મૂલમધ્યમકકારિકા · અધ્યાય 5

નાકાશં વિદ્યતે કિંચિત્ પૂર્વમ્ આકાશલક્ષણાત્ ।
અલક્ષણં પ્રસજ્યેત સ્યાત્ પૂર્વં યદિ લક્ષણાત્

અલક્ષણો ન કશ્ચિચ્ ચ ભાવઃ સંવિદ્યતે ક્વ ચિત્ ।
અસત્ય્ અલક્ષણે ભાવે ક્રમતાં કુહ લક્ષણમ્

નાલક્ષણે લક્ષણસ્ય પ્રવૃત્તિર્ ન સલક્ષણે ।
સલક્ષણાલક્ષણાભ્યાં નાપ્ય્ અન્યત્ર પ્રવર્તતે

લક્ષણાસંપ્રવૃત્તૌ ચ ન લક્ષ્યમ્ ઉપપદ્યતે ।
લક્ષ્યસ્યાનુપપત્તૌ ચ લક્ષણસ્યાપ્ય્ અસંભવઃ

તસ્માન્ ન વિદ્યતે લક્ષ્યં લક્ષણં નૈવ વિદ્યતે ।
લક્ષ્યલક્ષણનિર્મુક્તો નૈવ ભાવો ઽપિ વિદ્યતે

અવિદ્યમાને ભાવે ચ કસ્યાભાવો ભવિષ્યતિ ।
ભાવાભાવવિધર્મા ચ ભાવાભાવાવ્ અવૈતિ કઃ

તસ્માન્ન ભાવો નાભાવો ન લક્ષ્યં નાપિ લક્ષણમ્ ।
આકાશમ્ આકાશસમા ધાતવઃ પઞ્ચ યે ઽપરે

અસ્તિત્વં યે તુ પશ્યન્તિ નાસ્તિત્વં ચાલ્પબુદ્ધયઃ ।
ભાવાનાં તે ન પશ્યન્તિ દ્રષ્ટવ્યોપશમં શિવમ્