નારદ પુરાણ · અધ્યાય 1.101

ઇતિ શ્રીબૃહન્નારદીયપુરાણે પૂર્વભાગે બૃહદુપાખ્યાને ચતુર્થપાદે ભવિષ્યપુરાણાનુક્રમણી નિરૂપણં નામ શતતમો ઽધ્યાયઃ
શ્રીબ્રહ્મોવાચ
શૃણુ વત્સ પ્રવક્ષ્યામિ પુરાણં દશમં તવ ।
બ્રહ્મવૈવર્તકં નામ વેદમાર્ગાનુદર્શકમ્

સાવર્ણિર્યત્ર ભગવાન્સાક્ષાદ્દેવર્ષયે સ્થિતઃ ।
નારદાય પુરાણાર્થં પ્રાહ સર્વમલૌકિકમ્

ધર્માર્થકામમોક્ષાણાં સારઃ પ્રીતિર્હરૌ હરે ।
તયોરભેદસિદ્ધ્યર્થં બ્રહ્મવૈવર્તમુત્તમમ્

રથન્તરસ્ય કલ્પસ્ય વૃત્તાન્તં યન્મયોદિતમ્ ।
શતકોટિપુરાણે તત્સંક્ષિપ્ય પ્રાહ વેદવિત્

વ્યાસશ્ચતુર્દ્ધા સંવ્યસ્ય બ્રહ્મવૈવર્તસંજ્ઞિતે ।
અષ્ટાદશસહસ્રં તત્પુરાણં પરિકીર્તિતમ્

બ્રહ્મપ્રકૃતિવિઘ્નેશકૃષ્ણખણ્ડસમન્વિતમ્ ।
તત્ર સૂતર્ષિસંવાદે પુરાણોપક્રમસ્તતઃ

સૃષ્ટિપ્રકરણં ત્વાદ્યં તતો નારદવેધસોઃ ।
વિવાદઃ સુમહાન્યત્ર દ્વયોરાસીત્પરાભવઃ

શિવલોકગતિઃ પશ્ચાજ્જ્ઞાનલાભઃ શિવાત્મને ।
શિવવાક્યેન તત્પશ્ચાન્મરીચેર્નારદસ્ય તુ

ગમનં ચૈવ સાવર્ણેર્જ્ઞાનાર્થં સિદ્ધસેવિતે ।
આશ્રમે સુમહાપુણ્યે ત્રૈલોક્યાશ્ચર્યકારિણી

એતદ્ધિ બ્રહ્મખણ્ડં હિ શ્રુતં પાપવિનાશનમ્ ।
તતઃ સાવર્ણિસંવાદો નારદસ્ય સમીરિતઃ

કૃષ્ણમાહાત્મ્યસંયુક્તો નાનાખ્યાનકથોત્તરમ્ ।
પ્રકૃતેરંશભૂતાનાં કલાનાં ચાપિ વર્ણિતમ્

માહાત્મ્યં પૂજનાદ્યં ચ વિસ્તરેણ યથાસ્થિતમ્ ।
એતત્પ્રકૃતિખણ્ડં હિ શ્રુતં ભૂતિવિધાયકમ્

ગણેશજન્મસંપ્રશ્નઃ સપુણ્યકમહાવ્રતમ્ ।
પાર્વત્યાઃ કાર્તિકેયેન સહ વિઘ્નેશસંભવમ્

ચરિતં કાર્તવીર્યસ્ય જામદગ્ર્યસ્ય ચાદ્ભુતમ્ ।
વિવાદઃ સુમહાનાસીજ્જામદગ્ર્યગણેશયોઃ

એતદ્વિઘ્નેશખણ્ડં હિ સર્વવિઘ્નવિનાશનમ્ ।
શ્રીકૃષ્ણજન્મસંપ્રશ્નો જન્માખ્યાનં તતો ઽદ્ભુતમ્

ગોકુલે ગમનં ગશ્ચાત્પૂતનાદિવદાદ્ભૂતાઃ ।
બાલ્યકૌમારજા લીલા વિવિધાસ્તત્ર વર્ણિતાઃ

રાસક્રીડા ચ ગોપીભિઃ શારદી સમુદાહૃતા ।
રહસ્યે રાધયા ક્રીડા વર્ણિતા બહુવિસ્તરા

સહાક્રૂરેણ તત્પશ્ચાન્મથુરાગમનં હરેઃ ।
કંસાદીનાં વધે વૃત્તે કૃષ્ણસ્ય દ્વિજસંસ્કૃતિઃ

કાશ્યસાંદીપનેઃ પશ્ચાદ્વિદ્યોપાદાનમદ્ભુતમ્ ।
યવનસ્ય વધઃ પશ્ચાદ્દ્વારકાગમનં હરેઃ

નરકાદિવધસ્તત્ર કૃષ્ણેન વિહિતો ઽદ્ભુતઃ ।
કૃષ્ણખણ્ડમિદં વિપ્ર નૃણાં સંસારખણ્ડનમ્

પઠિતં ચ શ્રુતં ધ્યાતં પૂજિતં ચાભિવન્દિતમ્ ।
ઇત્યેતદ્બ્રહ્મવૈવર્તપુરાણં ચાત્યલૌકિકમ્

વ્યાસોક્તં ચાદિ સંભૂતં પઠઞ્છૃણ્વન્વિમુચ્યતે ।
વિજ્ઞાનાજ્ઞાનશમનાદ્ધોરાત્સંસારસાગરાત્

લિખિત્વેદં ચ યો દદ્યાન્માધ્યાં ધેનુસમન્વિતમ્ ।
બ્રહ્મલોકમવાપ્નોતિ સ મુક્તો ઽજ્ઞાનબન્ધનાત્

યશ્ચાનુક્રમણીં ચાપિ પઠેદ્વા શૃણુયાદપિ ।
સો ઽપિ કૃષ્ણપ્રસાદેન લભતે વાઞ્છિતં ફલમ્