મૂલમધ્યમકકારિકા · અધ્યાય 6

રાગાદ્ યદિ ભવેત્ પૂર્વં રક્તો રાગતિરસ્કૃતઃ ।
તં પ્રતીત્ય ભવેદ્ રાગો રક્તે રાગો ભવેત્ સતિ

રક્તે ઽસતિ પુના રાગઃ કુત એવ ભવિષ્યતિ ।
સતિ વાસતિ વા રાગે રક્તે ઽપ્ય્ એષ સમઃ ક્રમઃ

સહૈવ પુનર્ ઉદ્ભૂતિર્ ન યુક્તા રાગરક્તયોઃ ।
ભવેતાં રાગરક્તૌ હિ નિરપેક્ષૌ પરસ્પરમ્

નૈકત્વે સહભાવો ઽસ્તિ ન તેનૈવ હિ તત્ સહ ।
પૃથક્ત્વે સહભાવો ઽથ કુત એવ ભવિષ્યતિ

એકત્વે સહભાવશ્ ચેત્ સ્યાત્ સહાયં વિનાપિ સઃ ।
પૃથક્ત્વે સહભાવશ્ ચેત્ સ્યાત્ સહાયં વિનાપિ સઃ

પૃથક્ત્વે સહભાવશ્ ચ યદિ કિં રાગરક્તયોઃ ।
સિદ્ધઃ પૃથક્પૃથગ્ભાવઃ સહભાવો યતસ્ તયોઃ

સિદ્ધઃ પૃથક્પૃથગ્ભાવો યદિ વા રાગરક્તયોઃ ।
સહભાવં કિમર્થમ્ તુ પરિકલ્પયસે તયોઃ

પૃથગ્ ન સિધ્યતીત્ય્ એવં સહભાવં વિકાઙ્ક્ષસિ ।
સહભાવપ્રસિદ્ધ્યર્થં પૃથક્ત્વં ભૂય ઇચ્છસિ

પૃથગ્ભાવાપ્રસિદ્ધેશ્ ચ સહભાવો ન સિધ્યતિ ।
કતમસ્મિન્ પૃથગ્ભાવે સહભાવં સતીચ્છસિ

એવં રક્તેન રાગસ્ય સિદ્ધિર્ ન સહ નાસહ ।
રાગવત્ સર્વધર્માણાં સિદ્ધિર્ ન સહ નાસહ