નામલિઙ્ગાનુશાસન · અધ્યાય 3.4

ચિરાય ચિરરાત્રાય ચિરસ્યાદ્યાશ્ચિરાર્થકાઃ

મુહુઃ પુનઃ પુનઃ શશ્વદભીક્ષ્ણમસકૃત્ સમાઃ

સ્રાગ્ ઝટિત્યઞ્જસાહ્નાય દ્રાઙ્ મઙ્ક્ષુ સપદિ દ્રુતે

બલવત્સુષ્ઠુ કિમુત સ્વત્યતીવ ચ નિર્ભરે

પૃથગ્ વિનાન્તરેણર્તે હિરુઙ્ નાના ચ વર્જને

યત્ તદ્ યતસ્ તતો હેતાવસાકલ્યે તુ ચિચ્ ચન

કદાચિજ્જાતુ સાર્ધં તુ સાકં સત્રા સમં સહ

આનુકૂલ્યાર્થકં પ્રાધ્વં વ્યર્થકે તુ વૃથા મુધા

આહો ઉતાહો કિમુત વિકલ્પે કિં કિમૂત ચ

તુ હિ ચ સ્મ હ વૈ પાદપૂરણે પૂજને સ્વતિ

દિવાહ્નીત્યથ દોષા ચ નક્તં ચ રજનાવિતિ

તિર્યગર્થે સાચિ તિરો ઽપ્યથ સંબોધનાર્થકાઃ

સ્યુઃ પ્યાટ્ પાડઙ્ગ હે હૈ ભોઃ સમયા નિકષા હિરુક્

અતર્કિતે તુ સહસા સ્યાત્ પુરઃ પુરતો ઽગ્રતઃ

સ્વાહા દેવહવિર્દાને શ્રૌષટ્ વૌષટ્ વષટ્ સ્વધા

કિઞ્ચિદીષન્ મનાગલ્પે પ્રેત્યામુત્ર ભવાન્તરે

વ વા યથા તથેવૈવં સામ્યે ઽહો હીતિ વિસ્મયે

મૌને તુ તૂષ્ણીં તૂષ્ણીકાં સદ્યઃ સપદિ તત્ક્ષણે

દિષ્ટ્યા સમુપજોષં ચેત્યાનન્દે ઽથાન્તરે ઽન્તરા

અન્તરેણ ચ મધ્યે સ્યુઃ પ્રસહ્ય તુ હઠાર્થકમ્

યુક્તે દ્વે સાંપ્રતં સ્થાને ઽભીક્ષ્ણં શશ્વદનારતે

અભાવે નહ્ય નો નાપિ મા સ્મ માલં ચ વારણે

પક્ષાન્તરે ચેદ્યદિ ચ તત્ત્વે ત્વદ્ધાઞ્જસા દ્વયમ્

પ્રાકાશ્યે પ્રાદુરાવિઃ સ્યાદોમેવં પરમં મતે

સમન્તતસ્તુ પરિતઃ સર્વતો વિષ્વગિત્યપિ

અકામાનુમતૌ કામમસૂયોપગમેસ્તુ ચ

નનુ ચ સ્યાદ્વિરોધોક્તૌ કશ્ચિત્ કામપ્રવેદને

નિષ્ષમં દુષ્ષમં ગર્હ્યે યથાસ્વં તુ યથાયથમ્

મૃષા મિથ્યા ચ વિતથે યથાર્થં તુ યથાતથમ્

સ્યુરેવં તુ પુનર્વૈ વેત્યવધારણવાચકાઃ

પ્રાગતીતાર્થકં નૂનમવશ્યં નિશ્ચયે દ્વયમ્

સંવદ્ વર્ષે ઽવરે ત્વર્વાગામેવં સ્વયમાત્મના

અલ્પે નીચૈર્મહત્યુચ્ચૈઃ પ્રાયો ભૂમ્ન્યદ્રુતે શનૈઃ

સના નિત્યે બહિર્બાહ્યે સ્માતીતે ઽસ્તમદર્શને

અસ્તિ સત્વે રુષોક્તાવુ ઊં પ્રશ્ને ઽનુનયે ત્વયિ

હું તર્કે સ્યાદુષા રાત્રેરવસાનેનમો નતૌ

પુનરર્થે ઽઙ્ગ નિન્દાયાં દુષ્ઠુ સુષ્ઠુ પ્રશંસને

સાયં સાયે પ્રગે પ્રાતઃ પ્રભાતે નિકષાન્તિકે

અમાનુગુણ્યે સ્મરણે હું ફડ્ વિઘ્નનિરાકૃતૌ

અઙ્ગીકૃતૌ સ્યાદર્થે હૂં હીનસંબોધતે ત્વરે

પરુત્ પરાર્થૈષમો ઽબ્દે પૂર્વે પૂર્વતરે યતિ

અદ્ય ઽત્રાહ્ન્યથ પૂર્વે ઽહ્નીત્યાદૌ પૂર્વોત્તરાપરાત્

તથાધરાન્યાન્યતરેતરાત્પૂર્વેદ્યુરાદયઃ

ઉભયદ્યુશ્ચોભયેદ્યુઃ પરેત્વહ્નિ પરેદ્યવિ

હ્યો ગતે ઽનાગતે ઽહ્નિ શ્વઃ પરશ્વસ્તુ પરે ઽહનિ

તદા તદાનીં યુગપદેકદા સર્વદા સદા

એતર્હિ સંપ્રતી ઽદાનીમધુના સામ્પ્રતં તથા

દિગ્દેશકાલે પૂર્વાદૌ પ્રાગુદક્પ્રત્યગાદયઃ
% ઇત્યવ્યયવર્ગઃ 4, અત્ર મૂલશ્લોકાઃ 23
લિઙ્ગાદિસંગ્રહવર્ગઃ।
। અથ લિઙ્ગાદિસંગ્રહવર્ગઃ 5