહૃતમ્ ।
ભાવ્યં વાપ્યથવાતીતં વર્તમાન વદસ્વ નઃ

વહ્નિનો કેન તદ્ભસ્મ ભવેદેતન્મતં મમ ।
વસિષ્ટં ઉવાચ
શ્રૂયતાં નૃપશાર્દૂલ વહ્નિના યેન તદ્ભવેત્

ભસ્મ શુષ્કં તથાર્દ્રં ચ પાપમસ્ય હ્યેશેષતઃ

અવાપ્ય વાસરં વિષ્ણોર્યો નરઃ સંયતેન્દ્રિયઃ ।
ઉપવાસપરો ભૂત્વા પૂજયેન્મધુસૂદનમ્

સ ધાત્રીસ્નાનસહિતો રાત્રૌ જાગરણાન્વિતઃ ।
વિશોધયતિ પાપાનિ કિતવો હિ યથા ધનમ્

એકદાશીસમાખ્યેન વહ્નિના પાતકેન્ધનમ્ ।
ભસ્મતાં યાતિ રાજેન્દ્ર અપિ જન્મશતોદ્ભવમ્

નેદૃશ પાવનં કિઞ્ચિન્નારાણાં ભૂપ વિદ્યતે ।
યાદૃશં પદ્મનાભસ્ય દિનં પાતકહાનિદમ્

તાવત્પાપાનિ દેહે ઽસ્મિંસ્તિષ્ઠન્તિ મનુજાધિપ ।
યાવન્નોપવસેજ્જન્તુઃ પદ્મનાભદિમં શુભમ્

અશ્વમેધસહસ્રાણિ રાજસૂયશતાનિ ચ ।
એકાદશ્યુપવાસસ્ય કલાં નાર્હન્તિ ષોડશીમ્

એકાદશેન્દ્રિયૈઃ પાપં યત્કૃતં ભવતિ પ્રભો ।
એકાદશ્યુપવાસેન તત્સર્વં વિલયં વ્રજેત્

એકાદશીસમં કિઞ્ચિત્પાપનાશં ન વિદ્યતે ।
વ્યાજેનાપિ કૃતા રાજન્ન દર્શયતિ ભાસ્કરિમ્

સ્વર્ગમોક્ષપ્રદા હ્યેષા રાજ્યપુત્રપ્રદાયિની ।
સુકલત્રપ્રદા હ્યેષા શરીરારોગ્યદાયિની

ન ગઙ્ગા ન ગયા ભૂપ ન કાશી ન ચ પુષ્કરમ્ ।
ન ચાપિ કૈરવં ક્ષેત્રં ન રેવા ન ચ દેવિકા

યમુના ચન્દ્રભાગા ચ પુણ્યા ભૂપ હરેર્દિનાત્ ।
અનાયાસેન રાજેન્દ્ર પ્રાપ્યતે હરિમન્દિરમ્

રાત્રૌ જામરણ કૃત્વા સમુપોષ્ય હરેર્દિનમ્ ।
સર્વપાપવિનિર્મુક્તો વિષ્ણુલોકે વ્રજેન્નરઃ

દશૈવ માતૃકે પક્ષે દશ રાજેન્દ્ર પૈતૃકે ।
ભાર્યાયા દશ પક્ષે ચ પુરુષાનુદ્ધરેત્તથા

આત્માનમપિ રાજેન્દ્ર સ નયેદ્વૈષ્ણવં પુરમ્ ।
ચિન્તામણિસમા હ્યેષા અથવાપિ નિધેઃ સમા

સંકલ્પપાદપપ્રખ્યા વેદવાક્યોપમાથવા ।
દ્વાદશીં યે પ્રપન્ના હિ નરા નરવરોત્તમ

તે દ્વન્દ્વબાહવો જાતા નાગારિકૃતવાહનાઃ ।
સ્રગ્વિણઃ પીતવસ્ત્રાશ્ચ પ્રયાન્તિ હરિમન્દિરમ્

એષ પ્રભાવો હિ મયા દ્વાદશ્યાઃ પરિકીર્તિતઃ ।
પાપેન્ધનસ્ય ઘોરસ્ય પાવકાખ્યો મહીપતે

હરેર્દ્દિનં સદોપોષ્યં નરૈર્ધર્મપરાયણૈઃ ।
ઇચ્છદ્ભિર્વિપુલાન્યોગાન્પુત્રપૌત્રાદિકાંસ્તથા

હરિદિનમિહ મર્ત્યો યઃ કરોત્યાદરેણ નરવર સ તુ કુક્ષિં માતુરાપ્નોતિ નૈવ ।
બહુવૃજિનસમેતો ઽકામતઃ કામતો વા વ્રજતિ પદમનન્તં લોકનાથસ્ય વિષ્ણોઃ