નારદ પુરાણ · અધ્યાય 1.84

ઇતિ શ્રીબૃહન્નારદીય પુરાણે પૂર્વભાગે બૃહદુપાખ્યાને તૃતીયપાદે પઞ્ચપ્રકૃતિમન્ત્રાદિનિરૂપણં નામ ત્ર્યશીતિતમો ઽધ્યાયઃ
સનત્કુમાર ઉવાચ
કલિકલ્પાન્તરે બ્રહ્મન્ બ્રહ્મણો ઽવ્યક્તજન્મનઃ ।
લોકપદ્મે તપસ્થસ્ય સૃષ્ટ્યર્થં સંબભૂવતુઃ

વિષ્ણુકર્ણમલોદ્ભૂતાવસુરૌ મધુકૈટભૌ ।
તૌ જાતમાત્રૌ પયસિ લોકપ્રલયલક્ષણે

જાનુમાત્રે સ્થિતૌ દૃષ્ટ્વા બ્રહ્મણં કમલસ્થિતમ્ ।
પ્રવૃત્તાવત્તુમાલક્ષ્ય તુષ્ટાવ જગદંબિકામ્

તતો દેવી જગત્કર્ત્રી શૈવી શક્તિરનુત્તમા ।
નારાયણાક્ષિસંસ્થાના નિદ્રા પ્રીતા બભૂવ હ

તસ્યા મન્ત્રાદિકં સર્વં કથયિષ્યામિ તચ્છૃણુ ।
સારુણા ક્રોધની શાન્તિશ્ચન્દ્રાલઙ્કૃતશેખરા

એકાક્ષરીબીજ મન્ત્રઋષિઃ શક્તિરુદાહૃતા ।
ગાયત્રી ચ ભવેચ્છન્દો દેવતા ભુવનેશ્વરી

ષડ્દિર્ઘયુક્તબીજેન કુર્યાદઙ્ગાનિ ષટ્ ક્રમાત્ ।
સંહારસૃષ્ટિમાર્ગેણ માતૃકાન્યસ્તવિગ્રહઃ

મન્ત્રન્યાસં તતઃ કુર્યાદ્દેવતાભાવસિદ્ધયે ।
હૃલ્લેખાં મૂર્ધ્નિ વદને ગગનાં હૃદયાંબુજે

રક્તાં કરાલિકાં ગુહ્યે મહોચ્છુષ્માં પદદ્વયે ।
ઊર્દ્ધ્વપ્રાગ્દક્ષિણોદીચ્યપશ્ચિમેષૂત્તરે ઽપિ ચ

સદ્યાદિહ્રસ્વબીજાદ્યાન્વસ્તવ્યા ભૂતસપ્રભાઃ ।
અઙ્ગાનિ વિન્યસેત્પશ્ચાજ્જાતિયુક્તાનિ ષટ્ ક્રમાત્

બ્રહ્માણં વિન્યસેદ્ભાલે ગાયત્ર્યા સહ સંયુતમ્ ।
સાવિત્ર્યા સહિતં વિષ્ણું કપોલે દક્ષિણે ન્યસેત્

વાગીશ્વર્યા સમાયુક્તં વામગણ્ડે મહેશ્વરમ્ ।
શ્રિયા ધનપતિં ન્યસ્ય વામકર્ણાગ્રકે પુનઃ

રત્યા સ્મરં મુખે ન્યસ્ય પુણ્યાગણપતિં ન્યસેત્ ।
સવ્યકર્ણોપરિ નિધાકર્ણગણ્ડાન્તરાલયોઃ

ન્યસ્તવ્યં વદને મૂલં ભૂપશ્ચૈત્રાંસ્તતો ન્યસેત્ ।
કણ્ઠમૂલે સ્તનદ્વન્દ્વે વામાંસે હૃદયાંબુજે

સવ્યાંસે પાર્શ્વયુગલે નાભિદેશે ચ દેશિકઃ ।
ભાલાંશ્ચ પાર્શ્વજઠરે પાર્શ્વાંસાપરકે હૃદિ

બ્રહ્માણ્યાદ્યાસ્તનૌ ન્યસ્ય વિધિના પ્રોક્તલક્ષણાઃ ।
મૂલેન વ્યાપકં દેહે ન્યસ્ય દેવીં વિચિન્તયેત્

ઉદ્યદ્દિવાકરનિભાં તુઙ્ગોરોજાં ત્રિલોચનામ્ । ।
સ્મરાસ્યામિન્દુમુકુટાં વરપાશાઙ્કુશાભયામ્

રદલક્ષં જપેન્મન્ત્રં ત્રિમધ્વક્તૈર્હુનેત્તતઃ ।
અષ્ટદ્રવ્યૈર્દશાંશેન બ્રહ્મવૃક્ષસમિદ્વરૈઃ

દ્રાક્ષાખર્જૂરવાતાદશર્કરાનાલિકેરકમ્ ।
તન્દુલાજ્યતિલં વિપ્ર દ્રવ્યાષ્ટકમુદાહૃતમ્

દદ્યાદર્ધ્યં દિનેશાય તત્ર સંચિન્ત્ય પાર્વતીમ્ ।
પદ્મમષ્ટદલં બાહ્યે વૃત્તં ષોડશભિર્દ્દલૈઃ

વિલિખેત્કણિઙ્ક્રામધ્યેષડ્કોણમતિસુન્દરમ્ ।
તતઃ સંપૂજયેત્પીઠં નવશક્તિસમન્વિતમ્

જયાખ્યા વિજયા પશ્ચાદજિતાહ્વાપરાજિતા ।
નિત્યા વિલાસિની ગોગ્ધીત્યઘોરા મઙ્ગલા નવ

બીજાઢ્યમાસનં દત્ત્વા મૂર્તિં તેનૈવ કલ્પયેત્ ।
તસ્યાં સંપૂજયેદ્દેવીમાવાહ્યાવરણૈઃ ક્રમાત્

મધેયપાગ્યામ્યસૌમ્યેષુ પૂજયેદઙ્ગદેવતાઃ ।
ષટ્કોણેષુ યજેન્મન્ત્રી પશ્ચાન્મિથુનદેવતાઃ

ઇન્દ્રકોણં લસદ્દણ્ડકુણ્ડિકાક્ષગુણાભયામ્ ।
ગાયત્રીં પૂજયેન્મત્રી બ્રહ્માણમપિ તાદૃશમ્

રક્ષઃ કોણે શઙ્ખચક્રગદાપઙ્કજધારિણીમ્ ।
સાવિત્રીં પીતવસનાં યજેદ્વિણું ચ તાદૃશમ્

વાયુકોણે પરશ્વક્ષમાલા ભયવરાન્વિતામ્ ।
યજેત્સરસ્વતીમચ્છાં રુદ્રં તાદૃશલક્ષણમ્

વહ્નિકોણે યજેદ્રત્નકુંભં મણિકરણ્ડકમ્ ।
કરાભ્યાં બિભ્રતીં પીતાં તુન્દિલં ધનદાયકમ્

આલિઙ્ગ્ય સવ્યહસ્તેન વામે તાંબૂલધારિણીમ્ ।
ધનદાઙ્કસમારૂઢાં મહાલક્ષ્મીં પ્રપૂજયેત્

પશ્ચિમે મદનં બાણપાશાઙ્કુશશરાસનામ્ ।
ધારયન્તં જપારક્તં પૂજયેદ્રક્તભૂષણમ્

સવ્યેન પતિમાશ્લિષ્ય વામેનોત્પલધારિણીમ્ ।
પાણિના રમણાઙ્કસ્થાં રતિં સમ્યક્સમર્ચયેત્

ઐશાન્યે પૂજયેત્સમ્યક્ વિઘ્નરાજં પ્રિયાન્વિતમ્ ।
સૃણિપાશધરં કાન્તં વરાઙ્ગાસૃક્કલાઙ્ગુલિમ્

માધ્વીપૂર્ણકપાલાઢ્યં વિઘ્નરાજં દિગંબરમ્ ।
પુષ્કરે વિગલદ્રત્નસ્ફુરચ્ચષકધારિણમ્

સિંદૂરસદૃશાકારામુદ્દામમદવિભ્રમામ્ ।
ધૃતરક્તોત્પલામન્યપાણિના તુ ધ્વજસ્પૃશામ્

આશ્લિષ્ટકાન્તામરુણાં પુષ્ટિમર્ચેદ્દિગંબરામ્ ।
કર્ણિકાયાં નિધી પૂજ્યૌ ષટ્કોણસ્યાથ પાર્શ્વયોઃ

અઙ્ગાનિ કેસરેષ્વેતાઃ પશ્ચાત્પત્રેષુ પૂજયેત્ ।
અનઙ્ગકુસુમા પશ્ચાદ્દ્વિતીયાનઙ્ગમેખલા

અનઙ્ગગમના તદ્વદનઙ્ગમદનાતુરા ।
ભુવનપાલા ગગનવેગા ષષ્ઠી ચૈવ તતઃ પરમ્

શશિલેખા ગગનલેખા ચેત્યષ્ટૌ યત્ર શક્તયઃ ।
ખડ્ગખેટકધારિણ્યઃ શ્યામાઃ પૂજ્યાશ્ચ માતરઃ

પદ્માદ્બહિઃ સમભ્યર્ચ્યાઃ શક્તયઃ પરિચારિકાઃ ।
પ્રથમાનઙ્ગદ્વયાસ્યાદનઙ્ગમદના તતઃ

મદનાતુરા ભવનવેગા તતો ભુવનપાલિકા ।
સ્યાત્સર્વશિશિરાનઙ્ગવેદનાનઙ્ગમેખલા

ચષકં તાલવૃન્તં ચ તાંબૂલં છત્રમુજ્જ્વલમ્ ।
ચામરે ચાંશુકં પુષ્પં બિભ્રાણાઃ કરપઙ્કજૈઃ

સર્વાભરણસંદીપ્તાન્ લોકપાલાન્બહિર્યજેત્ ।
વજ્રાદીન્યપિ તદ્બાહ્યે દેવીમિત્થં પ્રપૂજયેત્

મન્ત્રી ત્રિમધુરોપેતૈર્હુત્વાશ્વત્થસમિદ્વરૈઃ ।
બ્રાહ્મણાન્વશયેચ્છીઘ્રં પાર્થિવાન્પદ્મહોમતઃ

પલાશપુષ્પૈસ્તત્પત્નીં મન્ત્રિણઃ કુસુદૈરપિ ।
પઞ્ચવિંશતિધા જપ્તૈર્જલૈઃ સ્નાનં દિને દિને

આત્માનમભિષિઞ્ચેદ્યઃ સર્વસૌભાગ્યવાન્ભવેત્ ।
પઞ્ચવિંશતિધા જપ્તં જલં પ્રાતઃ પિબેન્નરઃ

અવાપ્ય મહતીં પ્રજ્ઞાં કવીનામગ્રણીર્ભવેત્ ।
કર્પૂરાગરુસંયુક્તકુઙ્કુમં સાધુ સાધિતમ્

ગૃહીત્વા તિલકં કુર્યાદ્રાજવશ્યમનુત્તમમ્ ।
શાલિપિષ્ટમયીં કૃત્વા પુત્તલીં મધુરાન્વિતામ્

જપ્તાં પ્રતિષ્ઠિતપ્રાણાં ભક્ષયેદ્રવિવાસરે ।
વશં નયતિ રાજાનં નારીં વા નરમેવ ચ

કણ્ઠમાત્રોદકે સ્થિત્વા વીક્ષ્ય તોયોદ્ગતં રવિમ્ ।
ત્રિસહસ્રં જપેન્મન્ત્રં કન્યામિષ્ટાં લભેત્તતઃ

અન્નં તન્મન્ત્રિતં મન્ત્રી ભુઞ્જીત શ્રીપ્રસિદ્ધયે ।
લિખિતાં ભસ્મના માયાં સસાધ્યાં ફલકાદિષુ

તત્કાલં દર્શયેદ્યન્ત્રં સુખં સૂયેત ગર્ભિણી ।
ભુવનેશીયમાખ્યાતા સહસ્રભુજસંભવા

ભુક્તિમુક્તિપ્રદા નૄણાં સ્મર્તૃઆણાં દ્વિજસત્તમ ।
તતઃ કલ્પાન્તરે વિપ્ર કદાચિન્મહિષાસુરઃ

બભૂવ લોકપાલાંસ્તુ જિત્વા ભુઙ્ક્તે જગત્ત્રયમ્ ।
તતસ્ત્પીડિતા દેવા વૈકુણ્ઠં શરણં યયુઃ

તતો દેવી મહાલક્ષ્મીશ્ચક્રાદ્યાઙ્ગોત્થતેજસા ।
શ્રીર્બભૂવમુનિશ્રેષ્ઠ મૂર્તા વ્યાપ્તજગત્ત્રયા

સ્વયં સા મહિષાદીંસ્તુ નિહત્ય જગદીશ્વરી ।
અરવિન્દવનં પ્રાપ્તા ભજતામિષ્ટદાયિની

તસ્યાઃ સમર્ચનં વક્ષ્યે સંક્ષેપેણ શૃણુ દ્વિજ ।
મૃત્યુક્રોધેન ગુરુણા બિન્દુભૂષિતમસ્તકા

બીજમન્ત્રઃ શ્રિયઃ પ્રોક્તો ભજતામિષ્ટદાયકઃ ।
ઋષિર્ભૃગુર્નિવૃચ્છન્દો દેવતા શ્રીઃ સમીરિતા

ષડ્દીર્ઘયુક્તબીજેન કુર્યાદઙ્ગાનિ ષટ્ ક્રમાત્ ।
તતો ધ્યાયેજ્જગદ્વેદ્યાં શ્રિયં સંપત્તિદાયિનીમ્

કાઞ્ચનાભાં ગજૈઃ શ્વેતૈશ્ચતુર્ભિઃ સ્વકરોદ્ધૃતૈઃ ।
હિરણ્મયામૃતઘટૈઃ સિચ્યમાનાં સરોજગામ્

વરાભયાબ્જસ્રગ્ધસ્તાં ક્ષૌમવસ્ત્રાં કિરીટિનીમ્ ।
સિદ્ધલક્ષં જપેન્મન્ત્રં તત્સહસ્રં હુનેત્તથા

સુગન્ધકુસુમૈરિષ્ટ્વા કમલૈર્મધુરપ્લુતૈઃ ।
મહાલક્ષ્મ્યુદિતે પીઠે મૂર્તિં મૂલેન કલ્પયેત્

યજેત્પૂર્વવદઙ્ગાનિ દિગ્દલેષ્વર્ચયેત્તતઃ ।
વાસુદેવં સંકર્ષણં પ્રદ્યુમ્નમનિરુદ્ધકમ્

હિમપીતતમાલેન્દ્રનીલાભાન્પીતવાસસઃ ।
શઙ્ખચક્રગદાપદ્મધારિણસ્તાંશ્ચતુર્ભુજાન્

વિદિગન્તેષુ પત્રેષુ દમકાદીન્યજેદ્ગજાન્ ।
દમકં પુણ્ડરીકં ચ ગુગ્ગુલં ચ કુરણ્ટકમ્

યજેચ્છઙ્ખનિધિં દેવ્યા દક્ષિણે પ્રમદાન્વિતમ્ ।
મુક્તામાણિક્યસંકાશૌ કિઞ્ચિત્સ્મિતમુખાંબુજૌ

અન્યોન્યાલિઙ્ગનપરૌ શઙ્ખપઙ્કજધારિણૌ ।
વિગલદ્રત્નવર્ષાભ્યાં શઙ્ખભ્યા મૂર્ધ્નિ લાઞ્છિતૌ

તુન્દિલં કંબુકનિધિં વસુધારાં ઘનસ્તનીમ્ ।
વામતઃ પઙ્કજનિધિં પ્રિયયા સહિતં યજેત્

સિંદૂરાભૌ ભુજશ્લિષ્ટૌ રક્તપદ્મોત્પલાન્વિતૌ ।
નિઃસરદ્રત્નવર્ષાભ્યાં પદ્માભ્યાં મૂર્ધ્નિ લાઞ્છિતૌ

તુન્દિલં પઙ્કજનિધિં તત્ત્વાં વસુમતીમપિ ।
દલાગ્રેષુ યજેદેતાબલાક્યાદ્યાઃ સમન્તતઃ

બલાકી વિમલા ચૈવ કમલા વનમાલિકા ।
વિભીષિકા માલિકા ચ શાઙ્કરી વસુમાલિકા

પઙ્કજદ્વયધારિણ્યો મુક્તાહારસમપ્રભાઃ ।
લોકેશાન્પૂજયેદન્તે વજ્રાદ્યાસ્ત્રાણિ તદ્બહિઃ

ઇત્થં યો ભજતે દેવીં વિધિના સાધકોત્તમઃ ।
ધનધાન્યસમૃદ્ધઃ સ્યાચ્છ્રિયમાપ્નોત્યનિન્દિતામ્

વક્ષઃપ્રમાણસલિલે સ્થિત્વા મન્ત્રમિમં જપેત્ ।
ત્રિલક્ષમર્કગં ધ્યાયન્સ ભવેત્કમલાલયઃ

વિષ્ણુગેહસ્થબિલ્વસ્ય મૂલે લક્ષત્રયં જપેત્ ।
સાધકો યઃ સ લભતે વાઞ્છિતં ધનસંચયમ્

અશોકવહ્નાવાજ્યાક્તૈસ્તણ્ડુલૈર્વશયેજ્જગત્ ।
હોમેનખાદિરે વહ્નૌ તણ્ડુલેર્મધુરોક્ષિતૈઃ

રાજા વશ્યો ભવેચ્છીઘ્રં મહાલક્ષ્મીશ્ચ વર્દ્ધતે ।
બિલ્વચ્છાયામધિવસન્બિલ્વમિશ્રહવિષ્યભુક્

સંવત્સરત્રયં હુત્વા તત્ફલૈરથવાંબુજૈઃ ।
સાધકેન્દ્રો મહાલક્ષ્મીં ચક્ષુષા પશ્યતિ ધ્રુવમ્

અથ કલ્પાન્તરે બ્રહ્મન્દેવરાજ્યવિલુંપકૌ ।
જાતૌ શુભનિશુંભૌ દ્વાવસુરૌ લોકકણ્ટકૌ

તતો ભ્રષ્ટાધિકારૈસ્તુ શક્રાદ્યૈઃ સંસ્તુતા મુને ।
મહાસરસ્વતી દેવી તદા ચાવતતાર હ

હિમાલયે મહાપુણ્યે શૈલોદ્દેશે ઽતિશોભને ।
તતઃ શુમ્ભાદિકાન્હત્વા દૈવતૈઃ પરિપૂજિતા

વરં દત્ત્વાવિશદ્દેવી માનસં નામ વૈ સરઃ ।
તસ્યા મન્ત્રં પ્રવક્ષ્યામિ શૃણુષ્વાવહિતો મુનને

જ્ઞાનામૃતા શશધરા ક્રાન્તભાલોપશોભિતા ।
વાગ્બીજં તેન ચાઙ્ગાનિ કલ્પયેત્સાધકોત્તમઃ

ઋષિઃ સદાશિવશ્ચાસ્ય છન્દો ઽનુષ્ટુબુદાહૃતમ્ ।
દેવતા વાક્સમાખ્યાતા ભજતામિષ્ટદાયિની

શ્વેતાંબરાં વિસશ્વેતાં વીણાપુસ્તકધારિણીમ્ ।
દિવ્યૈરાભરણૈર્યુક્તાં ધ્યાયેદ્દેવીં નિરન્તરામ્

મહાસરસ્વતીપીઠે મૂર્તિં મૂલેન કલ્પયેત્ ।
દેવીં સંપૂજયેત્તસ્યામઙ્ગાદ્યાવરણૈઃ સહ

આદાવઙ્ગાવૃતિઃ પશ્ચાદંબિકાદ્યાઃસમીરિતાઃ ।
દ્વિતીયા માતૃભિઃ પ્રોક્તા તૃતીયાદ્યષ્ટશક્તિભિઃ

ચતુર્થી પઞ્ચમી પ્રોક્તા દ્વાત્રિંશચ્છક્તિભઘિઃ પુનઃ ।
ચતુઃષષ્ટ્યા સ્મૃતા ષષ્ઠી શક્તિભિર્લોકનાયકૈઃ

સપ્તમી પુનરેતેષામસ્ત્રૈઃ સ્યાદષ્ટમાવૃતિઃ ।
એવં પૂજ્યા જગદ્ધાત્રી શ્રીમતી વાગ્ભવાભિધા

સ્થાનેષુ પૂર્વમુક્તેષુ યજેદઙ્ગાનિ સાધકઃ ।
અમ્બિકા વાગ્ભવા દુર્ગા શ્રીશક્તિશ્ચોક્તલક્ષણા

બ્રહ્માદ્યાશ્ચ તતઃ પૂજ્યાઃ કરાલી વિકરાલ્યુમા ।
સરસ્વતી શ્રીર્દુર્ગા ચ લક્ષ્મીશ્ચૈવ ધૃતિઃ સ્મૃતિઃ

શ્રદ્ધા મેધા રતિઃ કાન્તિરાર્યા ષોડશ શક્તયઃ ।
ખડ્ગખેટકધારિણ્યઃ શ્યામાઃ પૂજ્યાઃ સ્વલઙ્કૃતાઃ

વિષઘ્ની પુષ્ટયઃ પ્રજ્ઞા સિનીવાલી કુહૂઃ પુનઃ ।
રુદ્રવીર્યા પ્રભા નન્દા પોષણા વૃદ્ધિદા શુભા

કાલરાત્રિર્મહારાત્રિર્ભદ્રકાલી કપાર્દિની ।
વિકૃતિર્દણ્ડિમુણ્ડિન્યૌ સેંદુખણ્ડા શિખણ્ડિની

નિશુમ્ભમથની ચણ્ડમુણ્ડવિનાશિની ।
ઇન્દ્રાણી ચૈવ રુદ્રાણી શઙ્કરાર્દ્ધશરીરિણી

નારી નારાયણી ચૈવ ત્રિશૂલિન્યપિ પાલિની ।
અમ્બિકા હ્રદિની ચૈવ દ્વાત્રિંશચ્છક્તયઃ સિતાઃ

ચક્રહસ્તાઃ પિશાચાસ્યાઃ સંપૂજ્યાશ્ચારુભૂષણાઃ ।
પિઙ્ગલાક્ષી વિશાલાક્ષી સમૃદ્ધિર્બુદ્ધિરેવ ચ

શ્રદ્ધા સ્વાહા સ્વધા ભિક્ષા માયા સંજ્ઞા વસુંધરા ।
ત્રિલોકધાત્રી ગાયત્રી સાવિત્રી ત્રિદશેશ્વરી

સરૂપા બહુરૂપા ચ સ્કન્દમાતા શ્રુતપ્રિયા ।
વિમલા કમલા પશ્ચાદરુણી પુનરારુણી

પ્રકૃતિર્વિકૃતિઃ સૃષ્ટિઃ સ્થિતિઃ સંહૃતિરેવ ચ ।
સન્ધ્યા માતા સતી હંસી મર્દિકા વજ્રિકા પરા

દેવમાતા ભગવતી દેવકી કમલાસના ।
ત્રિમુખી સપ્તવદના સુરાસુરવિમર્દ્દિની

લંબોષ્ઠી ચોર્દ્દ્વકેશી ચ બહુશિશ્ના વૃકોદરી ।
રથરેખાહ્વયા પશ્ચાચ્છશિરેખા તથાપરા

ગગનવેગા પવનવેગા વેગા ચ તદનન્તરમ્ ।
તતો ભુવનપાલાખ્યા તતઃ સ્યાન્મદનાતુરા

અનઙ્ગાનઙ્ગવદના તથૈવાનઙ્ગમેખલા ।
અનઙ્ગકુસુમા વિશ્વરૂપા સુરભયઙ્કરી

અક્ષોભ્યા સપ્તવાહિન્યા વજ્રારૂપા શુચિવ્રતાઃ ।
વરદાખ્યાથ વાગીશી ચતુઃષષ્ટિઃસમીરિતાઃ

ચાપબાણધરાઃ સર્વા જ્વાલાજિહ્વા મહાપ્રભાઃ ।
દંષ્ટ્રિણ્યશ્ચોર્દ્ધ્વકેશ્યસ્તા યુદ્ધોપક્રાન્તમાનસાઃ

સર્વાભરણસંદીપ્તા પૂજનીયાઃ પ્રયત્નતઃ ।
લોકેશાઃ પૂર્વવત્પૂજ્યાસ્તદ્વદ્વજ્રાદિકાન્યપિ

જપેત્ષોડશલક્ષં ચ તદ્દશાંશં હુનેત્સુધીઃ ।
આજ્યેન ખાદિરે વહ્નૌ તતઃ સિદ્ધો ભવેન્મનુઃ

કમલૈરયુતં હુત્વા રાજાનં વશમાનયેત્ ।
ઉત્પલૈર્જુહ્વતો નૂનં મહાલક્ષ્મીઃ પ્રજાયતે

પલાશકુસુમૈર્હુત્વા વત્સરેણ કંવિર્ભવેત્ ।
રાજીલવણહોમેન વનિતાં વશમાનયેત્

ભૂમૌ ભોગાંસ્તુ ભુક્ત્વાન્તે વિષ્ણુલોકમવાપ્નુયાત્ ।
વાણીબીજજપાશક્તો નાત્ર કાર્યા વિચારણા